Read Futuna-Aniwa FAKATASI THISALONAIKA, 4 Bible Online

FAKATASI THISALONAIKA, 4 - Futuna-Aniwa bible

FAKATASI THISALONAIKA, 4

¹WAMURIRA anoso, acime fakouia mukei acoua, ma fakairo acoua ia ta Teriki Iesu, pe acoua nakafakairo iacime keiroro ia maganerefia emna Atua keibisa, hepe ma acoua nakasore ma sore kagi.

²Ma acoua keiro taha afasao tapu mukei acime neitufwa acoua ia ta Teriki Iesu.

³Ma tenei ko ta fenagaro o Atua, keipenpena erefia acoua, pe acoua setshigo fafine tsha faruke;

⁴Pe tasi ma sece o acouaiotshi nakeiro keipurutshia tshana magane totonu ma erefia.

⁵Ma jimra ia nokomoko, hepe tagata o fanua pouri acre sekeiro ta Atua.

⁶Pe jimra tane tasi maganisa ma karasia tshana noso ia ane tasi, ianenei ta Teriki keiioria iotshi hepera, hepe acime foci neitucua mokagi iacoua, ma nikova.

⁷Ma Atua setapa acitia ia maganisa kaia ia magane itapu erefia.

⁸Ianenei aia feimacoua sa, sefeimacoua tagata, kaia Atua, aia foci nakatufwa acitia tshana Nokano Tapu.

⁹Kaia i acitiafakarafia anoso, avou seserea iacoua, ma acoua nifakairo o Atua keicitiafakarafia tasi ma tasi foci o acoua.

¹⁰Ma tamari acoua emna tenei ia iotshi anoso nokonofo ia Masitonia; kaia acime fakoia mukei acoua anoso, pe acoua somo sore ma sore kagi.

¹¹Ma pe acoua fatshigeia keinofo merino, ma emna niaua vere, ma keivere ia niaua arima, hepe acime nifakairo mukei acoua.

¹²Pe acoua roro ia magane totonu ia acre nofo watafa, ma pe niaua anea mane sekobune;

¹³Kaia avou secitiafakarafia anoso pe acoua sekeiro taha o acre nimero ia ta mate, pe acoua setagi hepe tagata sekamo nanacina.

¹⁴Ma pe acitia fakarogrogo pe Iesu nimate ma nimasike foci, hepe ma acre mero ia Iesu Atua karafia mai ia aia.

¹⁵Ma tenei acime koutucua iacoua ia ta fasao o ta Teriki, pe acitia komouri ma konofo ia ta nokomai o ta Teriki sekapofna teretu iacre nimero.

¹⁶Ma ta Teriki aia kafanifo ia taragi ia ta noreo sore, ia ta noreo o ta sore agelo, ma ia ta tupu o Atua, ma ta mate ia Kristo kamasike mokagi;

¹⁷Wamuri acre acime mouri ma nofo katorotshia iluga fakatapuria ia acre ia ta apa, keitapa ta Teriki ia ta vavania; ma hepe acitia kanofo atou ma tou ia ta Teriki.

¹⁸Ianenei emna aroto o tasi ma tasi foci keibisa ia afasao ra.