Read Futuna-Aniwa AVERE O APOSTOLO 9 Bible Online

AVERE O APOSTOLO 9 - Futuna-Aniwa bible

AVERE O APOSTOLO 9

¹MA Saulo, segapu neiseciria ma neitucua erefia katatai komate takou mori nifakairo o ta Teriki sore, aia nifano ia teriki sore o tafare mori,

²Ma nogia aia keiserea tatapuria ia takou sore o afare mori ia Tamaskus, pe aia kacitia faru o mori tenei, pe acre fakou mo fafine, aia karafia acre fousia ia Jerusalem.

³Ma hepe aia nifano, aia nimai itata Tamaskus, ma milowa noneate nifori aia o ta merama ia taragi;

⁴Aia nito ia takere, ma neirogona ta norio neitucua iateia, Saulo, Saulo, tiaha akoi kosewa avou?

⁵Ma aia neitucua, Akai akoi, Teriki sore? Ma ta Teriki sore neitucua, Avou Iesu aia akoi kosewa; ane mukei akoi tucia anea taro.

⁶Ma aia nokovirviri ma nimasaro neitucua, Teriki sore, taha akoi acitiafakarafia avou kamna? Ma ta Teriki sore neitucua iateia, Masike ma fano ia umrai sore, ma iai kafakairo akoi taha akoi kamna.

⁷Ma takou niroro ia aia nikotu sefasao, nokorogona ta norio, kaia sekowcitia tasi ta tane.

⁸Ma Saulo nimasike ia takere; ma wamuri tshana foimata kuara, aia secitia mana tasi tane; kaia acre nipurutshia tshana norima ma niarafia aia ia Tamaskus.

⁹Ma aia iai nopoge toru foimata pouri sa, ma aia sekai ma senumea.

¹⁰¶ Ma tasi tane nifakairo neinofo iai ia Tamaskus, neigo Ananaias; ma Teriki sore neitucua iateia ia ane neicitia hepe ta mitshi, Ananaias, Ma aia neitucua, Kowcitia, Avou icunei, Teriki sore.

¹¹Ma Teriki sore neitucua iateia, Masike ma fano ia teretu o umrai neitapa neigo Totonu, ma fakowia acre ia tafare o Jutas, ma tasi iai nitapa neigo Saulo o Tarsus; ma, kowcitia, aia komori.

¹²Ma nakacitia i ane hepe ta mitshi, ta tane tasi neigo Ananaias nokomai efare, ma nagi tshana norima iluga aia, pe aia kamo tshana foimata kuara merama.

¹³Iai Ananaias nifasao, Teriki sore, Avou neirogona afasao o tagata nalupai o tatane nei, ma ane isa sore aia neimna ia tshou tagata mori erefia ia Jerusalem;

¹⁴Ma icunei aia nakamo tatapuria o fatoriki o tafare mori keifousia iotshi tagata, pe acre kotapa mori tshou neigo.

¹⁵Kaia ta Teriki sore neitucua iateia, Fano tshou teretu, ma aia tasi taganea kamate iatavou, keitucua tshaku neigo emoa tagata o fanua pouri, ma fatoriki, ma tagata o Isreil.

¹⁶Ma avou kafakairo aia anea mane sore aia kamy iateia ia tshana acitiafakarafia o tshaku neigo.

¹⁷Ma Ananaias nifano tshana retu, ma nifano efare, nokonagi tshana norima iluga aia neitucua, Noso Saulo, ta Teriki sore, Iesu, aia akoi neicitia ia teretu hepe akoi nimai, nikowna avou, pe tshou foimata kuara merama, ma akoi kofonu ia Nokano Tapu.

¹⁸Ma milowa nito ia tshana foimata ane hepe anounafi; ma milowa aia neicitia erefia, ma nimasike, ma nibaptiso aia.

¹⁹Ma wamuri aia nikeina takai aia nitomatua. Wamuri ra Saulo neinofo faru nopoge ia tagata nifakairo ia Tamaskus.

²⁰Ma milowa aia nikova Kristo ia afare mori, pe aia ta Nontariki o Atua.

²¹Kaia acre iotshi neirogona aia nimasaro, ma neitucua; Aia mo jimra pe nisewa iotshi tagata nitapa mori neigo tenei ia Jerusalem, ma nimai keimna magane ra, pe aia arafia acre nifousia ia fatoriki o ta mori?

²²Kaia Saulo niamo fakasore tomatua, neimna keimasaro sore tagata Juteia neinofo ia Tamaskus, nokofakairo mukei pe tenei ta mari ta Kristo.

²³¶ Wamuri anopoge nalupai nisiri, tagata Juteia nifakatupu keitshi aia komate;

²⁴Kaia tshare nokomotshi iateia Saulo nikeiro, ma acre nifatshigeia afeipa tiau ma tupo keitshi aia komate.

²⁵Iai tagata nifakairo ta mori niamo aia ia tupo, ma nitucutukeina aia ia ta kato watafa tapai sore nifori umrai.

²⁶Ma nopoge ra Saulo nimai ia Jerusalem, aia nimentua fano ia tagata nifakairo ta mori; kaia acre iotshi nimtacu aia, ma sefakarogrogo aia tasi o acre fakairo ta mori.

²⁷Kaia Barnabas niamo aia, ma niarafia aia ia apostolo, ma neitucua mukei iacre pe aia neicitia ta Teriki sore ia teretu, ma pe aia nifasao aia, ma pe aia sumtacu nikova ia Tamaskus ia neigo o Iesu.

²⁸Ma aia neinofo iacre nokomai efare mo nokofano efuafo ia Jerusalem.

²⁹Ma aia nifasao sumtacu ia neigo o ta Teriki sore Iesu, ma nifiatu afasao o tagata Crisi; kaia acre nitakaro kofori kotshi aia komate.

³⁰Wamuri anoso nikeiro anera, acre niarafia aia ia Sesaria, ma nikowna aia ia Tarsus.

³¹Nopogera akalasia nigapu ia iotshi fanua Juteia, ma Calili, ma Sameria, ma acre nifakairo acre; ma niroro ia kumtacu o Teriki sore, ma ia kabisa o Nokano tapu, ma nifakatapuria tagata nalupai iacre.

³²¶ Ane nei nimai, hepe Pitrus nifano ia iotshi nuntafa o fanua, aia niteifo ia tagata mori erefia neinofo ia Lita.

³³Iai aia neicitia tatane tasi neitapa neigo Inias, aia nimoy mukei ia tshana potu atou varu, nimace o ta palse.

³⁴Ma Pitrus neitucua iateia, Inias, Iesu Kristo imna akoi tomatua; masike, ferekia tshou potu. Ma aia nimasike milowa.

³⁵Ma iotshi tagata neinofo ia Lita ma Seron neicitia aia, ma kuafe ia Teriki sore.

³⁶¶ Nopoge ra neinofo ia Jopa tasi tagata mori nitapa neigo Tabitha, nokano neigo nei Torkas; tafine nei nifonu o avere erefia, ma karofa tshana ia tagata niare ane jimra.

³⁷Ane nei nimai i anopoge ra, pe aia nimace, ma nimate; wamuri acre nikoukou aia, acre neinagi aia ia tarotopa iluga efare.

³⁸Ianenei Lita koitata Jopa, ma tagata mori neirogona Pitrus iai, acre nikowna iateia tatane erua, nifakowia aia komai milowa iacre.

³⁹Iai Pitrus nimasike nifano ia acrawa. Wamuri aia nimai, acre niarafia aia ta tarotopa efare iluga, ma iotshi afine neinofo ana tshare nunwane nimate kotu itata aia nokotagi, ma niamo aia neicitia asigi ma umega Torkas neimna iacre anopoge ra neinofo iacre.

⁴⁰Kaia Pitrus neisegeake acre efuafo, ma nifakaturia enturi, ma nimori; nitafuri aia ia ta noaga neitucua, Tabitha, masike, Ma aia kuara tshana foimata, ma wamuri aia neicitia Pitrus aia niasike ma neinofo.

⁴¹Ma aia neitufwa aia tshana norima, ma neitshicitshia aia, ma wamuri aia neitapa tagata mori, ma afine tshare nunwane nimate, aia neitufwa aia komouri iacre.

⁴²Tagata neirogona ane nei kofori iotshi fanua Jopa, ma nalupai nifakarogrogo ta Teriki sore.

⁴³Ane nei nimai aia neinofo nopoge nalupai ia Jopa ia tasi Saimona tshana vere neipenpena nokiri kurimatou.