Read Futuna-Aniwa KOLOSE, 4 Bible Online

KOLOSE, 4 - Futuna-Aniwa bible

KOLOSE, 4

¹FATERIKI tufwa niaua afetshicou anea mane erefia ma totonu, nokeiro pe acoua foci nakamo tasi Teriki ia taragi.

²Segapu ia amori ma fatshigeia ia aia ia tufwa athank.

³Ia ane iotshi nokomori aia asitu acime, pe Atua tshiki ia acime tafeitoca o kova, keifasao ta funa o Kristo, ia aia avou fousia.

⁴Pe avou tomatua keifasao o aia, hepe erefia avou keifasao.

⁵Roro ia ta arapakou iacre efuafo, segapu ia avere.

⁶Erefia niaua fasao nopoge ma nopoge ia mugaro, neimna erefia ia tara, pe acoua nakeiro taha erefia keitucua ia ioria o afasao o tagatotshi.

⁷Iotshi anea mane tshaku Tykikus katucua iacoua, aia tasi noso acitiafakarafia, ma tasi mari fetshicou o ta kova erefia ma fetshicou keisitu ia ta Teriki.

⁸Aia avou nakouna iacoua ia avere nei, pe aia nakeiro niaua amagane, ma emna niaua aroto kabisa.

⁹Ia Onesemus tasi mari ma acitiafakarafia anoso, aia ko tasi o acoua. Acrawa katucua iacoua ane iotshi pe emna icunei.

¹⁰Aristarkus tshaku nele nifousia ia avou alofa acoua, ma Markus ta nontariki o ta kave o Barnabus (o aia avou neiserea mokagi iacoua, pe aia komai iacoua, arafia aia),

¹¹Ma Iesu nitapa aia Justus acrawa o ta segeakage, Acre ana ko tshaku tagata asitu ia ta vere ia ta vaka o Atua, acre nakamna avou kabisa.

¹²Epafras tasi o acoua, tasi fetshicou o Kristo alofa acoua, ia nopoge ma nopoge segapu ia amori ma acoua pe acoua kotu mukei ma penpena erefia ia avere iotshi o Atua.

¹³Ma avou koutucua iacoua pe aia acitiafakarafia sore acoua, ma acre o Laotasia, ma acre o Hairapolis.

¹⁴Lukus ta nakacitiafakarafia toktor, ma Timas alofa acoua.

¹⁵Alofa ta anoso konofo ia Laotasia ma Nympas, ma ta kalasia konofo ia tshana fare.

¹⁶Ma wamuri tenei tatapuria ko nitawa ia acoua, emna aia foci keitawa ia ta kalasia o Laotasia, ma acoua foci tawa ta tatapuria ia Laotasia.

¹⁷Ma koutucua ia Arshipus, Fatshigeia erefia ta vere o ta kova, nakatufwa akoi ia ta Teriki, pe akoi vere erefia ia aia.

¹⁸Ta alofa ia ta norima o avou Paulo. Mentua tshaku afousia. Karofa ia acoua. Amen.