Read Futuna-Aniwa FAKATASI KORINTHUS, 16 Bible Online

FAKATASI KORINTHUS, 16 - Futuna-Aniwa bible

FAKATASI KORINTHUS, 16

¹MELOU keifakairo acoua ia fakatapuria karofa o mone keitufwa tagata o Iesu, hepe avou neiserea ia ta akalasia o Calatia, hepe ana emna acoua,

²Ia fakatasi nopoge o ta wik, erefia tasi ma sece o acoua iotshi fakatapuria faru tshana hepe Atua nakatufwa aia, pe sefetacina faru wamuri avou komai.

³Ma ia ta nopoge avou komai, acre acoua koutucua erefia ia niaua tatapuria, acre avou kouna keiamo niaua arofa ia Jerusalem.

⁴Ma pe erefia avou fano foci, acre karoro ia avou.

⁵Ma avou komai iacoua ia taha nopoge avou fano ia aroto o fanua o Masitonia, ma avou fano ia aroto o fanue Masitonia.

⁶Ma pe avou kanofo iacoua, ma nofo ia umrame mukaligi iacoua, pe acoua arafia avou ia tshaku retu ia none avou fano iai.

⁷Ma avou sekacitia acoua melou ia ta retu, kaia avou acitiafakarafia konofo tari iacoua umrama ma, pe ta Teriki acitiafakarafia.

⁸Kaia avou kanofo ia Efesus ia tacripoga Pentakost.

⁹Ma tafeitoca sore ma erefia ko tshiki iatavou ma nalupai fiatu ta kova.

¹⁰Ma pe Timotheus komai iacoua fatshigeia pe aia nofo iacoua ma sumtacu, ma aia emna ta vere o Atua hepe, avau.

¹¹Erefia jimra tasi tane feimacoua aia, kaia arafia aia ia ta teretu ia merino, pe aia komai iatavou, ma avou fatshigeia aia ia anoso.

¹²Ma o tshote noso Apolos, avou acitiafakarafia sore aia keimai iacoua ia anoso, kaia tshana fenagaro ko jimra keimai iacona melou, kaia aia kamai ia taha nopoge erefia iateia.

¹³Fatshigeia ma kotu mukei ia ta fakarogrogo, emna avere hepe fakou, konofo tomatua.

¹⁴Erefia emna ane iotshi ia acitiafakarafia.

¹⁵Avou fakouia mukei acoua anoso, acoua keiro ta fare o Stifanus, pe aia ko ta fakafasi anofua o Akaia, ma pe acre neitufwa acre ia ta vere o asitu tagata o Iesu.

¹⁶Pe acoua fakarogona ta fakairo o acre, ma o iotshi tane pe kositu ia acime ma kovere.

¹⁷Avou kabisa ia ta nokomai o Stifanus ma Fortunatus ma Akaikus, ma anera acoua setufwa, acratou, nakatufwa avou.

¹⁸Ma acratou nakamna tshaku nokano kabisa ma niaua, ianenei arotoua mugaro ia acre nofo hepera.

¹⁹Akalasia o Esia alofa acoua, Akwila ma Presela alofa sore acoua ia ta Teriki, ia ta kalasia konofo ia niarawa fare.

²⁰Iotshi anoso alofa acoua, alofa tasi ma seca o acoua ia ta tapu soge.

²¹Ta alofa o avou Paulo ia tshaku norima.

²²Pe tasi tane secitiafakarafia ta Teriki Iesu Kristo, erefia aia. Anathema Maran-atha.

²³Ta karofa o tshote Teriki Iesu Kristo konofo ia acoua,

²⁴Tshaku acitiafakarafia konofo ia acoua iotshi ia Kristo Iesu. Amen.