Read Futuna-Aniwa HIBRU, 1 Bible Online

HIBRU, 1 - Futuna-Aniwa bible

HIBRU, 1

¹ATUA aia ituai ia atou nalupai, ma ia magane nalupai nifasao ia tamanote ia aprofeta,

²Ia anopoge nei wamuri nakofasao iacitia ia tshana nontariki aia nakanagi keiamo ane iotshi tshana, ia aia foci aia neimna iafanua iotshi.

³Aia neinofo ia ta noneate o tshana sore, ma ta noneate o tshana notshino, ma tshicitshiakace anea iotshi ia ta fasao o tshana tomatua, wamuri aia ia aia neitetaroace tshote amaganisa, neinofo ia ta norima matou o Ihova iluga;

⁴Neimna aia erefia sore kagi ta agelo, hepe aia nakamo neitufwa ia aia ta neigo sore kagi acre.

⁵Ma ia taha agelo neitucua aia ia nopoge tasi. Akoi tshaku nontariki, nopoge nei avou nakamo akoi? Ma foci avou kanofo ia aia ta mana, ma aia kanofo iatavou ta nontariki?

⁶Ma foci ia ta nopoge aia niarafia mai aia ta noraimutu ia ta fanua wararonei, aia tucua, ma erefia iotshi agele o Atua mori aia.

⁷Ma o ta agelo aia neitucua, aia nokomna tshana agelo anokano, ma tshana afetshicou ta koura o tiafi.

⁸Kaia ia ta nontariki aia neitucua, Tshou, thron, kaia Atua, konofo atou ma tou; ta tokotoko o magane totonu ko ta tokotoko o tshou vaka.

⁹Akoi nakacitiafakarafia amagane totonu, ma nefeimacoua amaganisa; ianenei Atua, tshou Atua nakamosia akoi ia ta vaineu o nokobisa iluga tshou anele iotshi.

¹⁰Ma akoi Teriki, ia ta neikamata nakanagi ta ave o iafanua wararonei, ma ta ataragi nofo ta avere o tshou anorima.

¹¹Acre iotshi takaroiai; kaia akoi konofo; ma acre iotshi kapopo hepe tumega ituai;

¹²Ma hepe tasi mega akoi kapuria acre, ma acre kafuri; kaia akoi konofo tasiana, ma tshou atou sekurava.

¹³Kaia ia akai o ta agelo aia neitucua ia tasi nopoge, nofo akoi ia tshaku norima matou, ia taha nopoge avou kanagi acre iotshi feimacoua akoi nofo iraro tshou avai?

¹⁴Acre iotshira afetshicou anokano mo, kounace keiasitu acre tagata nakamo anea mouri atou ma tou?