Read Futuna-Aniwa FAKARUA KORINTHUS, 4 Bible Online

FAKARUA KORINTHUS, 4 - Futuna-Aniwa bible

FAKARUA KORINTHUS, 4

¹IANENEI nokoucitia nakatufwa acime tenei avere, hepe neitufwa acime karofa, acime sematese.

²Kaia nitouwaki ane mune o kotshigo, seroro ia karasia, ma sefakairo tafasao o Atua ia kofeiva, kaia ia kofakariaria ta mari acime ia afenagaro o tagatoshi mokagi foimata o Atua.

³Kaia pe tshome afasao erefia ko mune, aia ko mune ia acre isa nitouwaki.

⁴Ia acre ta Atua o tenei fanua nakamna pouri ta afenagaro o acre sefakarogrogo, pe ta merama o ta fasao sore erefisa o Kristo, aia ko ta noata o Atua, nakononiate iacre,

⁵Ma acime sekova acime, kaia Kristo Iesu ta Teriki, ma acime niaua afetshicou ia Iesu.

⁶Ma Atua, aia nitapa ta merama keinoneate ia tapouri, nakononeate ia arotomea, keitufwa ta merama o ta keiro o ta sore o Atua ia ta foimata o Iesu Kristo.

⁷Kaia acime nakamo outa erefisa nei ia aganea o takere, pe ta sore erefisa o tomatua komaia o Atua, ma jimra o acime.

⁸Tshome aroto komy ia nontafa iotshi, kaia jimra tagi sore, acime nokotataruana, kaia jimra kumtacu ia ta mate.

⁹Nisewa kaia aia senatshicina acime, touwaki iraro, kaia setakaroiai.

¹⁰Atou ma tou arafia kofori ia ta notshino, ta mate o ta Teriki Iesu, pe foci ta mouri o Iesu nakoucitia ia tshome notshino.

¹¹Ma acime komouri nopoge ma nopoge kotufwa ia ta mate ia Iesu, pa ta mouri foci o Iesu nakamata ia tshome nokomate notshino.

¹²Hepe ma ta mate kovere ia acime, kaia ta mouri ia acoua.

¹³Acime nokamo ta tasi nokano o fakarogrogo, hepe neisereace, avou nifakarogrogo, ma ianenei avou nakafasao; acime foci fakarogrogo, ma ianei kofasao.

¹⁴Nokeiro aia neitshicitshiakace ta Teriki Iesu, katshicitshiakace acime foci ia Iesu, ma katufwa acime ia acoua.

¹⁵Ma ane iotshi konofo iacoua, pe ta karofa sore su ia ta kabisa nakanofo ia sore o Atua.

¹⁶Ianei acime sematese; kaia pe tshome tatane watafa kotakaroiai, ta aroto watakoro tatane ko tufwa tomatua fou nopoge ma nopoge.

¹⁷Ma tshote ane mama takaroiai arotomea konofo fakasisi ana, nokovere ia acime ta sore erefia ma mafa sore sebune atou ma tou.

¹⁸Melou acitia sekamata anea koucitia, kaia i anea secitiamana, kaia ta anea koucitia nofo melou ana; kaia ta anea secitiamana konofo atou ma tou.