Read Futuna-Aniwa FAKATASI KORINTHUS, 9 Bible Online

FAKATASI KORINTHUS, 9 - Futuna-Aniwa bible

FAKATASI KORINTHUS, 9

¹AVOU tasi apostolo mo jimra? avou sefousia mo? avou neicitia Iesu Kristo mo jimra? ma acoua ta anofua o tshaku vere ia ta Teriki mo?

²Pe avou jimra tasi apostolo ia faru foci tagata, tamari avou tasi iacoua, ma ta nohua o tshaku vere o apostolo acoua nofo ia ta Teriki.

³Thaku fasao iacre fakouia avou ko tenei,

⁴Tiaha acime nakamo tomatua keina ma keinumea, mo jimra?

⁵Acime seamo tomatua keiarafia tasi kave, tasi nanahune, hepe faru foci apostolo, ma hepe anoso o ta Teriki, ma Sifas, mo jimra?

⁶Mo avou ana ma Barnabas acimaua tomatua mo jimra keinatshicina nokovere?

⁷Akai fano ia tatowa i taha nopoge ma sefakakamata aia iateia? Akai nipopra ta vere o avaini ma sekeina anohua o aia? Mo akai fakeina asip ma senumea o ta tou?

⁸Koutucua avou ane iotshira hepe tasi tane ana? Mo tafasao tapu koutucua hepera ma?

⁹Mo tenei koserea ia afasao tapu o Moses, akoi sefousia ta rogoutu o ta kurimatou pe aia katumea ta korn. Atua fatshigeia kurimatou ana mo?

¹⁰Mo aia koutucua afasao nei ana iacitia? iacitia tamari aia neiserea nei, pe aia kovere ia ta kere nakovere ia nanacina, ma aia pe kotumea ia nanacina nakeina o tshana nanacina

¹¹Pe acime nipesia iacoua o nokano, aia kosore ane pe acime kakeina o niaua akai?

¹²Pe faru foci amo tenei o acoua, sore kagi acime, mo? Kaia acime seamo tenei tomatua; kaia arotomea my ma merino ia ane iotshi, pe seemna taru ta fasao erefia o Kristo.

¹³Sekeiro acoua pe acre nokovere ia anea mane tapu, keina akai o anea tapu o ta fare mori, ma acre kovere ia ta fata keina o anea o ta fata?

¹⁴Hepera ana ta Teriki neitucua mukei pe acre kova ta fasao erefia tagata fakeina ma acre iateia.

¹⁵Kaia avou seamo akoi ia ane tasi ra, ma avou seserea ane iotshi ra, pe acoua emna hepera iatavou, ma aia sore kage erefia iatavou pe avou keimate, mokagi tasi tane emna tshaku nokobisa sehua.

¹⁶Ma pe avou kova ta fasao erefia, tshaku ane jimra kabisa ia tenei, ma aia nagi tenei vere iatavou, ma kawe iatavou pe avou sekova ta fasao erefia!

¹⁷Ma pe avou emna avere nei ia fenagaro kabisa, avou nakamo ta ioria, kaia pe jimra ia kabisa o tshaku roto, aia kanagi ta vere o kova ta fasao erefia iatavou.

¹⁸Taha ko tshaku ioria iateia? Tamari pe avou kova ta fasao erefia, avou kova ta fasao erefia o Kristo ma semo ioria iateia, pe avou seiauiai tshaku tomatua ia afasao erefia.

¹⁹Ma pe avou nokoragragi ia tagatotshi, avou neimna avou ta fetshicou o iotshi, pe avou ia fakairo amo nalupai.

²⁰Ia fakou o Juteia avou nikova hepe tasi tane o Juteia, pe avou arafia ia Iesu fakou o Juteia, iacre nofo iraro afasao tapu hepe iraro tafasao tapu, pe avou arafia acre iraro afasao tapu;

²¹Iacre nofo ma sekeiro ta fasao tapu, hepe watafa tafasao tapu, kaia sewatafa tafasao tapu ia Atua, kaia iraro ta fasao tapu ia Kristo, pe avou arafia acre nofo watafa tafasao tapu.

²²Iacre taru avou nikova hepe taru, pe avou arafia ta taru; avou emna ane iotshi ia iotshi tagata, pe avou arafia faru ia Iesu.

²³Ma tenei avou emna ia acitiafakarafia o ta fasao erefia, pe avou ma amo aia ia acoua.

²⁴Sekeiro acoua pe acre ia ta fura, fura iotshi, kaia tasi amo ta ioria? Fura hepera, pe acoua nakamo.

²⁵Ma iotshi fakou kofiatu ia ta turocina, ko totonu ia ane iotshi o tshana magane. Melou acre emna ra keiamo tasi kroun nagimana aia komeru, kaia acitia tasi sekameru.

²⁶Ianenei avou ma tere, jimra hepe sekeiro, ma hepera avou towa jimra hepe tasi nokotuctucia ta tumtagi;

²⁷Kaia avou konagi iraro tshaku notshino, ma emna aia sisi, pe ia ane tasi, wamuri avou nikova ia tagata, aia kotouwaki avou.