Read Futuna-Aniwa ROMANIS, 4 Bible Online

ROMANIS, 4 - Futuna-Aniwa bible

ROMANIS, 4

¹TAHA acime katucua pe Ebraham tamanome wamuri ta konour nakamo?

²Ma pe Ebraham neinage hepe erefia ioria o tshana avere, aia nakamo nokobisa iateia; kaia jimra emoa Atua.

³Ma taha tafasao tapu neiserea koutucua? Ebraham nifakarogrogo Atua, ma aia neinagi tenei iateia hepe magane totonu.

⁴Kaia ia aia kovere, ta ioria sekotufwa hepe o karofa, kaia hepe ta ioria o tshana avere.

⁵Kaia ia severe, kaia fakarogrogo ia aia neimna ioria o tagata isa, tshana fakarogrogo ko nagi iateia hepe ioria o magane totonu.

⁶Hepe Tevit neitucua erefia ta tane, ia aia Atua nagi magane totonu, ma tshana avere iateia kojimra.

⁷Nokoutucua, erefia acre ioria o niare amaganisa katouwaki, ma acre niare amaganisa niapotshia.

⁸Erefisa ko ta tane iateia ta Teriki sekanage tshana amaganisa.

⁹Ane erefisa nei komai ia acre o sereapono ana, mo ia ta sesereapono foci? Ma acime koutucua pe fakarogrogo neinagi ia Ebraham hepe magane totonu tshana.

¹⁰Ia taha nopoge neinagi aia iateia? Ia nopoge aia neinofo ia segeapono mo ia sesegeapono, ko jimra ia segeapono, kaia ia sesegeapono aia.

¹¹Ma neitufwa aia ta vere o segeapono, keimna mukei ta fakarogrogo aia makamo mokagi segeapono aia, pe aia nofo ta mana a acreiotshi fakarogrogo, pe segeapono acre, pe amagane totonu keinage foci ia acre.

¹²Ma ta mana o ta segeapono ia acre jimra o segeapono ana, kaia ace kororo ia ta fakarogrogo o tamanome Ebraham aia niamo ia nopoge mokagi segeapono aia.

¹³Ma ta fatshipoge pe aia amo iafanua iotshi, setufwa ia Ebraham ma tshana erecriki ia tafasao tapu, kaia ia ta magane totonu o ta fakarogrogo

¹⁴Mo pe acre o tafasao tapu keiamo, fakarogrogo kotouwaki, ma ta fatshipoge neimna taru;

¹⁵Ianenei ta fasao tapu kovere ia fakainina, kaia wehe tafasao tapu jimra tagata seiauiai aia.

¹⁶Ianenei aia komai o fakarogrogo, pe aia o karofa, pe ta fatshipoge konofo mukei ia iotshi niana tagata; jimra ia acre ana komai o ta fasao tapu, kaia ia acre foci komai o ta fakarogrogo o Ebraham, aia ta mana o acitiotshi.

¹⁷Hepe aia kosereace, avou neimna akoi ta mana o tagata o fanua nalupai, mokagi ia aia nifakarogo, aia ko Atua aia emna tagata mate komouri foci, ma tapa anea iotshi nijimra, hepe acre konofo.

¹⁸Aia fiagei nanacina nifakarogrogo ia nanacina, pe emna aia ta mana o tagata o fanua nalupai, hepe ta fasao neitucua iateia, Hepe ra tshou erecriki kamai.

¹⁹Ma aia setaru ia ta fakarogrogo, aia sementua tshana notshino hepe nimate, wamuri aia neinofo wararonei itata atou tasi huntret, ma foci jimra hepe ta nimate o ta nofu o sera.

²⁰Aia setshipatshipa ia ta fatshipoge o Atua ia sefakarogrogo, kaia aia notomatua ia ta fakarogrogo, nokobisa ia Atua;

²¹Aia nikeiro tamari ia tshana roto, pe taha aia neinanacina, aia tomatua keimna.

²²Ianenei, tenei foci neinage ia aia hepe magane totonu erefia.

²³Aia jimra neiserea ia aia ana, pe aia neinage aia iateia.

²⁴Kaia iacitia ma, iacitia katufwa foci, pe acitia fakarogrogo ia aia tshicitshiakace Iesu tshote Teriki ia acre nimate;

²⁵Aia neitufwa ia ioria o tshote amaganisa, ma neitshicitshiakace foci keitufa acitia aneamouri.