Read Futuna-Aniwa ROMANIS, 15 Bible Online

ROMANIS, 15 - Futuna-Aniwa bible

ROMANIS, 15

¹ACITIA pe tomatua, erefia acitia asitu acre taru, ma jimra ia anea acitia ana acitiafakarafia.

²Erefisa acitiotshi asitu ma emna kabisa tshana faruke ia ane erefia ma emna aia arapakou.

³Kaia Kristo seemna ana aia acitiafakarafia, kaia hepe aia ko neiserea, Ta saciria o acre nisaciria nito iluga avou.

⁴Ma ane iotshi neiserea ituai, aia neiserea keifakairo acitia, pe acitia ia nokotawa ma kabisa ia tafasao tapu neiserea nakamo nanacina.

⁵Melou ta Atua o aroto merino ma kabisa tufwa acoua keiamo fenagaroua tishana tasi ia tasi foci hepe fakairo o Kristo Iesu;

⁶Pe acoua ia tasi fenagaro ma tasi rogoutu kabisa ia Atua, aia ta mana o tshote Teriki Iesu Kristo.

⁷Ianenei acoua arafia acoua, hepe Kristo niarafia acitia ia ta sore kabisa o Atua.

⁸Ma avou koutucua, pe Iesu Kristo neimna avere o ta segeakage ia ta mari o Atua, keimna mukei ta afatshipoge neitufwa ia ta mana.

⁹Ma pe tagata o iafanua pouri nakabisa ia Atua ia tshana karofa, Hepe aia neiserea, Ianenei avou kafasao ia amori iatakoi mokagi tagata o fanua pouri, ma feke tagaro ia tshou neigo.

¹⁰Ma foci aia neitucua, kabisa acoua tagata o fanua pouri, ia tshana tagata.

¹¹Ma foci, Feke tagaro ia ta Teriki, iotshi tagata o iafanua pouri; ma kabisa ia aia acoua iotshi tagata.

¹²Ma foci, Aisea koutucua, tasi noaka o Jesu kanofo, ma aia kamasike ma kanofo ta teriki o tagata o fanua pouri, ia aia tagata o iafanua pouri kafakarogrogo.

¹³Melou ta Atua o iotshi nanacina emna fonu arotoua ia iotshi kabisa ma merino ia nokofakarogrogo, pe acoua nakamo tomatua ia nanacina, ia ta tomatua ta Nokano Tapu.

¹⁴Ma avou foci keiro mari tomatua o acoua, akuso, pe acoua foci kofonu o amaganerefia, nifonu ia iotshi arapakou, tomatua ma keifakairo ma tucuasana tasi ma sece o acoua.

¹⁵Kaia anoso, avou nakaserea tomatua iacoua hepe nei, keisitu acoua keimentua, ia ta karofa kotufwa avou ia Atua.

¹⁶Pe avou konofo ta fetshicu kouna ia Iesu Kristo keikova ia tagata o iafanua pouri, nokotufwa iacre ta fasao erefia o Atua, pe ta nokotufwa aia tagata o iafanua pouri aia amo, acre neipenpena ia ta Nokano Tapu.

¹⁷Ianei avou nakamo ane keibisa iateia ia Iesu Kristo ia ane iotshi tsha Atua.

¹⁸Ma avou kumtacu keifasao o ane iotshi ra Kristo severe ia avou, keimna tagata o iafanua pouri maganerefia, ia afasao ma avere.

¹⁹Ia nalupai anea tomatua sore ma masaro iateia, ia ta tomatua o ta Nokano Tapu o Atua; ma nifeke Jerusalem ma nokofori ia Ilirikum avou nakova iotshi afasao tapu erefia o Kristo.

²⁰Keini ia tomatua avou keikova ta fasao erefia. Jimra ia ta none wehe acre keiro amori o Kristo, pe avou sekavere ia avere o tasi foci tane nagi tave mori.

²¹Kaia hepe neisereace, ia acre sefakarogona o aia acre kacitia, ma acre sefakarogona kakeiro.

²²I ane nei ma, nipofna tshaku nokomai ia acoua.

²³Kaia melou none foci senofo ecunei ia aia avou sekova tafasao erefia, ma nakacitiafakarafia atou nalupai keimai iacoua.

²⁴Ia taha nopoge avou komai ia Spain, avou komai foci iacoua, ma avou acitiafakarafia keicitia acoua ia tshaku aretu, ma keiarafia ia tshaku aretu ia acoua, pe mokagi avou nifonu ia niawa fasao ma.

²⁵Kaia melou avou fano ia Jerusalem keitufwa karofa ia tagata o Iesu.

²⁶Ma tagata o Masitonia ma Akaia nifetacina niare mone keitufwa tagata o Iesu niare ane jimra nokonofo Jerusalem.

²⁷Ma tamari acre kabisa iateia, ma acre tufwa ana, ma pe tagata o iafanua pouri nakamo faru o niare afakairo tapu, erefia acre tufwa acre faru o niare arofa o iafanua wararonei.

²⁸Iananei wamuri kurava tshaku avere nei, ma nakatufwa iacre tenei nofua, avou komai iacoua ia Spain.

²⁹Ma avou keiro mari, ia taha nopoge avou komai iacoua, avou kamai ia ta kofonu o ta arofa o ta fasao erefia o Kristo.

³⁰Melou avou fakouia mukei acoua anoso, ia acitiafarafia o ta Teriki Iesu Kristo, ma ia acitiafakarafia o ta Nokano Tapu, pe acoua asitu avou ia ta mori mukei niaua ia Atua keisitu Avou.

³¹Pe aia kapare avou ia acre sefakarogrogo ia Juteia, ma pe tshaku avere ia Jerusalem, tagata o Iesu nakamo ia kabisa.

³²Pe avou nakamai iacoua ia ta kabisa i afenagaro o Atua, pe avou nakabisa ia acoua.

³³Melou ta Atua o merino keinofo ia acoua iotshi. Amen.