Read Futuna-Aniwa AVERE O APOSTOLO 3 Bible Online

AVERE O APOSTOLO 3 - Futuna-Aniwa bible

AVERE O APOSTOLO 3

¹PITRUS ma Joanes nifitshi ia tafare sore o Ihova ia our o ta mori, ta our nein.

²Tasi tatane tshana novai isa ia nopoge nana nifarere aia acre nitakaia aia, neinagi aia nopoge ma nopoge ia tafeitoca o tafare sore tsha Ihova, neigo tafeitoca tira Erefisa, keinogia acre niroro ia ta fare keitufwa aia ane.

³Aia neicitia Pitrus ma Joanes itata roro ia tafare sore o Ihova, neinogia acrawa keitufwa aia ane.

⁴Pitrus neicitia mukei aia ia Joanes, neitucua, Kowcitia acimawa.

⁵Aia neirogona erefia acrawa, nimentua acrawa keitufwa aia ane.

⁶Pitrus neitucua, Selver ma colt tshaku kojimra, kaia ane tshaku konofo avou tufwa akoi; I ta neigo o Iesu Kristo o Nasareth masike ma katakaro.

⁷Aia nipurutshia tshana norima matou ma neitshicitshia aia, ma milowa tshana novai ma neivi o nuntapugau niamo tomatua.

⁸Ma aia nokosopo iluga, nikotu, neikamata nitakaro, ma nifano ia tafare sore o Ihova, nokofano, ma nokosopo, ma nokobisa ia Atua.

⁹Ma iotshi tagata neicitia aia nitakaro ma nokobisa ia Atua.

¹⁰Ma acre nikeiro aia neinofo ia ane neitufwa ana aia ia tafeitoca Erefisa o tafare tsha Ihova, ma acre nifonu ia masaro sore su ia ane neimna iateia.

¹¹¶ Ma hepe tatane neimna tomatua nipurutshia Pitrus ma Joanes, iotshi tagata nifura fakatapuria iacratau ia nuntafa tafeitoca neigo Solomon, nokomasaro sore su.

¹²Iai Pitrus neicitia tera, aia nifasao tagata, Acowa Fakou o Isreil, tiaha acowa komasaro sore ia ane nei? mo tiaha acowa koucitia mukei acimawa, hepe ia tshimawa tomatua ma maganerefia acimawa neimna tatane tenei keitakaro?

¹³Ta Atua o Ebraham, ma o Isak, ma o Jekob, ta Atua o tamanoteia neima kosore tshana Nontariki Iesu, aia acowa neitufwa, ma nikovetea aia emoa Pailet, nopogera aia acitiafakarafia sore eivetea tshana vava.

¹⁴Kaia acowa nikovetea aia Ta Erefisa ma magane tontonu, ma neinogia ta tane neitshi komate tagata keitufwa iacowa;

¹⁵Ma neitshi nimate ta Teriki o aniamouri, aia Atua neitshiacitshia ia tagata nimate, acimawa neicitia ma fakairo acowa iateia.

¹⁶Ma tshana neigo ia fakarogrogo tshana neigo neimna tatane tenei tomatua, aia acowa kowcitia ma keiro; keini ta fakarogrogo ia aia neitufwa tatane tenei novai tomatua ma erefisa emoa iotshi.

¹⁷Ma milow, akuso, avou keiro i arotowa pouri ma puspusi acowa neimna tira, hepe foci takou sore tshowa neimna.

¹⁸Kaia ane iotshi ra, Atua mokagi nifakairo ia rogoutu o iotshi tshana aprofeta, pe Kristo komate, aia neimna hepra.

¹⁹Ianenei, kotagi ma natshicina maganisa tshowa ma kuafe arotowa ia Atua, pe aia towaki nori maganisa tshowa, ia taha nopoge ane emna aroto erefisa kamai ia foimata o Teriki sore;

²⁰Ma aia kakowna Iesu Kristo, aia acre mokagi nikova iacowa;

²¹Aia konofo ataragi ia taha nepoge ane iothsi emna fou foci, Atua nifasao o aia ia arogoutu o iotshi tshana aprofeta erefisa ia neikamata o fanua wararonei.

²²Ma Moses tamari neitucua ia tamanoteia, Tasi aprofeta Ihova Atua tshowa katshicitshia iacowa, o tshowa anoso, hepe avau, aia acowa karogona i ane aia katucua iacowa.

²³Ma ane nei kamai, pe iotshi tagata kanatshicina fakarogona tera profeta, katowaki aia ia tshana tagata.

²⁴Keini ma iotshi aprofeta ia Samuel ma iothsi wamuri aia, acreiotshi nifasao, foci nifasao o taha anopoge tera.

²⁵Acowa ta erecriki o aprofeta, ma o afasao tapu mukei erefisa Atua neitucua ia tamanoteia, nokoutucua ia Ebraham, Ma ia erecriki tshou, tagata o iotshi fanua wararonei kamna erefisa.

²⁶Iacowa mokagi Atua neitshicitshia tshana Nontariki Iesu, nikowna aia keitufwa acowa ane iotshi erefisa, ia nokuafe acowa iotshi ia tshana maganisa.