Read Futuna-Aniwa FELEPAI, 3 Bible Online

FELEPAI, 3 - Futuna-Aniwa bible

FELEPAI, 3

¹KURAVA, akuso, kabisa ia ta Teriki, keiserea ane ra iacoua, seiauiai kuroto kaia aia ko erefia iacoua.

²Fatshigeia akuli, fatshigeia tagata kovere isa, fatshigeia ta segeakage.

³Ma acitia nofo ta segeakage, ma komori Atua ia ta nokano, ma kabisa ia Kristo Iesu, ma sefakarogrogo ia ta konouri.

⁴Pe avou foci ma nafakarogrogo ia ta konouri, pe tane tasi foci mentua aia nakamo taha asitu aia fakarogrogo ia ta konouri, avou sorekagi;

⁵Avou neisegeakage ia ta nopoge varu, o tagata o Ebraham, o ta nontafa o Benjemin, tasi Hibru o tagata Hibru, wamuri tafasao tapu tasi Farasi;

⁶Ia tomatua iateia, nokosewa ta kalasia, ma ia magane totonu o tafasao tapu, semagane safi.

⁷Kaia ane iotshi avou neicitiafakarafia, anera avou nitouwaki ia Kristo.

⁸Keini ma tamari, avou mentua anea iotshi touwaki ia ta erefia sore su o ta nokeiro o Kristo Iesu tshaku Teriki; ia aia avou nakatouwaki ma feke anea iotshi, ma mentua acre iotshi hepe untai pe avou amo Kristo.

⁹Ma neicitia ia aia, seamo tshaku magane totonu aia ko o tafasao tapu, kaia tera komai o ta fakarogrogo o Kristo, ta ioria totonu komai o Atua ia fakarogrogo;

¹⁰Pe avou keiro aia, ma ta tomatua o tshana masike ia acre nimate, ma ta asitu o tshana amy sore, nokopenpena avou ia tshana mate;

¹¹Pe ia aneiotshira avou nakamo ia ta masike o ta mate.

¹²Jimra hepe melou avou nakamo aia, mo melou neipenpena erefia avou; kaia avou fano wamuri ra, pe avou nakamo tera iateia aia niamo avou ia Kristo Iesu.

¹³Anoso, avou sementua avou nakeiamo, kaia tenei ane tasi avou emna, nokonigaro anea mane ituai, ma fakatonusia ia anea mane kamai,

¹⁴Avou tere meloua ia ta nomata o ta nokotapa o Atua ia Kristo Iesu.

¹⁵Ianenei erefisa acitia neipenpena erefia, ma mentua hepera, ma pe ia ane tasi acoua mentua sece, Atua kafakairo tenei iacoua.

¹⁶Kaia ia anea acitia melou keiro, erefia acitia roro ia ta tasi karafa, erefia acitia mentua fatshigeia tenei ane.

¹⁷Anoso, acoua fakatapuri keiroro wamuri avou, ma fatshigeia acre roro hepe acoua neicitia ia amagane o acime.

¹⁸(Ma nalupai roro, o acre avou nakafasao acoua ia nopoge nalupai, ma melou koutucua iacoua nokotagi, pe acre nofa ma feimacoua ta fakaravasia o Kristo;

¹⁹Niare kurava ko takaroiai, niare Atua ko niare nonai, niare bisa ko niare komai, acre mentua ane o iafanua).

²⁰Ma tshote fasao ko ia taragi, feke aia foci mai acitia kamata aia ta kapare, ta Teriki Iesu Kristo.

²¹Aia kafuri fou tshote notshino isa, pe aia nakamna hepe tshana noneate notshino erefisa, hepe ta vere ia aia aia tomatua keinage ane iotshi iraro aia.