Read Futuna-Aniwa FELEPAI, 2 Bible Online

FELEPAI, 2 - Futuna-Aniwa bible

FELEPAI, 2

¹PE faru kabisa ko ia Kristo, pe aroto merino ia acitiafakarafia, pe faru kositu ia ta Nokano, pe faru aroto komeru ia akarofa.

²Acoua emna kofonu tshaku kabisa, pe fenagaroua hepe tasi nakamo ta tasi acitiafakarafia, nokonofo ia tasi fasao ia tasi fenagaro ma.

³Erefia seemna ane tasi ia fiatu mo aroto mama, kaia ia fenagaro merino ma nofo iraro erefia tasi acitiafakarafia faruke sore kage acre.

⁴Iotshi fakou secitia anea tshana ana, kaia iotshi tane foci koucitia ta anea o faruke.

⁵Erefia tenei fenagaro nofo ia acoua, aia foci neinofo ia Kristo Iesu:

⁶Aia neinofo ia ta noata o Atua, ma nimentua aia setshigo keinofo fakatagasia tasi ia Atua.

⁷Kaia aia neimna aia iraro sisi ana, ma niamo ia aia ta vere o tasi fetshicou, ma aia neimna hepe notshino o ta tane.

⁸Ma aia nokonofo ia tasi notshino hepe tasi tane, aia neinofo iraro, ma nimy ia ta mate, ta mate o ta fakaravasia.

⁹Ianenei Atua nakanagi aia sore iluga, ma nakatufwa aia tasi neigo sore kage iluga iotshi aneigo;

¹⁰Pe ia ta neigo o Iesu iotshi nonturi fakaturi o anea ia taragi ma o anea ia fanua wararonei, ma o anea iraro ta iafanua.

¹¹Ma pe iotshi norero nakoutucua pe Iesu Kristo ko Teriki ia ta sore o Atua ta Mana.

¹²Ianenei tshaku acitiafakarafia, hepe acoua segapu fakarogona ma maganerefia, jimra hepe mokagi avou ana, kaia melou sore kage ia avou nofo papai, vere ia niaua anea mouri ia kumtacu ma nokovirviri.

¹³Ma aia ko Atua nokovere ia acoua keifenagaro ma keimna ia tshana acitiafakarafia.

¹⁴Vere ane iotshi acoua ma sekogugu ma sefiatu.

¹⁵Pe acoua nofo ia magane totonu ma seiauiai aroto o tasi, ta untariki o Atua, saciria acoua jimra, i aroto o tagata magane safi ma isa o niaua fanua, acoua noneate hepe alamp ia fanua wararonei.

¹⁶Nokofakariace iluga ta kova ta fasao o ta mouri; pe avou nakabisa ia ta nopoge o Kristo, pe avou setere ana, mo severe ana.

¹⁷Keini ma pe avou takavari mate ia niaua vere ma fakarogrogo, avou kabisa, ma kabisa ia acoua iotshi.

¹⁸Ma ia anera acoua kabisa, ma kabisa ia avou.

¹⁹Kaia avou fatshipoge ia ta Teriki Iesu keikouna Timotheius iacoua i taha nopoge itata, pe avou foci kabisa wamuri avou keiro niaua magane.

²⁰Ma avou seamo tasi tane ia tshana fenagaro hepe tshaku, aia ma tamari acitiafakarafia keiro niaua magane.

²¹Ma acreiotshi fatshigeia niare anea, jimra ta anea o Iesu Kristo.

²²Kaia acoua keiro ta mari o aia, pe hepe tasi nontariki ia ta Mana aia nakavere ia avou ia tafasao erefia.

²³Aia ianenei avou fatshipoge keikouna iacoua i nopoge itata wamuri avou keiro taha kamai iatavou.

²⁴Kaia avou fakarogrogo ia ta Teriki pe avou foci kamai ko itata.

²⁵Kaia avou mentua aia ko erefia keikouna iacoua Epafrotitus, tshaku noso, ma aia asitu avou ia ta vere, ma ia tatoua, kaia niaua tane nikouna, ma aia niavere o fetshicou iatavou.

²⁶Ma tshana roto nimy ia acoua iotshi, ma nifonu o mafa sore, ma acoua neirogona aia nimaci.

²⁷Ma ta mari aia nimaci itata nimate, kaia Atua nikarofo ia aia, ma jimra ia aia ana, kaia ia avou foci, pe avou sekamo kuroto tagi my ma foci tagi my.

²⁸Ianenei avou nakouna aia iacoua, pe ia nopoge acoua kacitia aia foci, acoua nakabisa, ma pe avou fakasisi tagi.

²⁹Ia ane nei amo aia ia ta Teriki ia iotshi kabisa, ma amo acre hepe aia ia kabisa.

³⁰Ianenei ia tavere o Kristo aia koitata nimate, sekapare niana mouri, keitufwa ta vere o fetshicou acoua seneimna iatavou.