Read Futuna-Aniwa ROMANIS, 1 Bible Online

ROMANIS, 1 - Futuna-Aniwa bible

ROMANIS, 1

¹PAULO tasi festhicou o Iesu Kristo, neitapa ia ta vere o ta apostolo, nivaia ia tafasao erefia o Atua,

²Aia nifatshipoge ia niana aprofeta ia tatapuria tapu acre neiserea,

³Ia tshana nontariki Iesu Kristo nifarere o tagata o Tevit ia ta konouri.

⁴Aia neitapa ta Nontariki o Atua ia tomatua, ia ta nokano tapu, ia ta masike ia tagata nimate; aia Iesu Kristo tshote Teriki.

⁵Ia aia neitufwa acime ta karofa ma avere o ta apostolo, ma maganerefia ia ta fakarogrogo ia iafanua iotshi ia tshana neigo;

⁶Ia acre acoua foci ma, neitapa o Iesu Kristo;

⁷Ia acoua iotshi nokonofo ia Roma, neicitiafakarafia o Atua, neitapa keinofo tagata o Iesu; karofa iacoua ma merino o Atua Tamanoteia, ma ta Teriki Iesu Kristo.

⁸Mokagi, Avou thank tshaku Atua ia Iesu Kristo ma acoua iotshi, ianenei niaua fakarogrogo kofasao iateia iafanua iotshi wararonei.

⁹Ma Atua keiro tshaku roto, aia avou vere iateia ia nokano ia ta fasao erefia o tshana nontariki, pe avou segapu mori aia ia acoua nopoge ma nopoge ia tshaku mori;

¹⁰Nokonogia aia, pe milounei Atua acitiafakarafia avou komai erefia totonu iacoua.

¹¹Ma avou acitiafakarafia sore keicitia acoua, pe avou katufwa iacoua tasi ane erefia o ta Nokano, keimna acoua nofo mukei;

¹²Ianenei, pe kuroto ma acoua kabisa ia ta fakarogrogo o acoua ma o avou.

¹³Ma melou erefia acoua keiro anoso, pe ia nopoge nalupai avou acitiafakarafia keimai iacoua, kaia anopoge jimra iateia, pe avou nakamo faru nofua o acoua ma, hepe ia fanua foci o tagata pouri.

¹⁴Avou nifakairo tagata o Crisi ma fakou pouri, acre arapakou ma acre searapakou.

¹⁵Hepe ma ia iotshi tshaku tomatua, avou komai melou keikova ta fasao erefia ia acoua konofo Roma ma.

¹⁶Ma avou sekoma o ta fasao erefia o Iesu Kristo, ma aia ta tomatua o Atua keipenpena ia aneamouri acreiotshi fakarogrogo; ia tagata o Juteia mokagi, hepe ma ia fakou Crisi.

¹⁷Ma i aia kofakairo tagata ta magane totonu o Atua ia fakarogrogo ia fakorogrogo, hepe aia koserea, acre magane totonu kamouri ia fakarogrogo.

¹⁸Ma ta fakainina o Atua kafakairo ia taragi tshana fakanina ia iotshi serogona ma semaganerefia ia tshanafasao o tagata, acre purutshia ta fasao Mari ia aroto maganisa;

¹⁹Ianenei ane iotshi nikeiro o Atua koucitua ia acre, ma Atua nakamata aia acre.

²⁰Ma anea mane o aia secitiamana wamuri aia neimna iafanua wararonei tagata nakacitia, ia anea aia neimna, tshana tomatua sore ma Atua sore atou ma tou, pe acre sekoutucua acre sekeiro.

²¹Ianenei i anipoge acre nikeiro Atua, acre sekabisa i aia hepe Atua, ma semori iateia, kaia niare fenagaro nimai mama isa, ma niare aroto koukali neinofo ia apouri.

²²Acre neitucua acre arapakou, kaia acre neinofo koukali,

²³Ma nitafuri ta sore o ta setafuri Atua ia ta noata tetua hepe noaga o ta nokofuri tane, ma hepe amanu, ma aneiro, ma ane kotoro.

²⁴Ianenei Atua neinatshicina acre ia niare amaganisa keiremu i arotorea, ia niare amaganisa keiiauiai notshinorea ia acre.

²⁵Acre nitafuri ta Mari o Atua ia niare korefu, ma nimori ma niavere ia ane acre neimna sore kage aia neimna ane iotshi, aia erefisa atou ma tou. Amen.

²⁶Ia anera Atua natshicina acre ia fenagarore, isa, ma niare afine nifuri amaganerefia ia amaganisa iacre.

²⁷Ma foci niare fakou, neinatshicina niare afine, ma nikoura ia niare fenagaro ia maganisa tasi ia tasi foci, tatane ia tatane ia maganisa, ma nakamo ia anotshinorea ta ioria o niare amaganisa.

²⁸Hepe acre neifeimacoua keiro ma mentua Atua ia niare arapakou, Atua natshicina acre ia fenagarore, isa, keimna niare amaganisa.

²⁹Arotorea nokofonu ia iotshi amaganisa, tshigo fafine ma fakou tsha faruke, ane isa iotshi, keiremu anea tsha faruke, korefu, nifonu o feimacoua, kaia mate tagata, fiatu, karasia, sewa, fasao sisi isa,

³⁰Nokofasosa o tagata wamuri acre roro, acre feimacoua Atua, arotorea sore, karasia, afasao o niare magane sore, nokorefu isa, serogona afasao o tamanorea,

³¹Acre koukali, korefu ia rakamna morea, secitiafakarafia niare tagata, arotorea mukei isa, ma sealofa tagata.

³²Acre nokeiro ta ioria o Atua, pe acre maganisa hepra nofo ia ioria o ta mate, semagane hepra ana, kaia kabisa ia acre emna maganisara.