Read Futuna-Aniwa FAKARUA TIMOTAHEUS, 3 Bible Online

FAKARUA TIMOTAHEUS, 3 - Futuna-Aniwa bible

FAKARUA TIMOTAHEUS, 3

¹KEIRO tenei foci, pe ia taha anopogi wamuri anopoge isa kamai.

²Ma takou acitiafakarafia acre ana, keiremu anea tsha faruke, fasao sore ia niare avere, arotorea kosore, acre fasosa tapu, serogona ta fasao o tamanorea ma nanorea, semaganerefia, isa.

³Tshare acitiafakarafia ia niare tagata kojimra, acre keiresia ia afasao tshare, korefu ia magane o tagata, maganisa, fakainina fasao sore ma isa, feimacowa acre tagata erefia,

⁴Karasia niare tagata, aroto mukei, fenagaro sore, acre acitiafakarafia maganisa sore kage niare acitiafakarafia o Atua;

⁵Acre nokoamo noaga o maganerefia ia Atua, kaia nikovetea ta nokano o maganera; i acre ra kafuri akoi natshicina acre.

⁶Ma hepra acre ra, acre kotoro i afare, ma arafia afene taru ma niare amaganisa sore, niarafia ia keiremu,

⁷Nokofakairo acre tou ma tou, kaia acre sekeiromana ta mari.

⁸Hepe Janis ma Jambris nifiatu Moses, acre ra foci ma fiatu ta mari; takou fenagaro isa, isa ana ia ta fakarogrogo.

⁹Kaia acre sekororo foci ia magane ra; ma niare magane safi tagatotshi kacitia, hepe neicitia tsharawa ituai.

¹⁰Kaia akoi keiro erefia iotshi tshaku fakairo, magane ma nopoge, taha avou kamentua imna, fakarogrogo, aroto merino sefakainina milowa, karofa tagata, aroto totonu.

¹¹Asewa, aroto tamy, ia ane isa nimai iatavou ia Antiok, ia Aikoneum, ia Laistra; ia nisewa nalupai aroto nimy; kaia ta Teriki sore nipare ma niarafia avou watafa acre iotshi.

¹²Keine, ma acre iotshi kamaganerefia Kristo Iesu kasewa acre.

¹³Kaia takow isa ma karasia kamaganisa sore ma sore kage, nokarasia tagata, ma nokarasia i arotorea.

¹⁴Kaia konofo mukei akoi ia anea mane nifakairo akoi iateia, ma akoi nakeiro ta mari, nakeiro akai nifakairo akoi iacre;

¹⁵Ma nopoge ma nopoge akoi tamasisi ma akoi nakeiro tafasao tapu neisereace, acre tomatua keitufwa akoi arapakow ia ania mouri taragi ia ta fakarogrogo konofo ia Kristo Iesu.

¹⁶Iotshi afasao tapu neisereace kotufwa ia fakairo o Atua, ma koerefia keifakairo, keitucuasana, keisaciria, keifakairo ia maganerefia:

¹⁷Pe tatane o Atua keiro erefia ane iotshi, nifakairo aia magane totonu erefia ia iotshi avere erefia.