Read Futuna-Aniwa FAKATASI TIMOTHEUS, 1 Bible Online

FAKATASI TIMOTHEUS, 1 - Futuna-Aniwa bible

FAKATASI TIMOTHEUS, 1

¹PAULO ta apostolo o Iesu Kristo ia tafasao o Atua tatane kapare acitia, ma Teriki sore Iesu Kristo, aia, ko tshote nanacina;

²Ia Timotheus, tshaku nontariki ia ta fakarogrogo; Karofa, ma seioria magane isa, ma aroto kogapu merino, i Atua Tamanoteia, ma Iesu Kristo tshote Teriki sore.

³Hepe avou neitucua mukei iatakoi konofo mana ia Efesus, nopoge ra avou nifeke ma fano ia Masitonia, pe akoi neitucuasana mukei faru tagata pe acre sefakairo tafasao o foci fakairo.

⁴Ma natshicina fakarogona afasao o anea mane nontafito kojimra, ma aneigo o fatamanorea sekobune, acre tufwa anea fakowia ana, ma jimra afasao erefisa emna arotowa kabisa ia ta fakarogrogo.

⁵Milow ta nokano o tafasao tapu kokarofa tagata ia aroto mari, ma ia fenagaro erefia, ma o fakarogrogo sefeiva;

⁶Faru niroce acre, ma nitafuri ia afasao isa nontafito ma nokano jimra;

⁷Acre acitiafakarafia acre fakou fakairo o tafasao tapu; ma acre sekeiro mana taha acre koutucua, mo taha acre fakairo.

⁸Kaia acime keiro ta fasao tapu ko erefia, pe tatane maganerefia iateia;

⁹Nokeiro tenei, pe tafasao tapu seimna ia takou maganerefia, kaia ia acre semagane totonu ma serogona ta neitucuasana, ma ia acre secitiafakarafia Atua ma maganisa, ia acre isa ma tafasosa, ia acre kotaia tamanorea, ma kotaia nanorea, ma kotaia tagata ana.

¹⁰Ma ia acre tshigo fafine, ma tatane tsha faruke, ia acre maganisa ia takou, ia acre tshigo tagata, ia acre korefu, ia acre korefu ia Atua i afasao tapu, ma pe magane safi foci konofo fakairo tapu neitucuasana.

¹¹Hepe tafasao erefia o Atua sore erefisa, aia neitufwa iatavou fakairo.

¹²Avou kabisa ia Kristo Iesu tshote Teriki sore, aia neitufwa avou tomatua iateia, ma nikeiro tshaku fakarogrogo, keinagi avou ia ta vere fakairo ma kova tafasao erefia;

¹³Mokagi avou tatane nifasosa tapu, ma nisewa tagata tsha Iesu, ma iaueai acre; kaia aia seioria avou, ianenei avou neimna amaganera ia aroto pouri ia sefakarogrogo.

¹⁴Ma karofa sore su o tshote Teriki sore ia fakarogrogo ma acitiafakarafia aia konofo ia Kristo Iesu.

¹⁵Tenei tafasao komari, ma erefisa tagatotshi fakarogrogo aia, pe Kristo Iesu niamai ia fanua wararonei keipare tagata isa; ma o acre avou sore kagi isa.

¹⁶Kaia ia ane nei aia seioria avou, pe ia avou mokagi Iesu Kristo nifakariake aroto merino, keifakairo tshana magane hepra iacre wamuri nei kafakarogrogo aia ia anea mouri tou ma tou.

¹⁷Milow ia Teriki sore aia neinofo mokagi ane iotshi, aia semate, secitiamana aia, aia ana Atua arapakou, keitufwa kabisa ma ta sore tou ma tou. Amen.

¹⁸Tenei fasao mukei avou tufwa iatakoi, tucu tariki Timotheus, hepe afasao o aprofeta neitucua makagi o akoi, pe akoi ia acre tomatua vere ia tatowa erefisa;

¹⁹Nokopurutshia fakarogrogo, ma fenagaro erefia; ane ra faru nakotowaki ia ta fakarogrogo nakamna magane hepe tavaka kokero;

²⁰Haimenius ma Aliksanter erua o acre; acrawa avou neinage ia Satana, pe fakairo acrawa natshicina tafasosa tapu.