Read Futuna-Aniwa FAKARUA TIMOTAHEUS, 4 Bible Online

FAKARUA TIMOTAHEUS, 4 - Futuna-Aniwa bible

FAKARUA TIMOTAHEUS, 4

¹IANENEI avou koutucua mukei iatakoi emoa Atua, ma ta Teriki sore Iesu Kristo, aia katucua ioria o tagata mouri ma mate ia taha nopoge aia nokomai ia tshana vaka;

²Kova ta fasao erefia; tomatua iateia ia tupo ma tiau pe tagata fakarogrogo mo jimra, keitucuasana, keisaciria, ma keifakairo ia fenagaro totonu ma fakairo erefia.

³Ma taha nopogi kamai acre sefakarogona afasao o fakairo erefia; kaia hepe tshare fenagaro acitiafakarafia amagane safi acre kanage iacre takou fakairo safi, atarega nokocitiafakarafia fakarogona ane safi;

⁴Ma acre katafuri niare atarega keinatshicina ta mari, ma acre katafuri ia afasao nokano ma nontafito jimra.

⁵Kaia fatshigeia akoi ia ane iotshi, sefura anea takaroia aroto, imna ta vere o tatane fakairo ma kova, vere tomatua ma erefia ia tshowa vere.

⁶Ma milow avou neipenpena erefia ia keitshi avou komate, ma ta nopoge o tshaku mate koitata.

⁷Avou nakafakoko ia tatowa erefia, avou nitere iotshi tshaku retu, avou nakapurutshia ta fakarogrogo;

⁸Wamuri nopoge nei aia neinage iatavou tasi topurou o maganerefia, aia ta Teriki sore, aia ioria totonu, katufwa avou ia taha nopoge tira; ma jimra iatavou ana, kaia iacre iotshi pe acitiafakarafia tshana nokomai foci.

⁹Erefia akoi tomatua komai iatavou milowa;

¹⁰Ma Timas neinatshicina avou, nakacitiafakarafia tenei fanua wararonei, ma nifeke fano ia Thisalonaika; Kresens ia Calatia, Taitus ia Talmatia.

¹¹Lukas ana konofo iatavou, Amo Markus, ma arafia mai aia ia akoi; ma aia asitu sore avou ia ta fakairo ma kova.

¹²Ma Taikekus avou nakownace ia Efesus.

¹³Ta tumega iluga avou neinage ia Troas ia Karpus, ia taha nopoge akoi komai amomai aia ma atatapuria, kaia kowcitia mukei atatapuria neiserea ia nokiri o ane.

¹⁴Aliksanter tatane vere ia kopa nimaganisa sore iatavou; ta Teriki sore ioria aia hepe niana avere.

¹⁵Akoi foci fatshigeia aia; ma aia nakafiatu sore tshome afasao.

¹⁶Ia anopogera mokagi acre nogia avou tshaku magane jimra tatane tasi nitu ia avou, kaia tagatotshi nifeke natshicina avou; avou mori Atua pe aia seioria acre iateia.

¹⁷Kaia ta Teriki sore nitu ia avou, ma neimna avou tomatua, pe ia avou ta nokovo acre makeiro erefia, ma pe iotshi tagata o iafanua pouri makarogona; ma aia nipare avou ia rogoutu o ta lion.

¹⁸Ma ta Teriki sore kapare avou ia iotshi vere isa, ma kapare avou ia tshana tavaka ia taragi, ia aia keitufwa ta sore tou ma tou. Amen.

¹⁹Kalofa Preska ma Akwela, ma tagata o ta fare tsha Onesiforus.

²⁰Irastus neinofo ia Korenth; kaia Trofimus avou neinatshicina ia Militum aia nimace.

²¹Erefia pe akoi tomatua iateia komai mokagi anopoge mukaligi mai. Ebulus karofa akoi, ma Putins, ma Linus, ma Klautia, ma iotshi anoso.

²²Ta Teriki sore Iesu Kristo konofo ia tshou nokano, Karofa o Atua konofo iatakoi. Amen.