Read Futuna-Aniwa ROMANIS, 6 Bible Online

ROMANIS, 6 - Futuna-Aniwa bible

ROMANIS, 6

¹TAHA acitia koutucua wamurira? Erefia acitia konofo ia amaganisa, pe ta karofa kosore?

²Atua neitucuasana ra, Tiaha acitia komate ia maganisa, nofo wamuri nei ia aia?

³Sekeiro acoua pe acime iotshi nibaptiso ia Iesu Kristo, nibaptiso ia tshana mate?

⁴Ianenei acime neitanumea ia aia ia ta baptiso ia ta mate; ma hepe Kristo neitshicitshiakace ia tagata mate, ia ta sore o ta mana, hepe ma acitia karoro ia ta fou anea mouri.

⁵Mo pe acitia nipopra ia aia ia noata o tshana mate, acitia foci hepe aia ia ta noata o tshana masike ia acre nimate;

⁶Nokeiro tenei, pe tshote tane ituai ko tuctucia ia aia ia tererakoufakaravasia, pe ta notshino o amaganisa takaroiai, pe wamurira acitia severe foce ia ane isa.

⁷Ma aia komate, kovetea ia amaganisa.

⁸Ma pe acitia komate ia Kristo, acitia fakarogrogo pe acitia foci kamouri ia aia;

⁹Nokeiro pe Kristo nimasike ia ta mate, aia semate foci, ta mate setomatua foci ia aia.

¹⁰Ma i aia nimate, aia nimate ia ane isa fakatasi, kaia i aia komouri, aia nokomouri ia Atua.

¹¹Hepe ma acoua koutucua acoua keimate ia ane isa, kaia komouri ia Atua ia Iesu Kristo tshote Teriki.

¹²Ianenei erefia ane isa setomatua ia tshoua notshino, pe acoua vere ia tshana kogavivi isa.

¹³Ma setufwa anuntafa o tshou notshino keiasitu emna ane isa, kaia tufwa acoua ia Atua, hepe acre komouri ia ta mate, ma iotshi nontafa o notshinoua keimaganerefia ia Atua.

¹⁴Ma ane isa setomatua takaroiai acoua, ma acoua senofo iraro ta fasao tapu, kaia iraro ta karofa.

¹⁵Taha wamurira? acitia kamaganisa, ianenei acitia senofo iraro ta fasao tapu, kaia iraro karofa? Atua neitucuasanara.

¹⁶Sekeiro acoua, ia aia acoua tufwa notshinoua keivere iateia, tshana afetshicow acoua konofo, pe o ane isa ta mate, mo o avere erefia ia magane totonu o mouri.

¹⁷Kaia thank Atua, pe acoua afetshicow o amaganisa, kaia acoua nitafuri ma ia arotua nakafakarogona ma maganerefia ia ta afasao erefia nifakairo acoua.

¹⁸Acoua eivetea ia ane isa, acoua konofo afetshicow o amaganerefia.

¹⁹Avou fasao iacoua wamuri magane o tagata ianenei ta taru o niaua konouri, ma hepe acoua neitufwa anontafa o niaua anotshino afetshicow ia maganisa, ma ia isa ia ane isa, hepe ma melou tufa anuntafa iotshi o anotshinoua afetshicow o magane totonu ma tapu.

²⁰Mo i anopoge acoua neinofo afetshicou o anea isa, tshoua amagane totonu nijimra,

²¹Taha nohua acoua amo i anopogera acoua neimna amagane ra o aia acoua milou koma? ma ta mate ko ta ioria o ane iotshi ra.

²²Kaia melou acoua eivetea ia ane isa, ma konofo afetshicow o Atua, acoua nakamo niaua nohua ia ane tapu erefia, ma ta ioria aneamouri atou ma tou.

²³Ma ta afako o ane isa ko ta mate, kaia ta karofa o Atua ko aneamouri atou ma tou ia Iesu Kristo tshote Teriki.