Read Futuna-Aniwa AVERE O APOSTOLO 28 Bible Online

AVERE O APOSTOLO 28 - Futuna-Aniwa bible

AVERE O APOSTOLO 28

¹WAMURI acre nifeke tavaka, acre nikeiro ta fanua motu nitapa neigo Melita.

²Ma tagata o fanua pouri nimaganerefia iacime, ma acre nitofuna tiafi ma niarafia acime iotshi, ianenei towa nito, ma mukaligi,

³Ma wamuri Paulo nifetacina afoga tererakou tafia, aia neinage acre ia tiafi, ma tasi agata isa nimai watafa tiafi, ma nimoutshia tshana norima.

⁴Ma wamuri tagata o fanua pouri neicitia agata isa nitou ia tshana norima, acre neitucua iacre, Hepe tamari tatane nei kotshi komate tagata, pe aia sekokero ia tatai, aia ioria maganisa feimacowa aia komouri wamuri ra.

⁵Ma aia ruruia agata ia tiafi, ma semace iateia.

⁶Kaia acre neicitia pe aia nifura mo nito komate milowa, kaia wamuri acre neicitia fakapalo ma aia semace iateia, acre nitafuri tshare finagaro, ma neitucua aia tetua tasi.

⁷Ia nuntafa fanua iai, anone fanua tsha tatane sore o fanua motu, tshana neigo Publius, aia niarafia acime, ma aia neitufwa ana acime akai nopogi toru.

⁸Ane nei nimai, ta mana o Publius nimoy aia nimace o mukaligi, ma saria toto, Paulo nifano efare iateia, ma nimori ma neinage tshana norima iluga aia, ma neipenpena aia.

⁹Wamuri aia neimna tera, faru foci tagata ia fanua iai nimace niromai, ma neipenpena acre;

¹⁰Acre foci neitufwa acime ane nalupai, ma nopoge ra acime nifeke iai acre neitufwa acime ane iotshi nalupai erefia iateia.

¹¹Ma wamuri tumrama toru nisiri acime nifeke ia tavaka tasi o Alixanteria, aia neinofo iotshi tumrama o mukaligi ia fiava o fanua motu, tshana tatapuria nitapa neigo Kastor ma Poluks.

¹²Ma nitau ia fanua Sairakus, acime neinofo iai nopoge toru.

¹³Ma nifeke iai acime nisua totonu, nimai ia Rejium; ma wamuri nopoge tasi tumtagi etoga nisau, ma acime niromai nopoge wamari ra ia Putiolai;

¹⁴Iai acime neicitia anoso, ma acre nogia acime keinofo ia acre anopoge fitu, ma hepra acime niroro ia Roma.

¹⁵Ma iai anoso neirogona o acime, acre nifeke iai niromai keifapa acime papai ia umrai o Apeus, ma ta fare toru; wamuri Paulo neicitia acre, aia nimori Atua, ma niamo tomatua.

¹⁶Ma wamuri acime niromai ia Roma ta senturio neitufwa tagata nifousia ia tatane sore o takou o tatowa nifatshigeia acre; kaia acre neinage Paulo ana ia tafare tasi, ia tatane tasi o tatowa aia nifatshigeia aia.

¹⁷Ane nei nimai, wamuri nopoge toru Paulo nitapa takou sore o fanua Juteia keifetacina, ma wamuri acre nifetacina, aia neitucua iacre, Fakou ma anoso, avou semagane safi ia tagata, mo amagane o tamanoteia, kaia acre neitufwa avou nifousia ia Jerusalem ia norima o tagata Roma.

¹⁸Acre, wamuri acre nifakowia ma neirogona tshare ma tshaku fasao, neitucua erefia eivetea ta vava ma avou kofano, ianenei avou semagane ioria ia kotshi komate avou.

¹⁹Kaia wamuri takou Juteia neitucuasana tira, acre neimna avou neitucua erefia Sisar fakaragona avou; jimra pe ane isa konofo avou keifasosa ia tshaku fanua.

²⁰Ianenei avou nakatapa acowa, keicitia acowa, ma keifasao ia acowa, ianenei ia ane kamentua kamai o Isreil acre nifousia avou ia tenei tous.

²¹Ma acre neitucua iateia Seserea tatapuria ia Juteia iacime o tshou magane, ma jimra tasi o anoso niromai nifasao acime ane safi tasi o akoi.

²²Kaia acime acitiafakarafia keirogona akoi koutucua taha akoi kamintua; ma o afoga nuntafa tagata tera, acime keiro i afanua iotshi tagata fasosa o aia.

²³Ma wamuri acre neitucua tasi nopoge iateia, nalupai tagata niromai iateia efare tshana; ia acre aia nifakairo ma nikova ta vaka o Atua, nokofakairo acre ania mane nifasao o Iesu ia tafasao tapu neisereace ia Moses, ma ia afasao o aprofeta, ia tapopo ma neinofo iateia ia fiafi.

²⁴Ma faru nifakarogrogo afasao aia neitucua, ma faru sefakarogrogo.

²⁵Ma wamuri acre nifiatu iateia arotorea jimra tasiana, acre nifeke, wamuri Paulo neitucua tasi fasao, Tamari ta Nokano Tapu nifasao ia Aisea ta profeta ia tamanoteia.

²⁶Nokoutucua, Fano ia tagata nei ma koutucua, nokofakarogona acowa karogona, ma sekeiro mana ta nokano, ma nokowcitia acowa kacitia ma secitia mana erefia;

²⁷Ma aroto o tagata nei komukei su, ma tshare nuntarega tuturi, ma tshare foemata acre nipofna. nimtacu pe acre kowcitia ia foimatorea, ma fakarogona ia Atariga tshare, ma keiro i arotorea, ma kuafe ia Atua, ma avou keipenpena acre.

²⁸Keiro ianenei acowa, pe anea mouri o Atua kakowna ia tagata o fanua pouri, ma acre karogona aia.

²⁹Ma wamuri aia neitucua afasao ra, tagata Juteia nifeke, ma nifasao sore acre macre.

³⁰Ma Paulo neinofo atou erua iotshi ia tshana fare aia nifakamata, ma niamo nifakairo iotshi tagata niromai efare iateia,

³¹Nokova ta vaka o Atua, ma nokofakairo anea mane o Teriki sore Iesu Kristo, ia sore tomatua, jimra tatane tasi neitucuasana aia.