Read Futuna-Aniwa AVERE O APOSTOLO 20 Bible Online

AVERE O APOSTOLO 20 - Futuna-Aniwa bible

AVERE O APOSTOLO 20

¹MA wamuri ta kofiatu kurava, Paulo nitapa iateia takou mori, ma nialofa acre, ma nifeke keifano ia Masitonia.

²Ma wamuri aia nifano ia iotshi afanua iai, ma nifakairo sore acre, aia nimai ia Crisi;

³Ma neinofo ia tumrama toru. Ma nopoge ra takou Juteia nimotshi aia, hepe aia itata nisua ia Seria, aia nimentua kuafe ma komai ia fanua Masitonia.

⁴Ma acre iai purocina aia ia Asia Sopater o Biria; ma o Thesalonaika takou Aristarkus ma Sekuntus; ma Ceius o Terbe, ma Timotheus, ma o fanua Esia Tikikus ma Trofimus.

⁵Acre ra niroro mokagi ma nitari acime ia Troas.

⁶Ma acime nisua nifeke Filipai wamuri anopoge o bret leven jimra iai, ma niromai iacre ia Troas i nopoge erima; iai acime neinofo anopoge fitu.

⁷Ma ia nopoge tasi mokagi acre o ta wik, ia aia tagata mori nifetacina keitoutoutshia bret, Paulo nikova iacre, neipenpena ane iotshi keifeke acre aratou, ma tshana fasao palpalo ia tara tupo.

⁸Ma alama nalupai alampe ia tarotopa eluga efare iai acre nifetacina.

⁹Ma neinofo iai ia tatshiroga tasi atumtane neigo Iutikus, aia nimero mukei iai, ma hepe Paulo nikova palo, aia nimoy ia mero, ma nito iraro ia nuntafa toru efare iluga, ma acre neitshicitshia aia nimate.

¹⁰Ma Paulo nifano iraro, ma nito iluga aia, ma nokosoge aia neitucua, Natshicina acowa kotagi ma tshana anea mouri konofo ia aia.

¹¹Wamuri aia nimai iluga foci, ma nitoutoutshia bret, ma nikeina, ma nifasao iacre palo, ia tara neinace, hepe aia nifeke.

¹²Ma acre niarafia ta atumtane nimouri, ma nibisa sore.

¹³¶ Ma acime niroro mokagi ia tavaka, ma nisua ia Asos, iai nimentua keiarafia Paulo ia ta vaka, ma aia neitucua acime keimna hepra, aia ana nimentua keifano ia novai.

¹⁴Ma nopoge ra aia nifapa acime ia Asos, acime niarafia aia ia tavaka, ma nisua ia Mitelini.

¹⁵Ma acime nisua nifeke iai, ma niromai ia nopoge wamuri itata Kaios, ma nopoge wamuri ra acime nitau ia Samos, ma neinofo ia Trocileum sisi ma ia nopoge wamuri acime niromai ia Melitus,

¹⁶Ma Paulo nimentua keisua ia Efesus, ianenei aia secitiafakarafia keinofo anopoge ra ia Esia, ma aia fano milowa pe aia konofo ia Jerusalem ia nopoge o Pentecost.

¹⁷¶ Ma ia Melitus aia Nikowna ia Efesus, ma nitapa aelter o ta, kalasia.

¹⁸Wamuri acre niromai iateia, aia neitucua iacre, Acowa keiro ia nopage tasi mokagi ma wamuri avou nimai ia Esia, magane tshaku iacowa nopoge ma nopoge.

¹⁹Nokovere ia Atua ia fenagaro fakapoto ana erefia, ma ia anoreimata nalupai, ma anea nitakaroiai tshaku roto, acre niromai iatavou ia nimotshi o takou Juteia;

²⁰Ma avou semuni fasao tasi pe aia erefia iacowa, kaia nakatufwa iacowa, ma nakafakairo acowa emoa tagata, ma efare ia efare.

²¹Neitucua mukei ia tagata Juteia, ma ia tagata crisi, kotagi ma natshicina amaganisa ia Atua, ma fakarogrogo ia Tshote Teriki sore Iesu Kristo.

²²Ma milou kowcitia avou kofano fousia kabisa ia tshaku roto ia Jerusalem, avou puspusi taka komai iatavou iai;

²³Nokeiro tenei ana ta Nokano Tapu kofakairo avou ia umrai otshi, nokoutucua pe acre fousia avou, ma takaroiai aroto kamai iatavou.

²⁴Kaia avou sekumtacu ane iotshi ra, ma avou jimra koutucua tshaku ania mouri avou acitiafakarafia sore kage iatavou, pe avou fano ia iotshi tshaku teretu kurava ia kabisa, ma avere neitufwa avou ia ta Teriki sore Iesu, keifakairo ta fasao erefia o ta karofa o Atua.

²⁵Ma milou, kowcitia, avou keiro pe acowa iotshi avau nakofano iacowa nokova tafasao erefia o Atua, acowa, sekacitia foci tshaku foimata.

²⁶Ianenei avou nogia acowa koutucua iranei, pe avou koma ia toto o tagatotshi.

²⁷Ma avou senatshicina keifakairo acowa iotshi fasao o Atua.

²⁸¶ Ianenei fatshigeia amagane tshowa, ma o iotshi asip, acre ta Nokano Tapu nakamna acowa takou sore o acre, keifakeina ta kalasia o Atua, acre aia nifakamata ia tshana toto.

²⁹Ma avou keiro tenei wamuri avou kofano, akuli eiro isa karomai ia acowa keitakaroiai asip.

³⁰Foci ia acowa takou isa kanace, nokofasao anea isa, keitorotshi tagata mori wamuri acre.

³¹Ianenei fatshigeia, ma mentua, pe ia atou toru avou segapu keifakairo acowa iotshi tupo ma tiau ia anoreimata.

³²Ma milou, anoso, avou koutucua acowa keinofo mukei ia Atua, ma ia ta fasao o tshana karofa, aia tomatua keimna arotowa tomatua, ma keitufwa acowa none erefia ia acre iotshi arotorea neipenpena erefia.

³³Avou secitiafakarafia ta selver, mo colt, mo umega o tatane tasi.

³⁴Keini, acowa keiro, pe norima tira niavere ia tshaku kai ma acre neinofo ia avou.

³⁵Avou nifakairo acowa ane iotshi, hepra erefia acowa nokovere ma asitu tagata kotaru, ma keimentua afasao o ta Teriki sore Iesu, hepe aia neitucua, Aia erefia sore kage keitufwa iluga keiamo.

³⁶Wamuri aia nifasao ra, nifakaturia enturi, ma nimori ia acre iotshi.

³⁷Ma acre iotshi nitagi fakasore, ma nito ia nupenawa o Paulo, ma nisogea aia.

³⁸Nokomy sore kage i arotorea ia tshanafasao aia neitucua, pe acre secitiamana foci tshana foimata wamuri ra. Ma acre niroro niparaka aia ta vaka.