Read Futuna-Aniwa AVERE O APOSTOLO 2 Bible Online

AVERE O APOSTOLO 2 - Futuna-Aniwa bible

AVERE O APOSTOLO 2

¹TA nopoge o Pentekost nimai, acre iotshi neinofo ia afenagaro tishana i none tasi.

²Ma milowa nimai iai norio ia taragi, hepe tumtagi sore nisau, ma aia nifonu iotshi tafare i aia acre neinofo iai.

³Iai acre neicitia hepe norero maga o tiafi, ma aia neinofo iluga acre iotshi.

⁴Ma acre iotshi nifonu ia Nokano Tapu, ma neikamata keifasao ia afasao o fanua foci ma foci, hepe Nokano Tapu neitufa iacre keifasao.

⁵Nopogera neinofo ia Jerusalem tagata Juteia, tagata nimori ta mari, niromai ia iafanua iotshi iraro taragi.

⁶Wamuri tagata efuafo neirogona ra, tagata nalupai su nifetacina iai nifakatapuria, ma nimasaro sore su, ianenei iotshi tatane neirogona acre nifasao ia tshana fasao.

⁷Ma acre iotshi nimasaro sore, ma nipuspusi ta nontafito, nokoutucua tasi ia tasi foci, kowcitia, acre iotshi fakou kofasao ra tagata o fanua Calili, mo jimra?

⁸Konapecua acitiotshi korogona acre nokofasao i afasao o tshote fanua iotshi, nifarere acime iai?

⁹Tagata o Parthia, ma Mitia, ma Elam, ma acre konofo ia Mesopotemia, ma ia Juteia, ma Kapatosia, ma Pontus, ma Esia,

¹⁰Frejia, ma Pamfilia, ma Ijipt, ma anuntafa o fanua Libia itata Sairini, ma tagata nofo fakasisi ia fanua Roma, tagata Juteia, ma tagata niamo ta mori o tagata Juteia.

¹¹Tagata o Kriti, ma Arebia, acitia fakarogona acre kofasao ia sece ma sece fasao iotshi tshote, avere sore o Atua.

¹²Ma acre iotshi nimasaro, ma sekeiromana nontafito o anera, nokoutucua acre macre, Konapecua nokano o ane nei?

¹³Faru foci nokosoutari neitucua, Takou tera kona ia weina fou.

¹⁴¶ Kaia Pitrus, nokotu ia acre ta eleven, nifasao ia norio palo iacre, Acowa takou o Juteia, ma acowa iotshi tagata konofo ia Jerusalem, keiro acowa tenei, ma fakarogona tshaku fasao.

¹⁵Ma acre iotshi ra jimra kona hepe acowa mentua, ma kowcitia milownei ta our toru ana o nopoge nei.

¹⁶Kaia tenei komai hepe nifasao neitucua ia ta profeta Joel;

¹⁷Ane nei kamai i anopoge wamuri, neitucua Atua, Avau kamerigi o tshaku Nokano ia tagatotshi, ma tshowa anontariki, ma tshowa anofine kafasao o ane mokagi aia komai, ma tshou atumtane kacitia ane sore hepe amitshi, ma tshowa tatane ituai kamitshi amitshi;

¹⁸Ma ia tshaku afitshicou, ma ia tshaku aftshicou atamafine, avau kamerigi ia anopogera o tshaku Nokano; ma acre kafasao o anea kamai;

¹⁹Ma tagata kacitia avou imna avere sore ia taragi iluga, ma ane sore ia fanua wararonei; toto, ma tiafi, ma tousafi o tiafi;

²⁰Tara kafura ia apouri, ma tumrama ia toto, mokagi ta nopoge sore ma erefisa kamai o Teriki sore;

²¹Ma ane nei kamai, pe iotshi tagata katapa ia neigo o Teriki sore kapare aia ia aniamouri.

²²Acowa takou o Isreil fakarogona afasao ra; Iesu o Nasareth, ta tane Atua neisitu ia fanua tshowa, ia avere sore, ma ane sore nimasaro iateia, Atua neimna acre ia aia i arotowa mokagi acowa, hepe acowa foci keiro;

²³Aia acre neitufwa hepe Atua mokagi nikeiro ma nifasao mukei iateia, acowa niamo ia aremore isa neitucia ia tererakou fakaravasia, ma nitaia nimate;

²⁴Aia Atua neitshicitshiakace, neivetea avava o nimy o nimate, ianenei aia setomatua keipurutshia aia.

²⁵Ma Tevit nifasao o aia, Avou neicitia ta Teriki sore tou ma tou mokagi tshaku foimata; ma aia konofo ia tshaku norima matou, pe avou sumtacu mana;

²⁶Ianenei tshaku roto nibisa, ma tshaku norero mugaro, ma foci tshaku notshino kogapu i acitiafakarafia masike foci;

²⁷Ianenei akoi sekanatshicina tshaku nokano ia tiafi sore, foci akoi tucuasana notshino o tshou Tatane Erefisa keicitia koparapara.

²⁸Akoi nifakairo avou aretu o aniamouri, akoi kamna avou kofonu o kabisa ia tshou foimata.

²⁹Fakou ma anoso, erefia avou fasao sore iacowa o tamana sore Tevit, pe aia komate ma neitanumea, ma tshana terua o nimate konofo iacime ia nopoge nei.

³⁰Ianenei aia tasi profeta, ma nikeiro pe Atua neitucua afasao tapu ma mukei iateia, pe o nohua o tshana notshino, hepe magane o tagata, aia katshicitshia Kristo keinofo ia tshana thron.

³¹Aia neicitia ane nei mokagi, nifasao o ta Kristo kamasike ia tagata komate, ma pe tshana nokano senatshicina aia ia tiafi sore, foci ma tshana notshino secitia parapara.

³²Tenei Iesu Atua neitshicitshiakace, o ane nei acime iotshi fakairo acowa acime neicitia.

³³Ianenei norima matou o Atua neitshicitshia aia iluga, ma ta Mana neitufwa aia hepe tafasao mokagi iateia o ta Nokano Tapu, aia nimarigi tinei, acowa milowa kowcitia ma korogona.

³⁴Ma Tevit secitshiakace iluga i ataragi; kaia aia neitucua, Ihova neitucua ia tshaku Teriki sore, Nofo akoi ia tshaku norima matou,

³⁵Ia taha nopoge avou imna tagata feimacowa akoi moi iraro tshou novai.

³⁶Ianenei erefia iotshi tagata o Isreil keiro tamari, pe Atua neimna tenei Iesu, aia acowa neitucia ia tererakou fakaravasia, Teriki sore ma Kristo.

³⁷¶ Wamuri acre neirogona ra, acre nimy iarotorea, ma neitucua ia Pitrus ma iotshi Apostolo. Fakou ma Anoso, taha acime kamna?

³⁸Wamuri ra Pitrus neitucua iacre, Kotagi maganisa tshowa ma natshicina aia, ma amo baptiso acowa iotshi ia neigo o Iesu Kristo ma aia towaki nori maganisa, ma katufwa iacowa ta Nokano Tapu.

³⁹Ma ta fasao erefia mokagi kotufwa iacowa ma erecriki tshowa, ma ia iotshi tagata papai, ia acre iotshi Teriki sore tshote Atua katapa.

⁴⁰Ma ia afasao nalupai aia nikova ma nifakairo acre, nokoutucua, kapare acowa ia tagata isa nofo icunei ia nopoge milownei.

⁴¹¶ Wamuri ra acre nibisa keiamo tshana fasao, nibaptiso acre, ma ia nopogera nitawa acre nifakatapuria iacre koitata toru thousant tagata.

⁴²Ma acre neinofo mukei ia fakairo ma magane o apostolo, ma ia toutoutshia o bret, ma ia amori.

⁴³Ma nimtacu nimai ia tagatotshi iai, ma nalupai ane sore ma avere masaro sore iateia Apostilo neimna.

⁴⁴Ma iotshi tagata nifakarogrogo nifakatapuria ia none tasi, ma tshare ania mane neinofo iacre hepe tishana;

⁴⁵Ma neifakamata tshare fanua ma anea mane, ma neitufwa tagatotshi faru hepe acre acitiafakarafia.

⁴⁶Ma acre neinofo nopoge ma nopoge ia aroto tishana ia tafare sore o Ihova, ma nitoutoutshia bret ia afare ma afare, nikeina tshare akai ia kabisa, ma ia tishana.

⁴⁷Nokobisa Atua, ma aroto o tagatotshi mugaro iacre, ma Teriki sore nifakatapuria niarafia ia ta kalasia nopoge ma nopoge acre aia kapare ia aniamouri.