Read Futuna-Aniwa FAKARUA KORINTHUS, 7 Bible Online

FAKARUA KORINTHUS, 7 - Futuna-Aniwa bible

FAKARUA KORINTHUS, 7

¹NAKAMO afatshipogera, nakacitiafakarafia, erefia acitia penpena acitia ia ane isa iotshi o ta konouri ma nokano, nokomna kurava amaganerefia i aroto ia ta kumtacu o Atua.

²Arafia acime, acime semagane safi ia tatane tasi, acime searafia tatane tasi ia ane isa, acime sekarasia tatane tasi.

³Avou sefasao nei keitucua acoua isa, ma avou nakatucua mokagi, pe acoua konofo ia arotomea keimouri ma keimate ia acoua.

⁴Tomatua sore tshaku fasao iacoua, sore tshaku kabisa o acoua, avou fonu ia kabisa, avou kabisa sore su ra iotshi niome asewa.

⁵Ma ia ta nopoge acime niromai ia Masitonia, tshome konouri segapu, kaia arotomea nimy ia nontafa iotshi; watafa neinofo afiatu, watakoro neinofo kumtacu.

⁶Kaia Atua aia emna kabisa acre nitouwaki iraro, neimna acime kabisa ia ta nokomai o Taitus.

⁷Ma jimra ia tshana nokomai ana, kaia ia ta kabisa aia nibisa ia acoua, inaia aia neitucua iacime niaua kerimu sore, niaua nokomakuru, ma niaua afenagaro tomatua sore iatavou, hepe ma avou nibisa sore.

⁸Ma pa avou neimna acoua nitagi ia tasi tatapuria neiserea iacoua, avou setagi iateia, kaia avou nitagi mokagi; ma avou koucitia pe tatapuria tera neimna acoua tagi, ia nopogi toru ana.

⁹Melou avou kabisa jimra pe acoua neimna keitagi, kaia pe acoua nitagi ma arotoua kuafe ia Atua, pe acoua setouwaki tasi ane erefia ia acime.

¹⁰Ma nokotagi ia Atua kovere ia touwaki ane isa ia anea mouri setagi o aia; kaia ta kotagi o ta iafanua kovere ia ta mate.

¹¹Ma koucitia ane nei, pe acoua nitagi ia Atua, aia neimna acoua fatshigeia erefia, keini ma penpena niaua magane, ma fakainina sore, ma kumtacu, ma sore kerimoa, ma sore tomatua, keini ma ioria! Ia ane iotshi acoua fakairo iotshi acoua magane totonu ia tenei ane.

¹²Ianenei pe avou neiserea iacoua, avou seserea ia aia ana neimna ta maganisa, ma jimra ia aia aroto nimy iateia, kaia pe tshome fatshigeia o acoua mokagi ta foimata o Atua acoua nakacitia.

¹³Ianei acime kabisa ia niaua kabisa, keini ma acime nibisa sore kage ia ta kabisa o Taitus, ianenei tshana nokano nibisa sore ia acoua iotshi.

¹⁴Ma pe avou nakafasao sore ia aia o acoua, avou sekoma iateia, kaia hepe acime nifakairo ane iotshi iacoua ia tamari, hepe ma tshome fasao sore avou neimna ia Taitus aia neicitia ko mari.

¹⁵Ma ta acitiafakarafia o tshana roto ko sore iacoua, pe aia nimentua ta fakarogona ma vere iateia o acouaiotshi, pe ia kumtacu ma virviri acoua ia alofa niarafia aia.

¹⁶Avou kabisa pe ia ane iotshi avou mentua acoua maganerefia.