Read Futuna-Aniwa CALEISA, 3 Bible Online

CALEISA, 3 - Futuna-Aniwa bible

CALEISA, 3

¹KAI acoua koukali tagata Calesia, akaia nikarasia acoua ia tafegeitu, pa acoua sefakarogrogo ma maganerefia ia ta mari, emoa niaua foimata Iesu Kristo nakanagi, neitucia ia terarakou fakaravasia ia acoua?

²Tenei ana avou fakouia o acoua, Ta Nokano neitufwa iacoua ia ta avere o ta fasao tapu, mo ia ta nokofakarogona o fakarogrogo?

³Acoua koukali sore mo? pe neikamata ia ta Nokano, acoua melou ko penpena ia ta konouri mo?

⁴Acoua nimy ia ane nalupai ma sefua? pe aia ko sefua.

⁵Aia neitufwa iacoua ta Nokano, ma kovere sore masaro ia acoua, aia neimna anea ra ia avere o ta fasao tapu, mo ia ta nokofakarogona o fakarogrogo?

⁶Hepe Ebraham nifakarogrogo Atua, ma aia neinagera iateia hepe aia erefia.

⁷Keiro acoua ianenei pe acre o fakarogrogo acre ta erecriki o Ebraham.

⁸Ma tafasao tapu neiserea, nokoucitia, pe Atua penpena tagata o fanua pouri ia ta fakarogrogo, nikova mokagi ta fasao erefia ia Ebraham, nokoutucua Ia akoi tagata o iafanua iotshi kamna erefia.

⁹Hepe ma acre o fakarogrogo ko erefia ia fakarogrogo o Ebraham.

¹⁰Ma acre o avere o ta fasao tapu konofo iraro ta ioria isa; ma aia neiserea, Ta ioria isa neinofo ia iotshi tagata pe senofo mukei ma emna ane iotshi totonu erefia neiserea ia tatapuria o tafasao tapu keimna.

¹¹Kaia pe jimra tane tasi ko emna erefia ia tafasao tapu mokagi foimata o Atua, aia koucitia; ma acre magane totonu kamouri ia ta fakarogrogo.

¹²Ma tafasao tapu ko jimra o fakarogrogo; kaia ta tane emna acre kamouri ia acre.

¹³Kristo neitufwa ta ioria o acitia ia ta ioria isa o ta fasao tapu, aia neimna isa sore ioria tshote; ma aia koserea isa sore iotshi tagata pe keinoutshia ia terarakou.

¹⁴Pe ta karofa o Ebraham nakamai ia tagata o fanua pouri ia Iesu Kristo; pe acitia nakamo ta fatshipoge o ta nokano ia ta fakarogrogo.

¹⁵Anoso avou fasao hepe amagane o tagata, Pe aia ta fasao rakamna mori o tagata, kaia wamuri aia ko nagi mukei, jimra tasi tane amke faru afasao o aia, mo serea foci iateia.

¹⁶Ma ia Ebraham ma tshana erecriki afatshipoge neitufwa, aia sekoutucua, ia anohua hepe o nalupai, kaia hepe o tasi, ma ia tshou erecriki, aia ko Kristo.

¹⁷Ma tenei avou koutucua, pe ta rakamna moria neimna mukei ia Atua ia Kristo, ta fasao tapu nimai efa huntret ma therte atou wamuri, setomatua amke, pe aia emna ta fatshipoge hepe taru.

¹⁸Ma pe ta anea kotufwa ko o tafasao tapu, aia jimra o ta fatshipoge; kaia Atua neitufwa aia ia Ebraham ia ta fatshipoge.

¹⁹Taha wamurira ko ta vere o tafasao tapu? Aia neitufwa keineitucuasana maganisa, ia ta nopoge ta nontariki nakamai ia aia ta fatshipoge neitufwa; ma aia neitucua ia agelo ia ta norima o aia nokotafuagaro.

²⁰Kaia ta nokafnagaro ko jimra neitucuasana tasi ana, kaia Atua ko tasi.

²¹Ko ta fasao tapu fiatu ta fatshipoge o Atua? Atua neitucuasana ra; ma pe tafasao tapu neitufwa tomatua keitufwa anea mouri, tamari magane totonu nimai ia ta fasao tapu.

²²Kaia tafasao tapu neiserea nakanagi iotshi iraro anea isa, pe ta fatshipoge ia fakarogrogo o Iesu Kristo nakatufwa iacre pe fakarogrogo.

²³Kaia mokagi ta fakarogrogo nimai, acitia nipurutshia iraro ta fasao tapu, nipofna ia ta fakarogrogo nagemana keitufwa.

²⁴Ianenei tafasao tapu ko aia nifakairo acitia, keiarafia acitia ia Kristo, pe acitia nakopenpena erefia ia fakarogrogo.

²⁵Kaia wamuri ta fakarogrogo komai, acitia senofo iraro aia fakairo mokagi.

²⁶Ma acoua iotshi konofo erecriki o Atua ia ta fakarogrogo ia Iesu Kristo.

²⁷Ma iotshi o acoua niamo ta baptiso ia Kristo, nakataka ia Kristo.

²⁸Konofo jimra tatane o Juteia mo o Crisi, jimra tasi fousia mo vetea, jimra tatane ma tafine, ma acoua iotshi ko tasi ana ia Kristo Iesu.

²⁹Ma pe acoua tagata o Kristo, wamurira acoua tagata o Ebraham, ma kamo anea mouri hepe ta fatshipoge.