Read Futuna-Aniwa HIBRU, 10 Bible Online

HIBRU, 10 - Futuna-Aniwa bible

HIBRU, 10

¹MA ta fasao tapu nakamo ta ata o anaea erefisa keimai ma jimra ta ata mari o anea, nijimra ia ta akavari nitaia mate niavatu atou ma tou segapu penpena acre kavatu acre erefia.

²Pe hepera acre segapu keivatu? ianenei acre komori? ia acre neipenpena fakatasi, wamurira sekumtacu ia tshana fenagaro o ta ioria o amaganisa.

³Kaia ia atakavaria nitaia mate, ta mentua o anea isa ko neimna atou ma tou iotshi.

⁴Ma ta toto o akurimatou tane mo o anane taru ma setoumatua keiamke amaganisa.

⁵Ianenei ia nopoge aia nokomai ia fanua wararonei, aia neitucua, Akavari mate ma anea kavatu akoi secitiafakarafia, kaia tasi notshino akoi nakamna iatavou.

⁶Ia akavari tugia, ma akavari taia mate kovatu ioria o amaganasi akoi senakabisa.

⁷Ia anopoge ra avou neitucua, koucitia, avou komnai (ia ta tatapuria aia ko serea o avou), keimna taha tshou fenagaro acitiafakarafia, Atua.

⁸Iluga aia neitucua, akavari taia mate, ma anea kavatu, ma akavari tugea, ma akavari ioria maganisa akoi secitiafakarafia, ma sekabisa ia acre, niavatu ia tafaso tapu;

⁹Wamurira aia neitucua, koucitia, avou komai keimna taha tshou fenagaro acitiafakarafia, Atua. Aia niamke ta fakatasi, pe aia nakanagi ta fakerua mukei.

¹⁰Ia tenei rekamna morea acitia nakapenpena erefia ia ta niavatu o ta notshino o Iesu Kristo ia nopoge tasi ana kurava ia iotshi.

¹¹Ma iotshi tane tapu kotu nopoge ma nopoge nokovere ma nokovatu akavari ra mate, acre taru ma setomatua amke ioria o amaganisa.

¹²Kaia tenei tane wamuri aia niavatu tasi takavari ioria o amaganisa atou matou, neinofo ia ta norima matou o Atua;

¹³Wamurira nokeremoa ta nopoge iotshi feimacoua aia kanagi iraro tshana vai.

¹⁴Ma ia tasi kavatu aia nakamna erefisa atou ma tou acre neipenpena.

¹⁵Ia tenei ta Nokano Tapu foci ko fakairo ia acitia, ma wamuri aia neitucua mokagi,

¹⁶Tenei ko ta rakumna morea avou kamna ia acre, wamuri anopogera koutucua ta Teriki, avou kanagi tshaku fasao tapu ia arotorea, ma ia niare afenagaro avou kaserea acre.

¹⁷Ma niare amaganisa ma safi avou sementua foci.

¹⁸Ma wehe nori amaganisa koamke, kurava kavatu anea nori o ane isa.

¹⁹Ianenei anoso, nakamo tomatua keiroro ia ta rotapa tapu sore kagi ia ta toto o Iesu.

²⁰Ia ta fou ma nokomouri terktu, aia neimna erefia iacitia, ia ta megatouria pofua, nokano tenei ko tshana konouri;

²¹Ma nakamo ta sore tane tapu iluga ta fare o Atua.

²²Erefisa acitia koromai fakaliki ia ta roto mari, ia fonu tomatua o fakarogrogo, nakamo arototeia kotasocina keiamke afenagaro isa ma, anotshinote nitetaroace ia ta vai ekira.

²³Erefia acitia purutshina mukei ta fakarogrogo o tshote nanacina sekumtacu; ma aia mari nakatufwa ta fatshipoge;

²⁴Ma erefia acitia fatshigeia acitia keiarafia ia acitiafakarafia ma avere erefia.

²⁵Sefeke ma senatshicina ta fetacina o acitia fakatapuria, hepe magane o faru, kaia nokofakairo tasi ma sece o acitia, ma tomatua iateia hepe acoua koucitia ta nopoge ko itata.

²⁶Ma pe acitia keiremu maganisa wamuri acitia nakamo ta keiro o tamari, sekonofo tasi foci takavari keitaia mate ta ioria o amaganisa.

²⁷Kaia ta mari kumtacu nokofatshigeia o ta ioria keimai ma fakainina sore hepe tiafi, aia kakeinace acre isa fiatu.

²⁸Aia pe nifakamana tafasao tapu neisera ia Moses nitai aia mate searofa aia pe erua mo toru tagata neitucua mukei, neirogona aia.

²⁹Mentua acoua taha ta sore kagi ioria, o aia nakatamea ta Nontariki o Atua, ma mentua ta toto o ta rakamna morea, ia aia neipenpena aia, ane isa, ma nakafeimacou ta Nokano o akarofo.

³⁰Ma acitia keiro aia nakatucua, Ioria amaganisa ko tsaku vere, avou kaioria, koutucua ta Teriki, ma foci, Ta Teriki kaioria tshana tagata.

³¹Aia ko ta ane kumtacu sore iateia keikoto ia anorima o ta nokomouri atua.

³²Kaia mentua anopoge ituai ia acre wamuri nifakairo acoua ta merama, acoua neinofo merino ia fiatu o sewa sore.

³³Faru ia acre neimna acoua nofo pa tagata koucitia acoua ia saciria acoua ma iauia arutoua, ma ia nopoge acoua neinofo aneli o acre nitakaroiai hepera.

³⁴Ma acoua nialofa ma tagi avou ia nifousia tshaku, ma neinofo nibisa ia acre nitakaroiai niaua auta, nokeiro ia niaua aroto pe acoua nakamo ia taragi ta erefisa kagi ma semeru outa.

³⁵Ianenei setouwaki niaua tomatua fakarogrogo, aia nakamo sore ioria iacoua.

³⁶Ma erefia acoua tari merino, pe wamuri acoua nakamna avere hepe ta fakairo o Atua, acoua nakamo ta fatshipoge.

³⁷Ma wamuri nei fakasisi ana, ma aia kamai, kamai ma sekatari.

³⁸Ma acre magane totonu kamouri ia fakarogrogo, kaia pe tasi tane fekemuri, tshaku nokano sebisia ia aia.

³⁹Kaia acoua jimra o acre fekemuri ia tiafi sore, kaia o acre nakamo fakarogrogo ia ta keipare o ta nokano.