Read Futuna-Aniwa AVERE O APOSTOLO 26 Bible Online

AVERE O APOSTOLO 26 - Futuna-Aniwa bible

AVERE O APOSTOLO 26

¹IAI Acripa neitucua ia Paulo, Erefia akoi kofasao o tshou magane. Iai Paulo nifakatonusia tshana norima, ma nifasao o tshana magane.

²Avou kamentua avou kabisa teriki Acripa, ianenei avou katucua tshaku magane iranei emoa akoi, ia ane iotshi takou Juteia nifasosa o avou.

³Ianenei avou keiro akoi arapakou keiro amagane iotshi ma afasao iotshi o tagata Juteia, ianenei avou takowia mukei akoi keifakarogona avou palo.

⁴Tshaku magane i anopoge avou sisi ia milou ma, aia neikamata konofo ia tshaku tagata ia Jerusalem, iotshi tagata o Juteia keiro;

⁵Acre nikeiro avou ia neikamata, pe acre koutucua, pe hepe magane o tagata afasao totonu mukei ia tshome mori avou nimagane o ta Farasi.

⁶Ma milou avou kotu ma koutucua ioria avou o afasao Atua neitucua ia tamanome;

⁷Ia ta fasao ra tshome twelv nuntafa tagata o Isreil atou ma tou nokomori Atua tiau ma tupo, kamentua aia kamai. Ma ia kamintua afasao o ane ra kamai, teriki Acripa takou Juteia kofasosa iatavou.

⁸Tiaha acowa mentua tagata sefakarogo ane ra, pe Atua katshicitshia kace tagata komate?

⁹Tamari avou foci nimentua, pe erefia avou emna anea nalupai ia feimacowa ta neigo o Iesu o Nasareth.

¹⁰Ane ra avou foci neimna ia Jerusalem; ma nalupai o tagata mori erefia avou neinage ia tafare mukei; fatoriki o tafare Ihova neitufwa avou tomatua iateia; ma anopoge ra kotaia acre komate, avou foci nifasao erefia kotaia acre.

¹¹Ma avou nitaia acre nalupai ia iotshi afare mori, ma neimna acre keifasosa tapu; ma nokofakainina sore su tshaku iacre, avou nisewa acre foci ia umrai sore ma papai.

¹²I avere nei hepe avou nifano ia Tamaskus ia tomatua ma tatapuria ia fatoriki o tafare Ihova.

¹³Ia taute, Teriki, Avou neicitia ia teretu tasi merama nimai taragi, aia sore kagi ta merama o tara, nokolama noneate kotori avou, ma acre niroro iatavou.

¹⁴Ma wamuri acime iotshi nito ia takere, Avou neirogona tasi norio nokofasao iatavou, ma nokoutucua ia afasao Hebru, Saulo, Saulo, tiaha akoi kosewa avou? Aia mukei iatakoi keitucia novai ia anea taro.

¹⁵Ma avou koutucua, Akoi akai Teriki sore? Ma aia neitucua, Avou Iesu aia akoi kosewa.

¹⁶Kaia masike, ma kotu ia tshou novai; ma avou nakomai iatakoi keicitia avou ia ane nei, keimna akoi tasi tatane kova ma fakairo tagata ane iotshi ra akoi nakacitia, ma o ane iotshi foci akoi kacitia avou nokafakairo akoi;

¹⁷Nokopare akoi ia tagata Juteia, ma ia tagata o fanua pouri, ia acre milou avou kowna akoi,

¹⁸Keitshiki foimatorea, ma keikuafe acre ia apouri ia merama, ma ia tomatua o Satana ia Atua, pe keitufwa iacre keiamo towaki nori amaganisa tshare, ma none erefia ia acre neipenpena erefia ia fakarogrogo ia avou.

¹⁹Wamuri ra, Teriki Acripa, avou setowaki afasao o ane sore neicitia ia taragi;

²⁰Kaia nifasao mokagi ia acre ia Tamaskus, ma ia Jerusalem, ma ia fanua iotshi o Juteia, ma wamuri ra ia tagata o afanua pouri, pe erefia acre kotagi ma feimacowa maganisa ma kuafe ia Atua, ma maganerefia hepe tamari acre kuafe ma feimacowa maganisa.

²¹Ia anea ra takou Juteia nipurutshia avou ia tafare o Ihova, ma koitata kotshi avou komate.

²²Nakamo asitu ma kapare o Atua, avou konofo ia nopoge nei, nokofakairo tagata sisi ma sore, sekoutucua anea foci, kaia acre ana aprofeta ma Moses neitucua kamai;

²³Pe Kristo kotshi komate, ma pe aia tasi mokagi kamasike ia tagata komate, ma aia katufwa merama ia tagata Juteia, ma ia tagata o fanua pouri.

²⁴Ma hepe aia nifasao hepra ia tshana magane, Festus neitucua ia norio palo, Paulo akoi kowkali, nitawa tatapuria nalupai ma arapakou iateia emna akoi kowkali.

²⁵Kaia aia neitucua avou jimra kowkali Festus sore ma erefisa; kaia koutucua afasao o tamari ma totonu.

²⁶Ma ta teriki nokeiro o ane iotshi ra, emoa aia foci avou fasao totonu; ma avou keiro tamari jimra ane tasi o acre nifuna iateia, ma ane nei seneimna ia nunturi.

²⁷Teriki Acripa akoi fakarogrogo aprofeta mo? Avau keiro akoi fakarogrogo.

²⁸Iai Acripa neitucua ia Pualo, Akoi itata emna avou tasi tane o Kristo.

²⁹Ma Paulo neitucua, Avou acitiafakarafia i Atua, pe jimra akoi ana, kaia foci acreiotshi fakarogona avou iranei, neimna itata, ma tamari hepe avou, ane ra jimra aus ana.

³⁰Ma wamuri aia nifasao ra, ta teriki nimasike, ma ta tane sore o umrai, ma Bernaise, ma acre neinofo ia acre.

³¹Ma wamuri acre niroro ia nuntafa papai sisi, acre nifasao macre, nekoutucua, Tatane nei semaganisa ioria ia ta mate, mo fousia aia iateia.

³²Iai Acripa neitucua ia Festus. Tatane nei erefia eivetea tshana vava ma aia kofano, pe aia sekoutucua Sisar karogana aia.