Read Futuna-Aniwa AVERE O APOSTOLO 5 Bible Online

AVERE O APOSTOLO 5 - Futuna-Aniwa bible

AVERE O APOSTOLO 5

¹KAIA tatane tasi neigo Ananaias ia Safaira tshana inahune nifakamata tasi fanua,

²Ma nifuna faru o ta nomata, tshana inahuna foci nikeiro tera, ma aia niamai nuntafa o nomata, ma neinagi aia ia novai o ta apostolo.

³Kaia Pitrus neitucua, Ananaias, tiaha Satana nifonu tshou roto korefu ia ta Nokano Tapu, ma keifuna nuntafa mone ta nomata o ta fanua?

⁴Iotshi nopoge aia neinofo, aia tshou, mo jimra? Ma wamuri akoi nifakamata aia ia faruke, nomata tshou ana keitufwa hepe akoi acitiafakarafia, mo jimra? Tiaha akoi nimentua ane nei ia tshou roto? Akoi sekorefu ia tagata ana, kaia ia Atua.

⁵Ma Ananaias nokorogona afasao ra nito, nimate milowa, ma nimtacu sore nito ia acre iotshi neirogona ane iotshi ra.

⁶Atumtane nimasike iai, nifousia aia iai, niamo aia watafa, ma neitanumea.

⁷Itata toru our wamuri, tshana inahune, sekeiromana taha neimna, nimai efare.

⁸Pitrus neitucua iateia, koutucua iatavou pe akorua nifakamata ta fanua ia nomata ra, mo jimra? Ma aia neitucua, keini ia nomata ra.

⁹Iai Pitrus neitucua iateia, Konapecua akorua ia tishana roto neitucua keiresia ta Nokano Tapu o ta Teriki sore? Kowcitia avai o acre neitanumea tshou nunwane koitata tafeitoca, ma acre kamo akoi foci watafa.

¹⁰Iai milowa aia nito ia tshana novai, ma nimate; ma atumtane nimai efare, ma neicitia aia nimate, ma niamo aia watafa, ma neitanumea aia itata tshana nunwane.

¹¹Ma sore kumtacu nimai ia iotshi ta kalasa, ma ia iotshi tagata neirogona ane ra.

¹²¶ Ma ia norima o apostolo avere sore nalupai neimna ia tagata; ma acre iotshi neinofo ia tasi fenagaro ia nuntafa ta feitoca o Solomon.

¹³Ma o acre watafa iothsi tatane nimtacu kofano fakatapuria iacre; kaia tagatotshi nibisa acre.

¹⁴Ma tagata nifakarogrogo nifakatapuria ia Teriki sore, nalupai su fakou ma fafine.

¹⁵Ianinei acre tshicitshia tagata nimace ma amo acre watafa ia aretu ma neinage acre ia apotu ma ia afata, pe noata o Pitrus hepe aia nifano koitata nofo iluga faru o acre.

¹⁶Nalupai foci nimai ia umrai sore kofori ia Jerusalem, niarafia mai niare tagata nimace, ma acre agelo isa nitakaroia iarotorea, ma nipenena acre iotshi iai.

¹⁷¶ Nopogera ta teriki sore o tafare Ihova nimasike, ma acre iotshi neinofo ia aia (acre tagata o nuntafa Satusi), ma acre nifonu ia feimacowa,

¹⁸Ma nipurutshia acre apostolo, neinage acre ia tafare mukei o tagata.

¹⁹Kaia ta agelo o ta Teriki sore ia tupo nitshike afeitoca o ta fare mukei, ma niarafia acre efuafo ma neitucua,

²⁰Roro, kotu ia tafare o Ihova ma fakairo tagata iotshi fasao o aniamouri tenei.

²¹Wamuri acre neirogona ra, acre niroro ia tafare o Ihova ia ta popo ana ma nifakairo. Kaia ta teriki o tafare Ihova nimai, ma acre neinofo ia aia, ma nitapa fetacina takou sore fakatupu, ma iothsi takou sore neinofo fakatupu fasao o tagata o Isreil, ma nikowna ia ta fare mukei keiarafia acre.

²²Kaia afitshicou sore nimai, ma secitiamana acre ia tafare mukei, acre niromai faci, ma nifasao,

²³Nokoutucua, Ta fare mukei tamari acime neicitia afeitoca nipofna mukei erefisa, ma tagata nifatshigeia acre nikotu efuafo mokagi afeitoca; kaia acime nitshike afeitoca ma seciatiamana tatane tasi iai efare.

²⁴Wamuri ta teriki o tafare Ihova, ma tatane sore o tafare o Ihova, ma fatoriki o tafare mori neirogona ane iotshi ra, acre sekeiro ma arotorea nimy ia taha komai wamuri.

²⁵Iai tasi nimai neitucua iacre, Kowcitia fakou acowa neinagi ia tafare mukei, acre nikotu ia tafare o Ihova kofakairo tagata.

²⁶Tatane sore o takou tsha tatowa ma afitshicou sore niroro, ma niarafia ana acre spurutshia, ma acre nimtacu tagata, tshiria acre ia afatu.

²⁷Wamuri acre niarafia acre, acre neinagi acre emoa takou sore fakatupu, ma ta teriki sore o tafare Ihova nifakowia acre,

²⁸Nokoutucua, Acime neitucuasana mukei ocowa, mo jimra, pe acowa natshicina fakairo ia tenei neigo? ma kowcitia acowa neimna Jerusalem kofonu ia tshowa fakairo, ma kamintua keitucua acime neirigia toto o tatane tenei.

²⁹¶ Iai Pitrus ma iotshi apostolo neitucua, Erefia acime fakarogona afasao o Atua mokagi afasao o tagata.

³⁰Ta Atua o tamanoteia neitshicitshia Iesu, aia acowa neitshi komate ma nitouria ia tererakou.

³¹Aia Atua tshicitshia iluga ia tshana norima matou keimna aia Teriki sore ma tatane kapare, ma keitufwa kotagi ma natshicina maganisa ia tagata o Isreil, ma keitowaki nori amaganisa tshare.

³²Ma acime neicitia ma aia nikowna acime keifakairo tagata ane iotshi ra, foci ma hepe fakairo o Nokano Tapu aia Atua neitufwa acre fakarogona ma maganerefia ia tshana fasao.

³³¶ Wamuri acre neirogona ra, tshare roto, nimy sore iateia, ma acre nikeremoa keitaia acre komate.

³⁴Nopogera tasi nimasike iai i aroto o takou sore fakatupu, aia tasi Farisi neigo Cameleil tatane tera fakairo tatapuria tapu, tagatotshi neicitiafakarafia tshana magane, ma aia neitucua mukei erefia apostolo kororo papai sisi;

³⁵Ma neitucua iacre, Acowa takou o Isreil, fatshigeia tshowa magane i taha acowa nimentua emna ia takou ra.

³⁶Ma mokagi anopogera nimasike Thiutas, nokoutucua aia tatane sore tasi; itata for huntret takou niroro wamuri aia; neitshi komate; ma iotshi o acre neirogona tshana fasao nifura, ma senofo ia ane.

³⁷Wamuri tatane ra nimasike Jutas i anopoge ra o serea neigo tagatotshi ia nokotufwa mone, aia nitorotshi tagata nalupai wamuri aia; aia foci nimate; ma iotshi, o acre neirogona tshana fasao, nifura.

³⁸Ma milou avou koutucua iacowa, Natshicina takou ra, ma seneitucuasana acre; ma pe fakairo nei mo vere nei komai o tagata, aia sekonofo;

³⁹Kaia pe aia tavere o Atua, acowa setakaroiai aia, mo acowa kacitia acowa kofiatu Atua.

⁴⁰Acre neirogona tshana fasao; ma wamuri acre neitapa acre apostolo, ma neitshi acre ia toura, acre neitucuasana mukei acre keifasao ia neigo o Iesu, ma nikownace acre.

⁴¹Acre nifeke emoa tagata fakatupu, nokobisa acre erefia keimna koma ia tshare acitiafakarafia o tshana neigo.

⁴²Ma nopoge ma nopoge ia tafare o Ihova, ma ia afare iotshi acre segapu keifakairo ma kova Iesu Kristo.