Read Futuna-Aniwa EFESUS, 4 Bible Online

EFESUS, 4 - Futuna-Aniwa bible

EFESUS, 4

¹IANENEI, avou ta tane nifousia ia ta fare mukei o ta Teriki, fakouia mukei acoua pe acoua roro erefia ia ta vere acoua nitapa iateia.

²Ia magane totonu ma sefasao sore, ia merino, ma sesaciria tasi ma tasi foci ia acitiafakarafia;

³Fatshigeia keipurutshia ta magane tasi ana totonu o ta nokano ia ta fousia o ta merino.

⁴Konofo tasi notshino, ma tasi Nokano, hepe nitapa acoua ia tasi fatshipoge o niaua nokotapa.

⁵Tasi Teriki, tasi fakarogrogo, tasi baptiso.

⁶Tasi Atua ma Tamana o iotshi, aia ko iluga iotshi, ma ia iotshi, ma ia acoua iotshi.

⁷Kaia ia iotshi o acitia ko tufwa karofa hepe ta korafa o ta kotufwa o Kristo.

⁸Ianenei aia neitucua, Ia nopoge aia nifitshi iluga, aia niarafia ta fousia nifousia, ma neitufwa akarofa ia tagata.

⁹(Ma pe aia nifitshi iluga, tenei fakairo aia nimaifanifo mokagi ia anone iraro o fanua wararonei?

¹⁰Aia nifanifo ko aia nifitshi iluga papai iluga iotshi ataragi, pe aia nakafonu ane iotshi).

¹¹Ma aia neitufwa faru apostolo; ma faru aprofeta; ma faru tagata kova tafasao erefia, ma faru fatshigeia ma fakairo.

¹²Ia ta fakairo erefia o tagata o Iesu, ma ta vere o ta kova, ma emna kabisa iateia ta notshino o Kristo.

¹³Ia taha nopoge acitiotshi koromai hepe tasi ia ta fakarogrogo, o ta arapakou o ta Nontariki o Atua, ia tane erefia, ia ta korafa o ta palo o ta kofonu o Kristo:

¹⁴Pe wamurira acitia senofo erecriki nokofakatulele icunei ma icona, ma keifia kofori ia iotshi atumtagi o afasao fakairo, ia ta arapakou isa o fakou, ma arapakou feiva ia aia acre fatshigeia keierasia.

¹⁵Kaia nokoutucua ta mari ia acitiafakarafia, nakasomo sore ia aia ia ane iotshi, aia ko ta nouru, aia ko Kristo.

¹⁶Ia aia ta iotshi notshino ko emna erefia ma fakukutshia ia tshana, ma neimna erefia ia taha iotshi, fakukuga tufwa, hepe ta vere erefia o iotshi nuntafa, nokomna kosore o ta notshino, ia ta emna aia erefia ia acitiafakarafia.

¹⁷Ianenei tenei avou koutucua, ma fasao mukei iateia ia ta Teriki, pe acoua wamurira sekororo hepe foci fakou o fanua pouri roro, ia ta mama o niare fenagaro.

¹⁸Nokoamo niare afenagaro pouri, niare roto nofo papai feimacoua ta mouri o Atua, ia ta sekeiro nofo ia acre, ia ta pouri o niare roto.

¹⁹Acre sekeiro erefia, nakatufwa iacre ia maganisa ia acre, keivere iotshi amaganisa ia keremoa.

²⁰Kaia acoua seamo hepera ta fakairo o Kristo.

²¹Pe acou nakarogona aia, ma aia nafakairo acoua, hepe ta mari ko ia Iesu;

²²Pa acoua amke towaki amagane o afasao o tane ituai, aia kopara ia karasia tosana ia maganisa;

²³Ma keipenpena fou ia ta nokano o niaua fenagaro;

²⁴Ma pe acoua kataka ia ta tane fou, aia wamuri Atua ko emna ia magane totonu ma tamari tapu.

²⁵Ianenei nokotouwaki nokorefu, iotshi fakou fasao ia tamari ia niana tagata afaruke; ma acitia nofo anuntafa tasi o tasi foci.

²⁶Erefia acoua fakainina ma semaganisa; erefia ta tara sefanifo ia niaua fakainina nokonofo.

²⁷Ma setufwa nontafa ia ta tevil.

²⁸Erefia aia nitshigo setshigo foci; kaia erefia aia kovere ia tshana anorima ta ane ko erefia, pe acoua nakamo keitufwa ia aia pe tshana kojimra.

²⁹Erefia fasao isa semai watafa niaua rogoutu, kaia afasao erefia keifakairo ma asitu ia karofa acre nofakarogona.

³⁰Ma seiauiai aroto o ta itapu Nokano o Atua, ma ia aia acoua kapare mukei ia ta nopoge arafia acoua taragi.

³¹Erefia iotshi aroto my, fakainina, ma fasao sore, ma fasosa, keitouwaki ia acoua feimacoua tagata;

³²Ma maganerefia tasi ia tasi foci, aroto mugaro, tasi seioria magane iauiai aroto o tasi foci, hepe Atua ia Kristo nakatouwaki tshana fakainina ia acoua.