Read Futuna-Aniwa AVERE O APOSTOLO 8 Bible Online

AVERE O APOSTOLO 8 - Futuna-Aniwa bible

AVERE O APOSTOLO 8

¹MA Saulo neitucua erefia aia komate. Ma i anopogira nisewa sore ia feimacowa ta kalasia neinofo ia Jerusalem; ma acre nifura papai ia fanua iotshi o Juteia, ma Samaria, kaia apostolo ana neinofo mukei.

²Ma takou nimori erefia niamo Stifanus neitanumea aia, ma nitagi nimakuru sore iateia.

³Kaia Saulo, aia takaroiai isa tagata o ta Kalasia, nokofano efare iotshi, ma nikotorotshi efuafo fakou ma fafine neinage acre ia ta fare mukei.

⁴Ianinei acre nifura papa niroro ia fanua iotshi nokova ta fasao erefia.

⁵Nopogera Filipus nifano in umrai sore Samaria, ma nikova Kristo iacre iai.

⁶Ma tagatotshi iai ia fenagaro tishana neirogona erefia afasao Filipus neitucua, nokorogona ma nokoucitia avere sore aia neimna.

⁷Ma agelo isa, nokotapa ia norio palo, nimai watafa tagata nalupai acre neinofo mokagi iacre; ma nalupai tagata amaci o tapalse, ma acre nisape, neipenpene erefia.

⁸Ma nibisa sore neinofo ia umrai sore ra.

⁹Kaia tasi tatane iai neigo Saimona, aia mokagi ia tumrai tera neimna magane o tafegeitu, ma niarasia tagata o Samaria ia tarahu ma, neitucua iacre aia ta tane sore tasi;

¹⁰Acre iotshi tagata sisi ma sore iai, neirogona aia, nokoutucua, Tatane tenei kotomatua sore o Atua.

¹¹Acre nimtacu aia, ianenei, atou ma tou nalupai ituai aia neiarasia acre ia ta fegeitu.

¹²Kaia wamuri acre neirogrogo Filipus nokova ania mane o tavaka o Atua, ma ta neigo o Iesu Kristo, acre niamo ta baptiso fakou ma fafine.

¹³Nopoge ra Saimona ma nifakarogrogo, ma wamuri nibaptiso aia, aia neinofo ia Filipus, ma nimasaro, nokowcitia avere sore ma ania mane aia neimna.

¹⁴Wamuri ra apostolo neinofo ia Jerusalem neirogona pe Samaria niamo ta fasao o Atua, acre nikowna iacre Pitrus ma Joanes;

¹⁵Acrawa, wamuri acrawa niteifo iai, nimori ia acre, pe keitufwa iacre ta Nokano Tapu;

¹⁶Ma mokagi nopoge ra aia sekofanifo ia tasi o acre; acre ana nibaptiso ia neigo o ta Teriki sore Iesu.

¹⁷Wamuri ra acratou neinagi tsharatou arima iluga acre, ma acre niamo ta Nokano Tapu.

¹⁸Wamuri Saimona neicitia apostolo neinagi tshare arima iluga tagata ta Nokano Tapu neitufwa iacre, aia neitucua keitufwa iacrawa mone.

¹⁹Nokoutucua, Tufwa avou foci ma tomatua tenei, pe avou nagi tshaku norima iluga tagata keitufwa iacre ta Nokano Tapu.

²⁰Kaia Pitrus neitucua iateia, Tshou mone takaroiai ia akoi, ianenei akoi nimentua pe karofa Atua tufwa kafakamata ia mone.

²¹Akoi seamo nuntafa ma sekeiromana tenei; ma tshou roto safi emoa Atua.

²²Ianenei kotagi ma kuafi tshou roto ia tenei maganisa tshou, ma mori Atua, pe nimentua nei o tshou roto, aia seioria iatakoi.

²³Ma avou kowcitia pe akoi milownei ma konofa ia noau o akona, ma ia nifousia o amaganisa.

²⁴Wamiri ra Saimona nifasao, ma neitucua, Mori acoutou ia ta Teriki sore ma avou, pe jimra tasi ane o acre iotshi acoutou nakatucua komai iatavou.

²⁵Ma acrawa, wamuri acrawa nifakairo ma nikova ta fasao o Teriki sore, nikuafe niromai foci ia Jerusalem, ma nikova afasao erefia ia umrai sisi nalupai o tagata o Sameria.

²⁶Ma agelo o Teriki sore nifasao ia Filipus, nokoutucua, Masike, ma fano ia uritoga ia teretu niteifo ia Jerusalem ia Cesa, aia tugogou.

²⁷Aia nimasike nifano; ma neicitia, tasi tatane o Ithiopia, tasi iunoka erefisa ma sore fitshicou o Kantise fine riki sore o tagata o Ithiopia, aia ta fitshicou niamo neicitia erefia amone ma anea mane erefisa tshana, aia nifano ia Jerusalem nimori iai,

²⁸Aia nikuafe mo nokofano ia fanua tshana, aia neikoike ia tshana ane nitere ia teretu, ma nitawa tatapuria o Aisaia ta profeta.

²⁹Iai ta Nokano Tapu neitucua ia Filipus, Fano itata, ma fasao ia tenei ane nokotere ia teretu.

³⁰Filipus nitere iateia, ma neirogona aia tawa tatapuria o Aisaia ta profeta, ma neitucua, Akoi keiro nokano o tatapuria akoi tawa, mo jimra?

³¹Ma aia neitucua, Avou taru iateia pe tasi seasitu avou? Ma aia nifakowia Filipus komai iluga ma koike ia aia.

³²Ta nuntafa o tatapuria tapu aia nitawa tenei, Aia acre niarafia hepe ta sip ia ta kotshi aia komate, ma hepe ta lam tano emoa tagata tasei fouru, hepe aia sefakamama tshana rogoutu.

³³Ia nopogera acre nipurutshia aia, tshana ioria niamke, ma akai katucua tshana tagata? Ma tshana aniamouri niamke ia fanua wararonei.

³⁴Ma tatane sore nifasao Filipus, ma neitucua, Avou fakowia akoi, o akai ta profita nifasao tenei? o aia ana, mo o tatane sece?

³⁵Iai Filipus nifakamama tshana rogoutu, ma neikamata ia tatapuria tapu tenei, ma nikova iateia Iesu.

³⁶Ma hepe acrawa niroro ia taretu, acrawa niromai ia tavai tasi, ma ta tane sore neitucua, Kowcitia tavai icunei; taha neitucuasana keibaptiso avou?

³⁷Ma Filipus neitucua, pe akoi fakarogrogo ia iotshi tshou roto, erefia iatakoi. Ma aia nifasao neitucua, Avou fakarogrogo pe Iesu Kristo ta Nontariki o Atua.

³⁸Ma aia neitucua mukei ane nitere ia teretu kotu; ma acrawa niroro ia tavai, Filipos ma ta tane sore; ma aia nibaptiso aia.

³⁹Wamuri acrawa nifitshi ia tavai, ta Nakano o Teriki sore niamke Filipus, pe ta tane sore secitiamana aia foci; ma aia nifano ia tshana retu nokobisa.

⁴⁰Kaia Filipus acre neicitia ia fanua Asotus; ma nokofano iai aia nikova ia umrai sore iotshi, ia nopogera aia nimai ia Sisaria.