Read Futuna-Aniwa CALEISA, 6 Bible Online

CALEISA, 6 - Futuna-Aniwa bible

CALEISA, 6

¹ANOSO pe tane tasi emna ane safi, acoua konofo ia nokano keinagi tasi hepe aia ia ta kalasia ia ta nokano o merino; nakafatshigeia tshou magane pe akoi foci sekeireresia.

²Acoua asitu tasi ma tasi foci ia anera erefia, hepe ta fakairo o Kristo.

³Ma pe tasi tane mentua aia ko sore, ma aia sisi ana, aia karasia aia.

⁴Kaia erefia ta tane fatshigeia aia pe tshana vere erefia, ma aia nakamna kabisa ia aia ane, ma jimra ia faruke.

⁵Ma tasi ma tasi foci tane iotshi kamo tshana tshipeina.

⁶Erefia aia pe fakairo ia tafasao erefia, tufwa aia kofakairo ia ane iotshi erefia.

⁷Sekarasia acoua; Atua ko jimra soutari, ma taha ta tane eipesia ia tshana magane, ioria o anera aia nakamo.

⁸Ma aia eipesia ia tshana konouri, nakamo o ta kououri kopara; kaia aia eipesia o ta Nokano, nakamo o ta Nakano aneamouri atou ma tou.

⁹Ma erefia acitia setaru ia maganerefia, ma ia taha nopoge iateia acitia kamo ta ioria, pe acitia sematese.

¹⁰Ianenei hepe nitapa iateia, erefia acitia maganerefia ia tagatotshi, ma sorekagi ia acre o ta fare o fakarogrogo.

¹¹Acoua koucitia tenei tatapuria sore avou nakaserea iacoua ia tshaku norima.

¹²Acre keiremu tagata koucitia niare magane hepe erefia ia ta konouri, torotshi acoua keisegeakage acoua; kumtacu ana ta sewa o acre ia ta fakaravasia o Kristo.

¹³Ma jimra acre neisegeakage komaganerefia ia ta fasao tapu; kaia keiremu keisegeakage acoua, pe acre kabisa ia niaua konouri.

¹⁴Kaia Atua neitucuasana pe avou kabisa, kaia ana ia ta fakaravasia o tshote Teriki Iesu Kristo ia aia ta fanua wararonei ko fakaravasia iatavou, ma avou ia ta fanua wararonei.

¹⁵Ma ia Kristo Iesu jimra segeakage mo sesegeakage asitu, kaia ta roto fou.

¹⁶Ma ia iotshi kororo ia tenei, merino ia acre, ma karofa, ma ia tagata Isreil o Atua.

¹⁷Wamurira jimra tasi tane iauiai kuroto; ma avou arafia ia tshaku notshino ta atatapuria o ta Teriku Iesu.

¹⁸Anoso ta karofa o ta Teriki Iesu Kristo konofo ia niaua nokano. Amen.