Read Futuna-Aniwa ROMANIS, 10 Bible Online

ROMANIS, 10 - Futuna-Aniwa bible

ROMANIS, 10

¹AKUSO, kuroto acitiafakarafia ma mori Atua ia tagata Isreil ko, pe aia kapare acre ia amouri.

²Ma avou koutucua tamari acre tomatua ia avere o Atua, kaia jimra hepe tshana fakairo.

³Ma acre sekeiro ta ioria totonu o Atua, ma nokororo keimna niare magane totonu ia ioria, acre seamo ta ioria erefia totonu o Atua.

⁴Ma Kristo ko ta nofatshicega o tafasao tapu ia acre iotshi pe fakarogrogo.

⁵Ma Moses neisereace ta magane totonu aia ko o tafasao tapu, Pe tatane emna ane iotshira kamouri ia acre.

⁶Kaia ta magane aia ko o fakarogrogo kofasao hepe nei, Sekoutucua ia tshou roto, Akai kanace iluga ia taragi? pe keiarafiamai Kristo ia taragi.

⁷Mo akai kafanifo iraro keiarafia Kristo iluga ia tagata nimate?

⁸Kaia taha aia koutucua? Tafasao tapu koitata akoi, ia tshou rogouta ma ia tshou roto, aia tafasao o fakarogrogo, aia acime kova.

⁹Pe akoi katucua ia tshou rogoutu tamari ta Teriki Iesu, ma kafakarogrogo ia tshou roto pe Atua nakatshicitshiakace aia ia acre nimate, aia kapare akoi.

¹⁰Ma ia ta roto tagata fakarogrogo ia maganerefia totonu, ma ia ta rogoutu afasao koutucua ia anea mouri.

¹¹Ma afasao tapu neiserea koutucua, acreiotshi fakarogrogo aia sekanofo koma.

¹²Ma hepe tasi ia aia ko tagata o Juteia ma o Crisi, ma ta tasi ana Teriki ko iluga iotshi, ma alofa acre iotshi pe tapa mori ia aia.

¹³Kaia acre iotshi katapa ia ta neigo o ta Teriki sore nakapere aia ia aneamouri.

¹⁴Konapecua acre katapa ia aia acre sefakarogrogo? Ma pecua acre kafarogona ia aia o aia sefakarogona? Ma pecua acre fakarogona pe tasi sekova iacre?

¹⁵Ma pecua acre kakova pe acre sekounace iateia? hepe aia ko sereace. Erefisa kagi avaiore o acre kova afasao erefia o merino, ma arafia mai afasao erefia o anea erefia.

¹⁶Kaia acre iotshi sefakarogrogo ta fasao erefia. Ma Aisea neitucua, Teriki akai nafakarogrogo tshote fasao?

¹⁷Hepera ma fakarogrogo komai ia ta fakarogona, ma ta fakarogona ia ta fasao o Atua.

¹⁸Kaia avou koutucua, Acre serogona mo? Keini tamari, niare noreo niroro ia fanua iotshi, ma niare afasao niroro ia ta noporpore o iafanua.

¹⁹Kaia avou koutucua, Isreil sekeiromana mo? Ma Moses koutucua, avou fakairo acoua avere erefia ia acre senofo tomatua tagata, ma ia tagata o fanua searapakou avou emna acou fakainina.

²⁰Kaia Aisea ko tomatua sore ia fasao, ma koutucua, acre nakamo avou pe sefatshigeia avou, avou acre neicitia pe sefakouia muri avou.

²¹Kaia ia tagata o Isreil aia neitucua, Iotshi nopoge palo avou nakafakatonusia tshaku anorima ia tagata seamo tshaku fasao, ma nokofiatu.