Read Futuna-Aniwa ROMANIS, 8 Bible Online

ROMANIS, 8 - Futuna-Aniwa bible

ROMANIS, 8

¹IANENEI wamurira ko jimra ioria nofo iacre konofo ia Kristo Iesu, acre seroro wamuri ta konouri, kaia wamuri ta Nokano.

²Ma ta fasao o ta Nokano o tamouri ia Kristo Iesu neivetea avou ia ta fasao tapu o anea isa, ma o ta mate.

³Ma taha tafasao tapu setomatua emna, ianenei aia taru ia ta konouri, Atua aia nikouna tshana Nontariki hepe ia ta notsino o tagata isa, ma ia aneisa, nitakaroiai ane isa ia ta konouri;

⁴Pe amagane totonu erefisa o tafasao tapu nakafonu ia acitia, seroro wamuri ta konouri, kaia wamuri ta Nokano.

⁵Ma acre wamuri ta konouri, mentua anea o ta konouri; kaia acre wamuri ta Nokano mentua anea o ta Nokano.

⁶Ma keinofo ia ta fenagaro o ta konouri ko mate, kaia keinofo ia ta fenagaro o ta nokano ko mouri ma merino.

⁷Ianenei ta fenagaro o ta konouri ko feimacoua Atua, ma aia kojimra fakarogona ma nofo iraro ta fakairo o tafasao tapu o Atua, ma tamari aia setomatua iateia.

⁸Ma acre konofo ia ta konouri setomatua emna magane Atua kabisa iateia.

⁹Kaia acoua senofo ia ta konouri, kaia ia ta Nokano, pe ta Nokano o Atua nofo ia acoua, melou pe tatane tasi seamo ta Nokano o Kristo, aia ko jimra tasi o niana tagata.

¹⁰Ma pe Kristo konofo ia acoua, ta notshino komate ia ane isa; kaia ta Nokano ko mouri ia tshana magane totonu.

¹¹Kaia pe ta Nokano o aia neitshicitshiakace Iesu ia acre nimate konofo ia acoua, aia pe neitshicitshiakace Kristo ia acre nimate, aia foce. katshicitshiakace niaua mate anotshino ia tshana Nokano aia konofoia acoua.

¹²Ianenei anoso, erefia acitia senofo ia konouri; keiavere ia ta konouri.

¹³Ma pe acoua mouri keivere wamuri ta konouri, acoua kamate; kaia pe acoua ia ta Nokano takaroiai amagane o ta notshino acoua kamouri.

¹⁴Ma iotshi pe arafia ia ta Nokano o Atua, acre anontariki o Atua.

¹⁵Ma acoua seamo ta Nokano o nifousia keiarafia acoua ia kumtacu, kaia acoua amo ta Nokano o afotshi, ia aia acitia kotapa, Abba Tata.

¹⁶Ta Nokano nokofakairo ia tshote nokano, pe acitia nofo ta erecriki o Atua;

¹⁷Ma pe ercriki, kuamo o, aia ma kuamo Atua, ma kuamo ia Kristo; pe takaroiai acitia ia aia, pe acitia foci roro taragi ia aia.

¹⁸Ma avou mentua pe ta sewa o atou melounei ko sisi ia ta kabisa sore kamai iacitia wamuri.

¹⁹Ma ta sore acitiafakarafia o ta anea neimna, kotari keicitia ta nokomai o anontariki o Atua.

²⁰Ma ta ane neimna neinofo iraro ane isa aia secitiafakarafia, kaia ia aia neinagi iotshi iraro ta nanacina.

²¹Ianenei ane neimna foci keiarafia watafa ta karoiai ia ta vere o ta sore kabisa o ta ercriki o Atua.

²²Ma acitia keiro pe iotshi neimna nokogu ia kawe ma komy sore ia amy atou ma tou ma ia melou.

²³Ma jimra acre ana, kaia acitia foci, melou nakamo ta mokagi nohua o ta Nokano tapu, acitia ma nokogu i arotomea, nokotari ia ta apotshia, ia ta penpena erefia o atshinote.

²⁴Ma aia kapari acitia ia nanacina, kaia nanacina pe koucitia aia ko jimra nanacina, ma taha tatane nanacina ane aia koucitia?

²⁵Ma pe aitia nanacina ane acitia secitiamana, acitia ia merino tari aia.

²⁶Ma ta Nokano foci asitu tshote ataru; ma acitia sekeiro keimori erefia hepe totonu ia aneamane, kaia ta Nokano aia mori asitu acitia ia nokogugu sefasao iateia.

²⁷Ma aia kofatshigeiace ta aroto nokeiro taha ko ta fenagaro o ta Nokano, ianenei aia komori tufwa anea mane erefia ia taga o Iesu, hepe ta fenagaro o Atua.

²⁸Ma acitia keiro pe ane iotshi kovere ia erefia iacre acitiafakarafia Atua, iacre nitapa hepe aia neinagi acre iateia.

²⁹Ma acre aia nikeiro mokagi, aia foci neinagi keimna hepe ta noata o tshana Nontariki, pe aia nofo ta tourumatua o nalupai anoso.

³⁰Ma acre aia neinagi mokagi iateia, acre aia nitapa, ma acre aia nitapa, acre aia neipenpena ma neinagi erefia, ma acre aia neipenpena erefia, acre aia niarafia ia taragi.

³¹Taha acitia koutucua ia anea mane? Pe Atua kapare acitia, akai tomatua takaroiai acitia?

³²Aia pe sekapare tshana Nontariki, kaia neitufwa aia takavari ioria acitia, tiaha aia ia aia foci setufwa acitia ane iotshi?

³³Akai kanagi ane isa ia tagata Atua neinagi ma penpena? Aia Atua nagi penpena erefia.

³⁴Akai aia koutucua acre isa? Aia ta Kristo nimate iacre, keini ma aia ko masike foci ia amate, aia ko melou ia ta norima matou o Atua, aia foci komori aia asitu acitia.

³⁵Akai kavaia acitia feke ta acitiafakarafia o Kristo? Ane takaroiai aroto, mo emna kotagi, mo sewa, mo akai Kobune ana, mo umega jimra, mo ane iauiai, mo sawa ia tomatshira palo?

³⁶Hepe aia neisereace, ma ia acitiafakarafia akoi acitia kosawa mate tapopo, toute, ma fiafi ia tiotshi nopoge, acre nimentua acitia hepe asip konofo ia keitaia mate.

³⁷Keini ia ane iotshira acitia tomatua nofo mukei ia aia Iesu acitiafakarafia acitia.

³⁸Ma avou keiro tamari, pe jimra ta mate, mo ta mouri, mo agelo, mo fatoriki, ma acre tomatua sore, mo ane konofo melou mo anea keimai,

³⁹Mo ane iluga, mo ane iraro, mo anea foci neimna, katomatua keivaia acitia keifeke ta acitiafakarafia o Atua, aia konofo ia Kristo Iesu tshote Teriki.