Read Futuna-Aniwa FAKARUA TIMOTAHEUS, 2 Bible Online

FAKARUA TIMOTAHEUS, 2 - Futuna-Aniwa bible

FAKARUA TIMOTAHEUS, 2

¹AKOI tshaku nontariki, erefia akoi tomatua ia ta karofa aia konofo ia Kristo Iesu.

²Ma ane iotshi akoi neirogona avou koutucua emoa tagata nalupai, acre ra akoi tufwa ia tagata maganerefia ma totonu, pe acre tomatua fakairo faru foci tagata.

³Akoi ma tomatua kavere sore hepe takou erefia tsha tatowa o Iesu Kristo.

⁴Jimra tasi tatane o tatowa imna avere sore o fanua wararonei, pe aia vere arefia imna aia kabisa neikamata aia ia ta vere o tatowa.

⁵Ma pe tatane tasi acitiafakarafia aia kavere sorekage tagatotshi, aia seamo ioria o aia sore kage, pe aia semagane totonu iateia.

⁶Erefia tatane vere iatavere kakeina mokagi o ta nohua.

⁷Kamentua taha avou koutucua; ma ta Teriki sore Tufwa akoi arapakow keiro ane iotshi.

⁸Kamentua pe Iesu Kristo o erecriki o Tevit, neitshicitshiakace ia tagata nimate hepe tshaku fasao erefia:

⁹Iateia acre nisewa avou hepe avou tagata isa, ia fousia avou; kaia ta fasao o Atua sefousia;

¹⁰Ianenei tucu roto komy ia merino i ane iotshi, ia tagata neikamata o Atua pe acre foci makamo ania mouri konofo ia Kristo Iesu ia ta sore ia taragi tou ma tou.

¹¹Tenei fasao komari: Ma pe acitia komate iateia, acitia foci kamouri ia aia:

¹²Pe sewa acitia, foci acitia kanofo iluga erefia iateia: pe acitia kovetea aia, aia foci kavetea acitia:

¹³Pe acitia sefakarogrogo, aia konofo komari: aia sekovetea aia.

¹⁴O ane iotshi ra koutucua asitu acre kamentua, nokofasao mukei acre emoa ta Teriki sore pe acre sekofiatu i afasao nokano jimra, kaia ia takaroiai o acre korogona.

¹⁵Kamentua akoi maganerefia hepe Atua acitiafakarafia, tatane tasi kovere ma sekoma ia avere tshou, nokovaia totonu tafasoa o tamari.

¹⁶Kaia neitucuasana ma nifeke afasosa tapu ma afasao nokano jimra: ma acre katufwa sore sekumtacu Atua.

¹⁷Ma tshare afasao kakeina hepe magane o ta manuka isa; erua o acre Haimeneus ma Felitus;

¹⁸Ia tafasao o ta mari acre koutucua safi, nokoutucua pe ta masike o tagata nimate nimaice kurava milow; ma acre takaroiai ta fakarogrogo o faru.

¹⁹Kaia ta nontafito o Atua nofo mukei, nokoamo ane tenei mukei iateia, Ta Teriki sore keiro acre niana tagata. Ma erefia acre iotshi tagata nokoutucua ta neigo o Kristo feke ane isa iotshi.

²⁰Kaia ia tasi tafare sore, konofo jimra ana aganea o colt ma selver, kaia foci o terarakou ma o takere; faru ia vere erefia, ma faru ia vere isa.

²¹Pe tatane tasi penpena tshana roto ia anera, aia kahepe taganea ia vere erefisa, neipenpena ma neimna erefia ia avere o ta teriki, ma tomatua ia avere erefia iotshi.

²²Feke foci amaganisa atumtane acitiafakarafia: kaia kofano wamuri maganerefia, fakarogrogo, karofa tagata niare ane jimra, aroto merinu ia tagatotshi, ia acre kotapa ia mori ta Teriki sore i aroto koma.

²³Kaia natshicina afasao fakowia ane isa ma ane sefakairo ia tatapuria, nokeiro acre nontafito o afiatu.

²⁴Ma ta fetshicow o ta Teriki sore erefia aia sefiatu; kaia afasao erefia ia tagatotshi, arapakou ia fakairo tagata, aroto merinu sefakainina milowa,

²⁵Ia fenagaro totonu nokofakairo acre fiatu aia; pe Atua tufwa iacre keitagi maganisa niare, ma keipurutshia ta mari;

²⁶Ma pe acre makafeke ma natshicina ta natshicitshia o tiapolo, acre aia nipurutshia niarafia hepe aia acitiafakarafia.