Read Futuna-Aniwa ROMANIS, 16 Bible Online

ROMANIS, 16 - Futuna-Aniwa bible

ROMANIS, 16

¹ACOUA maganerefia ia Fibe tshote kave, aia tasi fetshicou o ta kalasia nofo ia Sinshria;

²Pe acoua arafia aia ia ta Teriki, hepe magane o tagata o Iesu, ma pe acoua asitu aia tshana vere aia fakouia acoua iateia, ma aia neiasitu nalupai, ma avou.

³Alofa ia Prisila ma Akuila, acraua asitu avou ia Kristo Iesu.

⁴Acraua keipare tshaku aneamouri ia neinagi tsharawa nupenaua, ia acraua jimra avou ana tufwa athank, kaia foci ma iotshi akalasia o tagata o iafanua pouri.

⁵Ma foci alofa ta akalasia konofo ia niaraua fare. Alofa Epenitus tshaku nakacitiafakarafia, aia ko ta neikamata o anofua o Akaia ia Kristo.

⁶Alofa Mere aia niavere sore neiasit acitia.

⁷Alofa Antronikus ma Junia tshaku anele, ma acraua neinagi ia avou ia ta fare mukei, acraua takou sore ia apostolo, acraua ma neinofo ia Kristo mokagi avou.

⁸Alofa Amplius tshaku nakacitiafakarafia ia ta Teriki.

⁹Alofa Urben aia asitu acitia ia Kristo, ma Stekis tshaku acitiafakarafia.

¹⁰Alofa Apelis aia nimaganerefia ia Kristo. Alofa acre o ta fare o Aristobulus.

¹¹Alofa Herotian tshaku nele. Alofa acre o tafare o Narsisus. Acre konofo ia ta Teriki.

¹²Alofa Tryfine ma Tryfosa acraua vere ia ta Teriki.

¹³Alofa Rufus nisubina ia ta Teriki, ma tshana nana ma tshaku.

¹⁴Alofa Asenkretus, Flecon, Hermas, Patrobas, Hermis, ma anoso konofo ia acre.

¹⁵Alofa Felolocus, ma Julia, Nereus ma tshana kave, ma Olempus, ma iotshi tagata o Iesu konofo ia acre.

¹⁶Alofa tasi ma tasi foci o acoua ia tasi soge tapu. Ta akalasia o Kristo alofa acoua.

¹⁷Melou anoso avou fakowia mukei acoua, fatshigeia acre emna avaia keifiatu isa ia fakairo neitufwa iacoua, ma feke acre.

¹⁸Ma acre hepera severe ia tshote Teriki Iesu Kristo, kaia ia niare akai, ma ia afasao erefia ma niare afasao mugaro karasia arotorea o acre keiro fakasisi ana.

¹⁹Ma tagatotshi neirogona o niaua maganerefia, ma avou kabisa ia iacoua, kaia avou acitiafakarafia pe acoua arapakou ia ane ko erefia, ma searapakou ia ane isa.

²⁰Ma Atua o merino kamanono Satana kumea ia avoia owa ia nopoge ko itata. Ta karofa o tshote teriki Iesu Kristo. Konofo ia acoua. Amen

²¹Timotheus aia kasitu avou ia ta vere, ma Lusius, ma Sosipater tshaku anele alofa acoua.

²²Avou Tertius neiserea tatapuria nei, alofa acoua ia ta Teriki.

²³Caias tshaku tatane tufwa avou akai, ma iotshi tagata o ta kalasia, alofa iacoua. Irastus ta tane sore keifatshigeia erefia ta umra sore alofa acoua, ma Kwartus tasi noso.

²⁴Ta karofa o tshote Teriki Iesu Kristo konofo ia acoua iotshi. Amen.

²⁵Melou ia aia ko tomatua keinage mukei acoua ia tshaku fasao erefia, ma ta kova o Iesu Kristo, hepe aia nifakairo, o ane nifune wamuri ta nontafito o iafanua wararonei.

²⁶Kaia melou koucitia, ma ia ta fasao erefia neiserea ia aprofeta, hepe ta fakairo mukei neitucua ia ta Atua mouri nofo atou ma tou, kotufwa tenei fakairo ia tagata o iafanua iotshi keifakairo acre taha ko maganerefia ia ta fakarogrogo;

²⁷Ia ta Atua ana arapakou kotufwa ta sore ia Iesu Kristo atou ma tou. Amen.