Read Futuna-Aniwa ROMANIS, 9 Bible Online

ROMANIS, 9 - Futuna-Aniwa bible

ROMANIS, 9

¹AVOU koutucua ta mari ia Kristo, avou sekorefu, tshaku fenagaro oci koutucua iatavou tamari ia ta Nokano Tapu.

²Pe avou nakamo sore mafa ma tagi segapu ia kuroto.

³Mo avou tomatua keiremu ia tshaku fenagaro, pe avou touwaki sa ia Kristo, pe aia acitiafakarafia akusoa, tshaku anoso wamuri ta konouri.

⁴Acre tagata o Isreil, ia acre keitufwa ta afotshia, ma ta sore kabisa, ma afasao tapu o Atua, ma ta nokotufwa o tafasao tapu, ma ta avere o afetshicou o Atua, ma ta afatshipoge;

⁵Niare tamanorea, ma o acre wamuri ta konouri Kristo nimai, aia konofo sore iluga iotshi, Atua erefisa atou ma tou. Amen.

⁶Jimra hepe tafasao o Atua kotaru sefua. Ma acre iotshi jimra Isreil, nimai o tagata Isreil.

⁷Ianenei jimra acre tagata o Ebraham, acre iotshi nofo tshana erecriki. Kaia ia Isak tshoua ericriki katapa.

⁸Nokano o tenei, Acre konofo erecriki o ta konouri, acre kojimra erecriki o Atua, ma ta erecriki o ta fatshipoge acre nofo ta erecriki.

⁹Ma tenei ta fasao o ta afashipoge, Ia tou nei avou kamai, ma Sera kafarere tasi nontariki.

¹⁰Ma jimra tenei ana, kaia ia ta nopoge Ribika kofeinai ia tasi, ia tamanoteia Isak;

¹¹Ma mokagi ta erecriki nifarere rumasaga untariki, ma mokagi acrawa imna magane erefia mo isa, pe fenagaro o Atua hepe aia neinagi iateia nakonofo mukei, jimra o avere, kaia o aia pe tapa.

¹²Aia neitucua ia ta nana aia ta touramatua kafetshicou ia ta tamurioufi.

¹³Hepe aia neiserea Jakob avou nakacitiafakarafia, kaia Iesu avou nakafeimacoua.

¹⁴Taha acitia koutucua wamurira? Ko magane safi ia Atua? Atua neitucuasanara.

¹⁵Ma aia neitucua ia Moses, Avou karofa aia avou karofa, ma avou kacitiafakarafia aia avou kacitiafakarafia.

¹⁶Ma tenei fakairo, aia kojimra o aia fenagaro koremu, mo jimra o aia kotere, kaia o Atua pe tufwa karofa.

¹⁷Ma tatapuria tapu neitucua ia Fero, ma ia avere nei avou nakanagi akoi icunei, pe avou fakariaria tshaku tomatua ia akoi, ma pe tshaku neigo keifasao iateia i iafanua iotshi.

¹⁸Ianenei, aia karofa acre aia acitiafakarafia, ma acre aia natshicina arotorea nofo mukei.

¹⁹Akoi wamurira katucua iatavou mo, Tiaha wamurira aia neitucuasane magane? Ma akai nikofiatu tshana fenagaro.

²⁰Jimra, kaia tatane, Akai akoi fasao fiatu Atua? Tiaha erefia ta ane neimna kafakouia aia neimna aia, Tiaha akoi neimna avou hepe nei?

²¹Tiaha tatane nokomna taganea o takere, tomatua o ta nopito tasi o ta perapera keimna tasi taganea ia avere sore, ma tasi foci ia avere sisi?

²²Tiaha pe Atua acitiafakarafia, fakariaria tshana fakainina, ma keimna iotshi keiro tshana tomatua sore, neinofo ia merino sore iacre hepe aganea i fakainina nofo ia takaroiai.

²³Ma pe aia kafakairo tagata ma ta anea mane erefia o tshana vere sore ia aganea aia karofa, acre aia mokagi neimna ia tshana avere sore,

²⁴Acitia aia neitapa, jimra o tagata o Juteia ana, kaia tagata o fanua pouri ma?

²⁵Hepe aia foci neitucua ia Hosia, Avou katapa acre tshaku tagata, acre konofo jimra tshaku tagata, ma aia nakacitiafakarafia nimokagi secitiafakarafia.

²⁶Ma ane nei kamai, pe ia ta none aia neitucua iacre, Acoua jimra tshaku tagata, iai katapa acre untariki o ta Atua mouri.

²⁷Aisea foci kotapa o tagata o Isreil, Pe tagata o Isreil konofo tawa hepe tawne o tatai, o acre kapare toru ana.

²⁸Ma ta Teriki kaioria hepe tshanafasao tapu koutucua ia fanua wararonei, ma meloua kaioria totonu ma toutshice aia kurava, ianenei avere poto ta Teriki kamna i iafanua.

²⁹Ma hepe Aisea neitucua mokagi, Pe ta Teriki o Sabeoth seneinagi iacitia faru nohua, acitia nofo hepe Sotoma ma Comora.

³⁰Taha acitia koutucua anera? Pe tagata o fanua pouri seroro wamuri magane totonu nakamo magane totonu, ta magane totonu komai ia fakarogrogo.

³¹Kaia Isreil niroro wamuri tafasao tapu ia magane totonu, sekamo ta fasao tapu o magane totonu.

³²Tiaha? Ianenei, acre sefatshigeia aia ia ta fakarogrogo, kaia ia tavere i tafasao tapu. Ma Acre tshipatshipa ia ta fatu o tshipatshipa.

³³Hepe aia neiserace, Avou kanagi ia Saion ta tshipatshipa fatu, ma tafatu akou tagata feimacoua ma koto ia aia, ma tagatotshi fakarogrogo aia sekakoma.