Read Futuna-Aniwa AVERE O APOSTOLO 27 Bible Online

AVERE O APOSTOLO 27 - Futuna-Aniwa bible

AVERE O APOSTOLO 27

¹MA wamuri acre neitucua mukei acime kasua ia Itale, acre neitufwa Paulo ma faru foci takou neinofo ia ta fare mukei ia tasi tatane neigo Julius, aia senturio o nuntafa tagata tsha tatowa neigo afoga tsha Acustus.

²Ma niroro ia ta vaka tsha Atramitium, acime nifetacina tous, kamentua keisua itata afanua watai o Asia, tatane Aristarkus, o Masitonia tsha fanua Thesalonaika nisua ia acime.

³Ma nopoge wamuri acime nitofia fanua Saiton. Ma Julius nimaganerefisa ia Paulo, ma neitufwa aia kofano ia tshana anele, keialofa acre.

⁴Ma wamuri acime nisua nifeke iai, acime nisua itata Saiprus ianenei atumtagi isa.

⁵Ma wamuri acime nisuace ia tatai o Silisia, ma Pamfilia, acime niromai ia Maira tasi tumrai sore o Lisa.

⁶Ma iai ta Senturio neicitia tasi tavaka tsha Aliksantria nokosua ia Itale, ma aia neinage acime ia aia.

⁷Ma wamuri acime nisua fakasisi nopoge nalupai, ma semai ita Naitus, ta tumtage isa iateia, acime nisua itata fanua Kriti, ma itata Salmone;

⁸Ma mukei nifano itata aia, niromai ia none neigo, Ta afiava erefisa; itata aia tumrai sore neigo Lasia.

⁹Wamuri nopoge nalupai nisiri, ma nopoge isa asua nimai, ianenei ta tacripoga kapari nisirice, Paulo nifasao iacre.

¹⁰Ma neitucua iacre, Takou sore, avou keiro asua tine kamna isa, ma iauiai sore aneia, jimra ia anea ia tavaka ma tavaka ana, kaia foci o tshote ania mouri.

¹¹Kai tatane senturio nifakarogrogo afasao o teriki o tavaka, ma tavaka tshana, mokagi afasao neitucua ia Paulo.

¹²Ma ianenei ta fiava sisi keinofo palo ia aia isa, nuntafa sore o tagata neitucua erefia keifeke iai foci, pe ia tomatua sore keifano ia Fenaise, ma iai keinofo palo ia nopoge mukaligi, aia tasi fiava o Kriti, ma neinofo ia tokarou ma parapuri.

¹³Ma wamuri ra tumtagi etoga nisau erefia, acre nimentua aia erefisa iacre, nifetacina tous iai, acre nisua itata Kriti.

¹⁴Kaia wamuri ra sisi nimasike nifapa aia tasi tumtagi isa sore, neigo Iurokliton.

¹⁵Ma wamuri nipurutshia tavaka ma aia sefano totonu ia tumtagi, acime nagi aia keipesia ia tumtagi.

¹⁶Ma nokotere itata tasi fanua motu neigo nitapa Klaute, acime vere sore keinagi erefia tupuruku;

¹⁷Wamuri acre neinagi aia iluga, acre niamo anea asitu nifousia toura iraro ma kofori tavaka, ma nimtacu pe acre kofano ia taune tanu, niamo iraro tara, ma nifano mokagi tumtage.

¹⁸Ma acime nokotakataka ia tumtagi sore isa, nopoge wamuri acre neimna mama tavaka

¹⁹Ma ia nopoge toru acime ia norima tshome nitowaki watafa ania mane nifousia ma penpena tavaka.

²⁰Ma wamuri secitia mana tara ma afatu ia nopoge nalupai, ma tumtagi sore isa neinofo ia acime, iotshi afinagarome nimentua acime somouri wamuri kaia kokero.

²¹Kaia wamuri sefasao acre ituai, Paulo kotu i aroto emoa acre ma neitucua, Takou sore, aia erefia pe acowa neirogona avou, ma sefetacina tous ia Kriti, ma keiamo iauiai ma takaroiai tinei.

²²Ma milou avou koutucua iacowa kabisa, ma jimra tasi tatane o acowa kokero komate, kaia tavaka ana.

²³Ma nikotu itata avou tupo nei ta agelo o Atua, avou tshana, ma avou kovere iateia,

²⁴Nokoutucua, Natshicina kumtacu Paulo, tamari kei arafia akoi emoa Sisar, ma tamari Atua nakatufwa akoi iotshi takou kosua ia akoi.

²⁵Ianenei, takou, kabisa acowa; ma avou fakarogrogo Atua pe aia kamai hepe aia neitucua iatavou.

²⁶Kaia aia towaki acitia ia fanua motu tasi.

²⁷Kaia wamuri tupo fortin nimai, hepe acime nitere iluga ma iraro ia tatai Atria, itata taratupo, takou o tavaka iai nimentua acre niromai itata fanua tasi;

²⁸Ma nikotave, ma neicitia aia twente fathom, ma nifano fakasisi foci acre nikotave foci neicitia aia aia feftin fathom

²⁹Ma nokumtacu pe acre kotu ia afatu, acre neinagi efa ous wamuri tavaka ia tatai, ma neicitiafakarafia tiau mai.

³⁰Ma hepe takou o tavaka koitata keifura ma natshicina tavaka, wamuri acre neinage tupuruku ia tatai, nokoutucua hepe acre towaki ia tatai aus watafa tavaka ia nuntafa mokagi.

³¹Paulo neitucua ia senturio ma takou o tatowa, Pe acre ra sekonofo ia tavaka, acowa sekamouri mana.

³²Iai takou o tatowa nitoutshiace atoura tsha tupuruku, ma aia nito ia tatai.

³³Ma hepe tiau nokomai Paulo nifakowia acre iotshi keina akai, nokoutucua, Tenei nopoge fortin nisiri acowa konofo napari ma sekeina.

³⁴Ianenei avou fakowia mukei acowa keiamo keina faru akai, ma tenei erefia ia tshowa aniamouri, ma jimra tasi foiuru kotu ia nouru o tasi o acowa.

³⁵Ma Wamuri aia nifasao ra, aia niamo bret, ma nimori ia Atua iateia emoa acreiotshi, ma wamuri aia toutshia, aia neikamata keina.

³⁶Wamuri ra acre iotshi nibisa, ma acre foci niamo faru takai.

³⁷Ma acime iotshi ia tavaka ra nitawa tu huntret, ma sevente seks tagata.

³⁸Ma wamuri acre nikeina makona, acre neimna mama tavaka, ma nitowaki ta wit ia tatai.

³⁹Ma tiau nimai iai, acre sekeiro mana ta fanua; kaia acre neicitia tasi taratroto ia aia fiava ma towne ia fanua, ia aia acre nimentua, pe erefia keiamo ta vaka iai.

⁴⁰Ma wamuri acre nifetacina ous, acre nagi tavaka tere mokagi tatai, ma eivetea avava nifousia ta foi sore ma nagi iluga tara sore ia tumtagi, ma nifano ia tafanua.

⁴¹Ma nokofano ia none iai erua tatai nifapa, acre nage tavaka ia taune, ma nopito mokagi nikotu mukei, ma neinofo mukei su, kaia nopito wamuri neifasia ia eifatshi o apiau.

⁴²Ma takou o tatowa neitucua kotaia komate acre tagata nifousia ia ous, nimtacu faru o acre koukou tatai ma kofura.

⁴³Kaia ta senturia, neicitiafakarafia keipare Paulo, neitucuasana acre, ma neitucua mukei pe acre tomatua koukou komanuke ia tatai roro mokagi ia ta fanua.

⁴⁴Ma acre neinofo wamuri ra, faru ia ahavaka, ma faru ia nopitopito eifasia o ta vaka. Ma ane nei nimai acre iotshi roro erefia ia ta fanua.