Read Futuna-Aniwa FAKARUA TIMOTAHEUS, 1 Bible Online

FAKARUA TIMOTAHEUS, 1 - Futuna-Aniwa bible

FAKARUA TIMOTAHEUS, 1

¹PAULO to apostolo o Iesu Kristo ia fenagaro o Atua, hepe neitucua kei tufwa anea mouri konofo ia Kristo Iesu,

²Ia Timotheus, tshaku nontariki kacitiafakarafia sore; karofa, ma seioria magane, ma aroto merino, i Atua ta Mana ma Kristo Iesu tshote Teriki sore.

³Avou kabisa ia Atua, aia avou vere iateia ia tshaku fatamana ia fenagaro totonu, pe segapu avou kamentua akoi ia tshaku mori tupo ma tiau;

⁴Acitiafakarafia sore keicitia akoi, nokomentua tshou anoreimata, pe imna avou fonu ia kabisa;

⁵Avou kamentua ta sefakamana fakarogrogo konofo ia akoi, aia neinofo mokagi ia tshou tumpopuna Lois, ma ia tshou nana Iunise; ma avou keiro ta mari ia akoi foci.

⁶Ianenei avou koutucua imna akoi nokomentua pe akoi tshicitshiakace ta karofa o Atua, aia konofo ia akoi ia fecitshia o tshaku arima.

⁷Ma Atua setufwa acitia ta nokano o kumtacu; kaia o tomatua; ma o acitiafakarafia, ma o fenagaro arapakou.

⁸Natshicina akoi koma ia afasao erefia o tshote Teriki sore, mo o avou tshana tatane fousia ia tafare mukei; kaia erefia akoi kamo foci ia anea mane takaroiai afasao erefia hepra ta tomatua o Atua;

⁹Aia nakapare acitia, ma nitapa acitia ia erefisa nokotapa, jimra hepe tshote avere, kaia hepe tshana nimentua ma karofa, mokagi neitufwa acitia ia Kristo Iesu mokagi ta neikamata o fanua wararonei;

¹⁰Kaia milow kofakareake iacitia ia ta nokomai o tshote Tatane kapare Iesu Kristo, aia niamke tomatua o ta mate, ma niamomai anea mouri ma semate tou ma tou ia ta merama o tafasao erefia:

¹¹Iateia aia neinage avou ia ta kova, ma tasi apostolo, ma tasi keifakairo tagata o fanua pouri.

¹²Ianenei avou foci aroto komy i ane iotshi ra; kaia avou sekoma; ma avou keiro aia avou nakafakarogrogo, ma keiro tamari pe aia tomatua keipurutshia ane ra avou nakatufwa iateia ia taha nopoge tera.

¹³Kopurutshia mukei ma totonu afasao erefia, acre akoi nakaragona o avou, ia fakarogrogo konofo ia Kristo Iesu.

¹⁴Ane erefia tera neitufwa akoi keipurutshia ia ta Nokano Tapu aia konofo i acitia.

¹⁵Tinei akoi keiro, pe acre iotshi konofo ia Esia nitafuri natshicina avou; erua o acre Fijelus ma Hermojinis.

¹⁶Ta Teriki sore keitufwa karofa ia tafare o Onesiforus; ma aia nopoge nalupai neimna avou kabisa ma aia sekoma o tshaku tous:

¹⁷Kaia nopogera aia nimai ia Roma aia nisara mukei avou, ma neicitia avou.

¹⁸Ta Teriki sore keitufwa iateia pe aia amo karofa o ta Teriki sore ia taha nopoge tira; ma i ane nalupai aia niavere iatavou ia Efesus, akoi keiro mari.