Read Futuna-Aniwa AVERE O APOSTOLO 23 Bible Online

AVERE O APOSTOLO 23 - Futuna-Aniwa bible

AVERE O APOSTOLO 23

¹MA Paulo, nokowcitia mukei takou nokofakatamou, neitucua, Fakou ma anoso, Avou neinofo ia fenagaro erefia emoa Atua ituai ia nopoge nei ma.

²Ma teriki sore o tafare mori Ananaias neitucua acre kotu itata aia, kotshi aia ia rogoutu.

³Iai Paulo neitucua iateia, Atua katshi akoi, akoi tapai iamosia kego, ma akoi konofo keitucua ioria iatavou hepe fakairo o tafasao tapu, ma koutucua katshi avou hepe tafasao tapu neitucuasana.

⁴Ma acre kotu itata neitucua, Akoi eisciria teriki sore o tafare tsha Atua mo?

⁵Wamuri ra Paulo neitucua, Anoso avou puspusi aia teriki sore o tafare mori; ma aia neisereace, Akoi kanatshicina kafasosa ia teriki o tshou tagata.

⁶Kaia wamuri Paulo neicitia pe tasi nuntafa o acre tagata Satusi, ma foci nuntafa Afarisi, aia nitapa palo ia tagata o fakatamou, Fakou ma anoso, Avou tasi Farisi, ma avou ta nontariki o tasi Farasi, ma ia kamentua ma kamasike o tagata komate acre nifiatu avou.

⁷Ma wamuri aia nifasao ra, neinace nifiatu ia Afarasi ma Asatusi; ma acre iotshi nifetacina iai nivaia.

⁸Ma Asatusi nokoutucua tagata komate semasike foci ia tamate, ma agelo kojimra, ma nokano tsha tagata kojimra; kaia Afarisi koutucua iotshi konofo.

⁹Ma afasao sore neinace, ma faru tagata fakairo o Afarasi nimasike ma nifiatu, nokoutucua, Acime secitiamana ane isa ia tatane nei, kaia pe tasi nokano, mo tsi agelo nifasao iateia, erefia acime natshicina fiatu Atua.

¹⁰Ma nifiatu sore i afasao neinace iai, ma tatane sore o takou tsha tatowa, nokumtacu acre torotshi eifasia Paulo ia nuntafa ma nuntafa, neitucua takou tsha tatowa keiteifo, ma keiamo aia ia tomatua tshare ia acre, ma keiarafia aia ia tafare sore.

¹¹Ma tupo wamuri ra ta Teriki sore kotu itata aia, ma neitucua, Kabisa Paulo; ma hepe akoi nifakairo o avou ia Jerusalem, hepe foci akoi kafakairo ia Roma.

¹²Ma wamuri tiau nimai iai, faru fakou Juteia nifasao tishana, ma nifousia arotorea ia sore afasao tapu, nokoutucua pe acre natshicina ana takai, ma numia mokage acre kotshi komate Paulo.

¹³Acre forte fakou ma faru foci nifasao mukei hepra.

¹⁴Ma acre niromai ia fatoriki o tafare tsha Ihova ma takou sore, ma neitucua, Acime nifousia acime ia sore afasao tapu, pe acime kanatshicina kakeina takai iotshi mokagi acime kotshi komate Paulo.

¹⁵Ianenei acowa ma takou sore o nokofakatamou fasao ia tatane sore o takou tsha tatowa, pe aia arafia aia iacowa aratou, hepe acowa acitiafakarafia fakowia aia mukei foci ia tshana magane; ma acime mokagi aia komai itata, konofo kotshi aia komate.

¹⁶Ma nontariki o nokave o Paulo neirogona o tshare motshi iateia, aia nifano efare sore ma neitucua ra ia Paulo.

¹⁷Ma Paulo nitapa tasi tatane Senturio iateia, ma neitucua, Arafia atumtane nei ia tatana sore o takou tsha tatowa; ma aia nakamo tasi ane keifasao aia iateia

¹⁸Hepra aia niamo aia ma niarafia aia ia tatane sore o takou tsha tatowa, ma neitucua, Paulo tatane nifousia nitapa avou iateia, ma nogia mukei avou keiarafia atumtane nei iatakoi, aia acitiafakarafia keifasao iatakoi.

¹⁹Iai tatane sore o takou tsha tatowa nipurutshia tshana norima, ma niarafia aia nuntafa papai sisi acrawa ana iai neirogona, ma nifakowia aia. Taha akoi niamo keitucua iatavou?

²⁰Ma aia neitucua, Takou Juteia nifasao ia fenagaro hepe tasi keifakowia akoi pe aratou akoi arafia Paulo iraro ia takou o fakatamou hepe acre acitiafakarafia fakowia mukei faru foci afasao o aia.

²¹Kaia erefia akoi sefakarogona tshare afasao; ma forte fakou ma faru foci o acre nigusgusu motshi aia, acre nifousia acre ia sore afasao tapu, pe acre sekeina takai, ma senumea mokagi acre kotshi komate aia; ma milou acre konofo iateia, nokosara tshou afasao iateia.

²²Ma tatane sore o takou tsha tatowa neitucua atumtane fano, ma neitucuasana mukei aia, Natshicina koutucua tatane tasi akoi neitucua iatavou ane iotshi ra.

²³Aia nitapa iateia erua tatane senturio, nokoutucua, Penpena erefia tu huntret fakou o tatowa keroro ia Sisaria, ma fakou o tatowa koike ia ahorse sevente, ma takou o tatowa tsha tatou tu huntret, ia our toru o tupo nei.

²⁴Ma tufwa acre ahorse, pe acre keinagi Paulo nokoike ia tshare nopua, ma arafia aia erefia ia Filiks ta teriki.

²⁵Ma aia neiserea tatapuria tase hepe nei;

²⁶Klatius Lysias ia teriki erefisa Filiks karofa tshaku.

²⁷Takou Juteia nipurutshia tatane nei, ma acre koitata kotshi aia komate, iai avou nimai ia takou nalupai o tatowa ma niamo ma nipare aia, nakeiro aia tatane o Roma.

²⁸Ma nopoge ra avou acitiafakarafia keiro tiaha acre nifasosa iateia, avou niarafia aia efuafo ia tshare takou o fakatamou;

²⁹Avou neicitia acre nifasosa iateia ia anea fakowia o tshare afasao tapu, kaia acre sekoutucua magane tshana erefia ioria ia komate mo kofousia.

³⁰Ma wamuri tasi neitucua, iatavou, pe takou Juteia nimotshice tatane, avou nikowna aia totonu iatakoi, ma neitucua mukei ia tagata foci nifasosa iateia, keitucua emoa akoi tshare afasao ia magane tshane, Alofa.

³¹Tupo ra takou tsha tatowa, hepe neitucua mukei iacre, niamo Paulo, ma niarafia aia ia tupo ia Antipatris.

³²Ia aratou acre natshicina takou o tatowa koike ia nupua ahorse keiarafia aia, ma acre nikuafe niromai ia tafare sore;

³³Acre, wamuri acre niromai ia Sisaria, ma neitufwa tatapuria ia teriki, acre neinagi foci Paulo emoa aia.

³⁴Ma wamuri ta teriki nitawace ta tatapuria, aia nifakowia aia tshana fanua, Ma wamuri aia kerio aia tatane o Silisia;

³⁵Aia neitucua, Avou karogona, akoi, ia taha nopoge tagata fasosa iatakoi karomai foci. Ma aia neitucua mukei keinage aia mukei ia tafare sore o Herot keitucua iai ioria o magane safe.