Read Futuna-Aniwa FAKARUA KORINTHUS, 8 Bible Online

FAKARUA KORINTHUS, 8 - Futuna-Aniwa bible

FAKARUA KORINTHUS, 8

¹MA anoso, acime fakairo acoua o ta karofa o Atua neitufwa ia ta akalasia o Masitonia;

²Pe ia ta sore takaroiai o arotorea, ta sore o niare kabisa, ma miare outa jimra, neimna acre keitufwa sore.

³Ma ia niare tomatua, avou koutucua, keini ma sore kagi niare tomatua, acre ia acre ana neiasitu.

⁴Nokofakouia mukei acime keiamo niare alofa tufwa ana, keiamo ma keivaia ia tagata o Iesu.

⁵Ma tenei acre neimna, jimra hepe acime nanacina, kaia acre mokagi neitufwa niare aroto ia ta Teriki, ma ia acime ia ta aciatiafakarafia o Atua.

⁶Ia tenei sore pe acime nifakouia Taitus, pe hepe aia neikamata, hepe ma aia kamna kurava ia acoua tenei karofa ma.

⁷Ianenei hepe acoua amo sore ia ane iotshi, ia fakarogrogo, ia kova, ia arapakou, ia avere segapu, ia niaua acitiafakarafia o acime, fatshigeia pe acoua tomatua ia tenei karofa ma.

⁸Avou sefasao tenei hepe aia koutucua, kaia ia ta tomatna mokagi o faru foci, ma keicitia ta mari o niaua acitiafakarafia.

⁹Ma acitia keiro ta karofa o tshote Teriki Iesu Kristo, pe aia nakamo anea mane, kaia ia acitia aia nimai outa jimra, pe acoua ia tshana outa jimra nakamo outa sore.

¹⁰Ma ia ane nei avou katufwa tshakufasao; ma tenei erefia iacoua neikamata mokagi, jimra ana keimna, kaia foci emna kurava tou mokagi tenei.

¹¹Ma ianenei melou emna kurava aia, hape acoua meloua ia fenagaro neikamata, hepe ma acua melou tomatua emna kurava.

¹²Ma pe mokagi fenagaroua mugaro iateia, aia ko erefia hepe ta tane nakamo, ma jimra hepe aia seamo.

¹³Ma avou secitiafakarafia pe faruke tagata natshicina tufwa, ma acua tufwa sore su.

¹⁴Kaia ia magane totonu, kaia melou ia tenei, niana nalupai keisitu acre niare jimra, ma niare sore kasitu acoua pe niaua jimra, pe egata tasi nofo;

¹⁵Hepe aia ko niserea, aia nifetacina nalupai, faru senofo wamuri, ma aia nifetacina sisi, tshana nalupai.

¹⁶Kaia athank ia Atua aia neinagi tenei fatshigeia ia ta roto o Taitus iacoua.

¹⁷Ma tamari aia niamo tshome fasao, kaia ia tshana tomatua sore ia tshana fenagaro aia nifano ia acoua.

¹⁸Ma acime nikouna ia aia ta noso, o tshana vere ia afasao erefia akalasia iotshi kabisa.

¹⁹Ma jimra tera ana, kaia aia nitapa ia akalasia keiroro ia acime ia avere o tenei karofa, aia ko tufwa ia acime, ia ta sore noneate o ta Teriki, ma keifakairo fenagaroua tomatua iateia.

²⁰Feke tenei, pe jimra tane tasi fiatu acime ia tenei alofa sore kovaia ma kotufwa ia acime.

²¹Fatshigeia keimna ane totonu erefia, jimra ana mokagi ta foimata o ta Teriki, kaia foci mokagi tagata.

²²Ma acime nikouna ia acre tshome noso, aia acime nokoucitia tomatua ia ane nalupai, kaia melou sore kagi tomatua, ia ta sore fakarogrogo avou nakamo ia acoua.

²³Pe farou fakouia o Taitus, aia ko tshaku neli ma aia nokositu avou ia acoua, mo tshome anoso ko fakouia acre akai, acre nikouna ia akalasia, ma ta sore noneate o Kristo.

²⁴Ianenei acoua fakariaria iacre ma mokagi ta akalasia ta nofua o niaua acitiafakarafia, mo o tshome fasao sore o acoua.