Read Futuna-Aniwa AVERE O APOSTOLO 21 Bible Online

AVERE O APOSTOLO 21 - Futuna-Aniwa bible

AVERE O APOSTOLO 21

¹ANE nei nimai, wamuri acime nifeke acre, ma nifetacina tous, acime nimai totonu ia Kos, ma nopoge wamuri ia Rotis, ma nifeke iai niromai ia Patara;

²Ma neicitia tavaka tasi nokosua ia Finaisi, acime nisopo aia ma niroro.

³Wamuri acime neicitia Saiprus, acime nifeke aia ia norima masui, ma nisua ia Siria, ma nitau ia Tairus; ma iai ta vaka fano keinage ane iotshi ia aia.

⁴Ma neicitia tagata mori iai acime neinofo iai anopoge fitu, acre neitucua ia Paulo ia Nokano Tapu, pe aia natshicina fano ia Jerusalem.

⁵Ma acime neinofo anopoge ra nisiri, acime nifeke, ma niroro tshoma aretu; ma acre iotshi ma tshare enahune ma erecriki niparaka ma niarafia acime ia teretu roro watafa umrai sore; Ma acime nifakaturia enturi ia taftafa taia, ma nimori.

⁶Wamuri acime nialofa acre, acime roro ia tavaka; ma acre nikuafe roro ia tshare umrai foci.

⁷Ma wamuri acime nisua ia Tairus, acime nimai ia Tolemes, ma nialofa anoso, ma neinofo ia acre tasi nopoge.

⁸Ma ia nopoge wamuri acime takou roro ia Paulo nefeke, ma niromai ia Sisaria; ma acime niroro efare o Filipus tatane fakairo erefia, aia tasi o acre ta fitu, ma neinofo ia aia.

⁹Ma tatane ra niamo efa nofine sisi, acre nofo ana, ma acre nifakairo ane kamai.

¹⁰Ma hepe acime nitari iai nopoge nalupai, niteifo mai iai ia fanua Juteia tasi profeta nitapa neigo Acabus

¹¹Wamuri aia nimai iacime, aia niamo katoutshi o Paulo, ma nifousia tshana norima ma novai, ma neitucua, Ta Nokano Tapu koutucua, Hepe nei tagata Juteia ia Jerusalem kafousia tatane koutucua tenei tshana katoutshi, ma katufwa aia ia norima o tagata o fanua pouri.

¹²Ma wamuri acime neirogona ane ra, acime ma acre tagata o tumrai tera, nogia mukei aia natshicina keifano ia Jerusalem.

¹³Iai Paulo nifasao, Tiaha acowa kotagi ma eifasia tshaku roto? Ma erefia iatavou jimra keifousia ana, kaia erefia foci avou keimate ia Jerusalem, ia neigo o ta Teriki sore Iesu.

¹⁴Ma wamuri aia serogona tshome neitucuasana, acime natshicina, nokoutcua, Erefia hepe ta Teriki sore acifafakarafia.

¹⁵Wamuri anapogera acime niamo tshome akato, ma nifano ia Jerusalem.

¹⁶Faru foci ma o tagata mori tsha Sesaria niroro ia acime, ma arafia ia acre tasi tatane nitapa neigo Neson tatane Saiprus, aia nimori ituai, ia tshana fare acime konofo.

¹⁷Nopoge ra acime niromai ia Jerusalem, anoso niarafia acime ia kabisa.

¹⁸Ma ia nopoge wamuri niarafia acime ia Jakobus; ma iotshi aelter foci neinofo ia aia.

¹⁹Ma wamuri aia nialofa acre, aia neitucua ania mane Atua neimna ia afanua o tagata pouri ia tshana nikova ma vere.

²⁰Wamuri acre neirogona ra, acre nibisa ia Teriki sore, ma neitucua iateia, Noso akoi kowcitia nalupai thousant o tagata Juteia acre fakarogrogo, ma acre iotshi tomatua acitiafakarafia sore tafasao tapu.

²¹Ma acre neirogona tenei o akoi, pe akoi fakairo iotshi tagata Juteia nokonofo ia fanua o tagata pouri keinatshicina ta fasao tapu o Moses, nokoutucua erefia acre natshicina segeakage erecriki, ma keinatshicina keiroro ia amagane aia nifakairo.

²²Konapecua iateia? tagatotshi kafetacina fakatapuria, ma acre karogona pe akoi komai.

²³Ianenei erefia akoi emna magane nei acime koutucua iatakoi, Takou efa tshome konofo acre nifasao tapu mo mukei ia ane takavari;

²⁴Acre amo, ma penpena akoi ia acre, pe acre kotasia poto tshare anourou, ma pe tagatotshi keiro ane iotshi acre neirogona o tshou magane nontafito kojimra iateia; kaia pe akoi foci kofano ia magane totonu, ma maganerefia ia tafasao tapu.

²⁵I amagane o tagata fakarogrogo o fanua pouri, acitia neiserea tatapuria iacre ma nifasaoce iateia, erefia acre natshicina amagane iotshi ra, kaia acre ra ana erefia acre natshicina akai ma ane takavari ia afata tapu o tetua pouri, ma toto, ma ane tshicivinia nupenawa komate, ma natshicina tshigo fafine tsha faruke.

²⁶Nopoge ra Paulo niamo takou ra, ma nopoge wamuri nokofano ia ta fare sore Ihova, keifakairo acre kurava anopoge o penpena, ma pe anea takavari o acre iotshi keitufwa iateia.

²⁷Ma nopoge fitu itata kurava, takou Juteia o fanua Asia neicitia aia ia ta fare sore o Ihova, nifasao sore tagatotshi, ma nipurutshia aia.

²⁸Nokotapa fakapalo, Fakou o Isreil asitu; Tenei tatane, fakairo tagata i iafanua iotshi feimacowa tagata, ma ta fasao tapu, ma umrai nei, ma foci ia nakarafia takou Crisi ma ia ta fare sore o Ihova, ma iauiai tarahu o tenei none erefia.

²⁹Ma acre neicitia mokagi ia aia ia umrai sore Trofimus tatane o Efesus, aia acre nimentua Paulo niarafia ia tafare sore o Ihova.

³⁰Ma iotshi tagata o umrai sore nimasike, ma tagata nifura nifetacina nifakatapuria; ma acre niamo Paulo, ma nitorotshia aia watafa tafare o Ihova, ma milowa afeitoco nipofna.

³¹Ma hepe acre itata kotshi aia komate, fasao nimai ia tatane sore o takou tsha tatowa, pe iotshi tagata o Jerusalem nifiatu.

³²Aia milowa niamo takou o tatowa ma asenturio ma nitere teifo iacre, ma wamuri acre neicitia ta tane sore ma takou o tatowa, acre natshicina nokotuctucia Paulo.

³³Iai ta tane sore o takou tsha tatowa nimai itata, ma nipurutshia aia, ma neitucua mukei keifousia aia ia ous erua; ma nifakowia aia akai, ma taha aia neimna.

³⁴Faru nitapa fakapalo tafasao tasi, ma faruke afasao foci, ia acre nifetacina iai, ma aia sekeiro mana tamari ma tagatotshi fasao palo, aia neitucua mukei arafia aia ta fare sore.

³⁵Ma wamuri aia nifano ia teretu fano iluga ia tafare, takou o tatowa nitakoia aia iluga ma ta fakainina ma tuctucia o tagata.

³⁶Ma tagatotshi nifetacina niroro wamuri, nokotapa, Towaki aia.

³⁷Ma hepe acre niarafia Paulo ia ta fare sore, aia neitucua ia tatane sore o takou tsha tatowa, Erefia avou tafasao iatakoi mo jimra? Aia neitucua, Akoi keiro kofasao ia afasao Crisi mo jimra?

³⁸Akoi tatane Ijipt mo jimra, aia nifiatu mokagi anopoge ra, ma niarafia ia tugogou for thousant fakou, acre nitaia komate tagata.

³⁹Kaia Paulo neitucua, avau tatane o Juteia o fanua Tarsus, ia Silisia, tatane o umrai sore erefisa; ma avou nogia mukei akoi, erefia avou keifasao ia tagata.

⁴⁰Ma wamuri aia neitucua erefia, Paulo nikotu ia teretu fano iluga ia tafare sore, ma neitutusiana ia norima ia tagata, Ma wamuri fakarogona sore iacre, aia nifasao iacre i afasao Hibru, nokoutucua.