Read Futuna-Aniwa FAKARUA KORINTHUS, 11 Bible Online

FAKARUA KORINTHUS, 11 - Futuna-Aniwa bible

FAKARUA KORINTHUS, 11

¹AVOU acitiafakarafia pe fakarogona avou sisi ia tshaku fakamana fasao, ma tamari acoua fakarogona avou.

²Ma avou koeireiro o acoua ia koeireiro erefia, ma avou nakavaga acoua ia tasi nonwane, pe avou tufwa acoua hepe tasi fine sisi erefia fou ia Kristo.

³Kaia avou kumtacu, pe ia ane tasi, hepe ta agata niarasia Iva ia niana arapakou feiva, niaua afenagaro keimna isa ma feke ta fasao mari ia Kristo.

⁴Ma pe aia komai kova tasi foci Iesu acime sekova; mo pe acoua amo tasi foci nokano acoua seamo mokagi, mo tasi foci fasao erefia acime seamo, erefia acoua merino ia aia.

⁵Ma tshaku fenagaro mentua, avou jimra sisi ia ta sore kagi o ta apostolo.

⁶Kaia pe avou ko taru ia afasao, jimra ia arapakou, kaia tamari acoua neicitia acime ia ane iotshi.

⁷Mo taha avou magane safi keinagi avou iraro, pe keinagi iluga acoua, ianenei avou nakova iacoua ta fasao o Atua acoua sefakamata?

⁸Avou niamo ioria o faru foci akalasia, keivere ia acoua.

⁹Ma anopoge avou neinofo ia acoua, ma tshaku mone nibune, avou seamo fakamata o tasi tane: ma taha tshaku nijimra ta anoso nimai feke Masitonia neitufwa avou; ma ia ane iotshi avou seamo niano ane, ma hepera avou kanofo.

¹⁰Hepe ta mari o Kristo konofo ia avou, jimra tasi tane kamna kurava tshaku fasao sore ia iafanua o Akaia,

¹¹Tiaha? ianenei avou secitiafakarafia acoua? Atua keiro.

¹²Kaia taha avou emna, tera avou emna, pe avou toutshiace anea ia acre keiremu anea; pe ia anea acre kabisa, tagata koucitia acre hepe acime.

¹³Ma acre hepera apostolo korefu, karasia ia avere, kofeiva acre apostolo o Kristo.

¹⁴Ma jimra masaro iateia; ma Satana ko tafuri aia ia agelo o merama.

¹⁵Ianenei aia jimra ane sore pe tshana afetshicou foci kotafuri hepe ta afetshicou o magane totonu; kaia niare kurava kamai hepe niare avere.

¹⁶Avou koutucua foci, seerefia pe tasi tane mentua avou koukali, pe emna ra, hepe tasi koukali arafia avou, pe avou fasao sore o avou fakasisi.

¹⁷Tafasaora avou koutucua, avou sefasao hepe ta Teriki koutucua iatavou, kaia hepe koukali ia tenei fasao sore.

¹⁸Nokoucitia nalupai fasao sore hepe magane o konouri, avou kafasao sore foci.

¹⁹Ma pe acoua fakarogona fasaa o acre koukali merino; nokoucitia acoua ko arapacou.

²⁰Ma arotoua merino pe tasi tane arafia acoua ia fousia, pe tasi takaroiai acoua, pe tasi amke o acoua, pe tasi koutucua aia sore kagi, pe tasi tane tshi acou ia ta foimata.

²¹Avou fasao o saciria, hepe acime nitaru. Kaia ia ane iotshi pe tasi ko tomatua (avou fasao koukali) avou tomatua foci.

²²Acre tagata Hibru? Avou foci ma. Acre tagata o Isreil? Avou foci ma. Acre erecriki o Ebraham? Avou foci ma.

²³Acre afetshicou kova o Kristo? (avou fasao hepe tasi koukali) avou sore kagi ra; ia avere sore kagi, ia atshi toura sore kagi, ia afare mukei nopoge nalupai, ia amate nalupai.

²⁴O fakou Juteia erima nopoge avou niamo forte atshi, tasi ana jimra.

²⁵Fakatoru acre tshi avou ia terarakou sisi iateia, fakatasi acre tucia avou ia afatu, fakatoru avaka eifasia ma avou nitowaki ia tatai, tasi tupo ma tiau avou nakonofo ia tatai.

²⁶Ia nokororo papai nalupai, itata mate ia tavai tafe, itata mate ia tagata tshigo, ia tagata o tshaku fanua, ia tagata o fanua pouri, ia umrai sore, ia tugogou, ia tatai, ia anoso karasia.

²⁷Ia nokotaru ma amy, ia afatshigeia nalupai, ia tshitogi ma mate tavai, ia akopari nalupai, mukaligi ma umega jimra.

²⁸Ma foci ane iothsi watafa, anea nokomai ia avou nopoge ma nopoge, ta fatshigeia o iotshsi Akalasia.

²⁹Akai kotaru ma avou jimra kotaru? Aroto o akai komy ma avou sekoura?

³⁰Pe acre emna avou fasao sore, avou kabisa ia anea emna avou taru.

³¹Ta Atua ma Tamana o tshote Teriki Iesu Kristo, aia ko erefisa atou ma tou, nokeiro pe avou sekorefu.

³²Ia Tamaskus ta teriki iraro Aretas ta teriki nifatshigeia ta umrai sore o Tamaskus ia fakou nalupai o tatowa nikeremoa keipurutshia avou.

³³Ma ia ta tatshiroga ia ta kato ia tasi toura acre neinagi avou iraro watafa ta pai, ma nifura tshana orima.