Read Futuna-Aniwa ROMANIS, 11 Bible Online

ROMANIS, 11 - Futuna-Aniwa bible

ROMANIS, 11

¹AVOU koutucua, Tiaha Atua nakatouwaki tshana tagata? Atua neitucuasana ra. Ma avou foci tasi tane o Isreil, o ta tagata o Ebraham, o nontafa tagata o Benjamin.

²Atua setowaki niana tagata aia nikeiro mokagi, sekeiro acoua taha ta tatapuria tapu neisereace i Ilaija? Aia nimori Atua nifeimacoua magane o tagata o Isreil, nokoutucua,

³Teriki sore, acre nitaia mate tshou aprofeta, ma nitakaroiai tshou afata, ma avou ana nofo, ma acre kofatshigeia avou keitaia avou mate.

⁴Kaia taha ta fasao o Atua neitucua iateia? Avou nakapare iatavou fitu thousant fakou ia Isreil acre sefakaturia ta nonturi keimori ia Bel.

⁵Hepe ma ia nopoge nei, faru toru ana nofo hepe mokagi nei ia tshana karofa.

⁶Ma pe komai o ta karofa, aia kojimra o avere, mo karofa wamuri nei kojimra karofa. Kaia pe aia komai o avere, aia ko jimra o ta karofa; mo avere kojimra avere.

⁷Taha wamurira? Isreil seamo ane acre fakasara, kaia acre neinagi mokagi iateia nakamo aia, ma acre iotshi foci nofo ia aroto pouri.

⁸Hepe aia neisereace, Atua nakatufwa iacre ta nokano o komero, afoimatorea pe acre secitiamana, ma ataregorea pe acre serogona, ia nopoge nei ma.

⁹Ma Tevit neitucua, Erefia niare afata keimna iacre hepe tasi, ma tarafoi, ma ta ane tshipatshipa, ma ta ioria iacre;

¹⁰Erefia niare foimata kopouri, pe acre secitiamana, ma komomoi niare nopua atou ma atou.

¹¹Avou koutucua, acre natshipatshipa pe acre koto mo? Atua neitucuasanara; kaia ia niare nito kapare ia anea mouri komai ia tagata o fanua pouri, keinokosagsaga acre ia koireiro.

¹²Ma pe niare nito tufwa aneamane erefia iafanua wararonei, ma niare touwaki keitufwa aneamane erefia ia tagata o fanua pouri; sore kagi niare afonu.

¹³Ma avou koutucua ia acoua tagata o fanua pouri, ianenei avou ta apostolo o tagata iafanua pouri, avou kabisa ia tshaku vere.

¹⁴Pe ia avere ra avou nokosagsaga acre fakarogrogo amo ta mori acre niaku tagata, ma arafia faru o acre ia aneamouri.

¹⁵Ma pe ta nokotouwaki o acre ko arafia ia aia ta iafanua, taha ta nokoarafia o acre ia Iesu, kaia anea mouri komai ia acre nimate?

¹⁶Ma pe ta kofeigota nohua ko tapu erefia, iotshi wamuri ko tapu erefia, ma pe ta noaka ko tapu erefia hepe ma ko ta anora.

¹⁷Ma pe faru o anora ko eifatshice, ma akoi hepe tasi mouku oliv terarakou, kofatshia iacre, ma ia acre amo tomatua ia ta toto o ta oliv terarakou.

¹⁸Sefasao keifiatu ta anora, kaia pe ako fasao sore, akoi setufwa tomatua ia ta noaka, kaia ta noaka tufwa akoi tomatua.

¹⁹Akoi fasao ma anora eifatshice, pe keifutshia avou iateia.

²⁰Tamari ia niare sefakarogrogo acre nifatshice, ma akoi kotu ia ta fakarogrogo. Seamo fenagaroua sore mama kaia nofo ia kumtacu.

²¹Ma pe Atua senatshicina niare anora, fatshigeia ma kumtacu pe aia foci touwaki akoi.

²²Ianenei koucitia ta maganerefia ma ioria totonu o Atua; ia acre nito, ioria sore; kaia iatakoi anea erefisa pe akoi natshicina, aia foci kasawace akoi.

²³Ma acre foci, pe acre senofo ia sefakarogrogo, aia kafuka acre foci, ma Atua ko tomatua keifuka acre foci.

²⁴Ma pe nitoutshiace akoi ia ta oliv mouku o tagarakou, ma nifuka akoi ia ta erefisa oliv terarakou, sore kage acre niana anora, kafuka, foci ia niare oliv terarakou?

²⁵Ma anoso avou secitiafakarafia acoua sekeiro tenei ane mune, pe acoua sekabisa ia niaua arapakou; pe kofu nofo ia arotorea o tagata o Isreil, ia taha nopoge tagata o fanua pouri komai ia aia.

²⁶Ma wamurira iotshi tagata o Isreil kapare ia anea mouri; hepe neisereace, Taha nopoge kamai ia Saion ta kapare, ma aia kounace amaganisa ia tagata o Jekob.

²⁷Ma tenei tshaku fasao mukei iacre, ia taha nopoge avou kamke niare amaganisa.

²⁸Ia tafasao erefisa o Iesu, acre feimacoua aia ia acoua, kaia ia acre aia mokagi neinagi iateia, acre nofo acitiafakarafia ia tamanore.

²⁹Ma ta akarofa, ma ta nokotapa o Atua aia seamke.

³⁰Ma hepe acoua ituai sefakarogrogo ia Atua, kaia melou nakamo ta karofa, ia niare sefakarogrogo;

³¹Hepera ma acre melou sefakarogrogo, pe ia ta karofa o acoua acre foci ma nakamo ta karofa.

³²Ma Atua nipofna iotshi ia niare sefakarogrogo, pe aia nakarofa acre iotshi.

³³Kaia ko sore ta outa o karofa ma o ta arapakou o Atua! akai, keiro iotshi o tshana ioria, ma tshana aretu tagata sekeiro.

³⁴Ma akai nakeiro ta fenagaro o Ihova? Mo akoi nakanofo nifakairo aia?

³⁵Mo akai mokagi nakatufwa aia ane, ma ta ane ra katufwa aia foci?

³⁶Ma o aia, ma ia aia, ma iateia, anea iotshi konofo, ia aia keitufwa ta sore atou ma tou. Amen.