Read Futuna-Aniwa FELEPAI, 1 Bible Online

FELEPAI, 1 - Futuna-Aniwa bible

FELEPAI, 1

¹PAULO ma Timotheius afetshicou o Iesu Kristo, ia iotshi tagata o Kristo Iesu nokonofo ia Felepai, ma ia abishop ma atikone;

²Karofa keitufwa iacoua, ma merino, o Atua tshote Tamana ma o ta Teriki Iesu Kristo.

³Avou thank tshaku Atua ia iotshi nimentua o acoua.

⁴Ia iotshi nopoge ia iotshi mori tshaku ma acoua nokotapa aia ia kabisa.

⁵Ma acoua tshaku anele ia afasao erefia ia ta fakatasi nopoge ia nopoge nei ma;

⁶Nokeiro tamari tenei, pe aia neikamata ta vere erefia ia acoua, aia kamna aia erefia ia ta nopoge o Iesu Kristo;

⁷Hepe aia ko erefia pe avou keimentua tenei o acoua iotshi, ianenei avou nakamo acoua ia kuroto; ia ane nei ia tshaku nifousia, ma ia tshaku nifiatu nipare ma nagi mukei o ta fasao erefia, acoua iotshi amo faru o tshaku karofa.

⁸Ma Atua keiro, tamari avou acitiafakarafia sore acoua iotshi ia ta acitiafakarafia o Kristo Iesu.

⁹Ma tenei avou mori, pe niaua acitiafakarafia nakosomo sore ma fakasore su ia ta keiro ma o iotshi ioria.

¹⁰Pe acoua nakamo anea erefia, ma pe acoua nofo ia tamari ma semagane safi ia ta nopoge o Kristo;

¹¹Nifonu ia anofua o magane totonu, acre nimai ia Jesu Kristo, ia ta sore ma kabisa o Atua.

¹²Kaia avou acitiafakarafia acoua nakeiro, anoso, pe anea nimai iatavou nakasitu avere o afasao erefia;

¹³Ma tshaku nifousia ia Kristo nakacitia ia iotshi ia tafare sore o teriki, ma ia iotshi foci anone;

¹⁴Ma nalupai anoso ia ta Teriki, koneimna tomatua sore ia tshaku fousia, ko emna tomatua keitucua ta fasao erefia sumtacu.

¹⁵Faru tamari kova Kristo ia fiatu ma fakainina, ma faru ia fenagaro erefia;

¹⁶Ta tasi kova Kristo ia fiatu, ma fakamana, mentua keiiauiai tshaku roto ia tshaku nifousia.

¹⁷Kaia ta sece o acitiafakarafia, nokeiro avou nofo keipare tafasao erefia.

¹⁸Taha wamurira? ia amagane iotshi iateia, pe ia soutari mo ia ta mari, Kristo ko kova ma ia ane nei avou kabisa, keini ma kabisa sore.

¹⁹Ma avou keiro pe tenei katafuri ia tshaku kapare ia amouri ia niaua mori, ma ta katufwa o ta Nokano o Iesu Kristo.

²⁰Hepe tshaku keremoa sore, ma tshaku fatshipoge, pe jimra ia ane tasi avou kamna koma, kaia ia iotshi tomatua sore, hepe ituai ma melou foci Kristo kasore ia tshaku notshino, pe aia komai ia ta mouri, mo ia ta mate.

²¹Ma iatavou keimouri ko Kristo, ma keimate ko erefia kage.

²²Kaia pe avou komouri ia ta konouri, tenei ko ta nohua o tshaku vere, kaia taha avou acitiafakarafia kamo avou puspusi.

²³Ma kuroto keremoa acrawa, nakeremoa keifeke, ma keinofo ia Kristo, tenei ko erefisa sore kage;

²⁴Kaia keinofo icunei ia ta konouri ko erefia keisitu acoua.

²⁵Ma nakamo tenei fakarogrogo, avou keiro avou kanofo ia acoua iotshi ma keisitu acoua ma kabisa ia ta fakarogrogo;

²⁶Pe niaua nokobisa nakamo sore kage ia Iesu Kristo iatavou ia tshaku nokomai foci iacoua.

²⁷Tenei ana erefia niaua afasao hepe erefia o Kristo, pe avou komai ma koucitia acoua, mo nofo papai, avou nakorogona o niaua magane, pe acoua kotu mukei ia tasi nokano ia tasi fenagaro, nokovere iotshi hepe tasi ia ta fakarogrogo o ta fasao erefia.

²⁸Ma jimra ia ane tasi kumtacu sore ia tagata fiatu acoua, aia ko iacre hepe fano ia tiafi sore, kaia iacoua hepe fano ia mouri, tufwa ia Atua.

²⁹Kaia iacoua aia neitufwa ia avere o Kristo, jimra ana fakarogrogo ia aia, kaia foci keisewa acoua iateia.

³⁰Nakoamo ta fiatu ra acoua neicitia ia avou, ma melou korogona keinofo ia avou.