Read Futuna-Aniwa EFESUS, 5 Bible Online

EFESUS, 5 - Futuna-Aniwa bible

EFESUS, 5

¹EREFIA acoua roro wamuri ta fakairo o Atua, hepe erecriki nakacitiafakarafia.

²Ma roro ia acitiafakarafia, hepe Kristo nakacitiafakarafia acitia, ma neitufwa aia ia acitia takavari nitaia mate ia Atua nokonamu erefia.

³Kaia tshigo fafine tsha faruke, ma iotshi maganisa, mo keremoa, Erefia sekoutucua tasi ia acoua, hepe maganerefia o tagata o Iesu.

⁴Ma jimra afasosa, mo afasao nokano jimra, mo fakamana, acre seerefia; kaia nokotufwa athank ia amori.

⁵Ma tenei acoua keiro, pe jimra tasi tshigo afine mo fakou o faruke, mo tasi maganisa hepra, mo tane keremoa, mo mori tetua pouri, nakamo nontafa o tavaka o Kristo ma o Atua.

⁶Fatshigeia pe tasi tane sekarasia acoua ia afasao nokano jimra, ma ia anera hepera ta fakainina o Atua komai ia erecriki semaganerefia ia ta fakairo.

⁷Natshicina acoua ta magane ma ioria o acre.

⁸Ma acoua itua pouri, kaia nelou merama ia ta Teriki, roro hepe erecriki o ta merama.

⁹(Ma ia iotshi ta nofua o ta nokano ko erefia ma magane totonu ma mari);

¹⁰Nokeiro taha ta Teriki acitiafakarafia.

¹¹Ma feke papai ta sefua avere o apouri, kaia neitucuasana acre.

¹²Ma aia ko koma keifasao o amagane acre emna ia mune.

¹³Kaia ane iotshi neitucuasana nakacitia ia ta merama, ma taha emna kacitia ko merama.

¹⁴Ianenei aia neitucua, kuara akoi komero, ma masike ia acre nimate, ma Kristo katufwa akoi merama.

¹⁵Fatshigeia pe acoua roro ia amaganerefia, jimra hepe koukali, kaia hepe arapakou.

¹⁶Segapu ia avere sore, ianenei anopoge melou isa.

¹⁷Ianenei isa acoua searapakou, kaia keiro taha ko ta fenagaro o ta Teriki.

¹⁸Ianei erefia acoua sekona ia weina, ia keinumea sore, kaia keifonu ia ta Nokano;

¹⁹Nokofasao ia arotoua ia asalm, ma ia agoro tapu o ta mori, nokofeke agaro erefia ma nokobiso ia arotoua ia ta Teriki;

²⁰Nokotufwa athank segapu ma ane iotshi ia Atua ma ta Mana ia ta neigo o tshote Teriki Iesu Kristo;

²¹Nokorogona afasao o tasi ma tasi foci o acoua ia ta kumtacu o Atua.

²²Ananahune fakarogona afasao o niaua anonwane hepe ia ta Teriki.

²³Ma ta nonwane ko ta sore o ta nanahune, hepe Kristo ko ta sore o ta kalasia, ma aia ko ta kopare o ta notshino.

²⁴Ianenei hepe ta kalasia ko nokofakarogona ta fasao o Kristo, hepe ma erefia ta ananahune fakarogona afasao o niare anonwane ia ane iotshi.

²⁵Anonwane acitiafakarafia niaua ananahune, hepe Kristo neicitiafakarafia ta kalasia ma neitufa aia ioria aia.

²⁶Pe aia nakapenpena ma tataroa aia ia tavai ia tshanafasao erefia.

²⁷Pe aia nakatufwa aia ia aia ta kalasia erefisa, seamo nopito tasi pouri mo mataru kiri mugarai, mo ane tasi hepera, kaia pe aia tapu ma sekouwiwi.

²⁸Hepe ma erefia atane acitiafakarafia niare ananahune hepe niare anotshino, aia pe acitiafakarafia tshana nanahune acitiafakarafia aia.

²⁹Ma jimra tane tasi nifeimacoua tshana konouri, kaia fakeina ma kopare aia, hepe ta Teriki ta kalasia;

³⁰Ma acitia nontafa o tshana notshino, ma o tshana konouri, mo o tshana aneive.

³¹I ane nei ta tane kafeke tshana mana ma nana, ma kafousia ia tshana nanahune, ma acrawa kanofo tasi konouri,

³²Tenei ko sore nifuna, kaia avou fasao o Kristo ma ta kalasia.

³³Ianenei erefia acoua iotshi, tasi ma sece acitiafakarafia tshana nanahune hepe aia, ma ta nanahune fatshigeia pe aia kumtacu ma asitu tshana nonwane.