Read Futuna-Aniwa HIBRU, 11 Bible Online

HIBRU, 11 - Futuna-Aniwa bible

HIBRU, 11

¹MA ta fakarogrogo ko ta nokano o anea nanacina ma, ta nokoucitia o anea secitiamana.

²Ma ia aia aelter ituai nakoamo afasao erefia o acre.

³Ia fakarogrogo acitia keiro ta iafanua neimna ia afasao o Atua, ma anea koucitia seneimna o anea koucitia.

⁴Ia fakarogrogo Ebel niavatu ia Atua sore kagi erefisa akavari, akai o Kain aia seamo, ia akavari ra Atua nikafairo aia magane totonu, ia tshana akavatu, ma ia anere aia komate melou nokofasao.

⁵Ia fakarogrogo Inok niarafia ia taragi pe aia sematemana, ma aia nijimra neicitia, ianei Atua nakarafia aia taragi, ma mokagi Atua niarafia aia, aia nakamo tenei kotamou, pe aia maganerefia hepe Atua nibisa iateia.

⁶Ma pe fakarogrogo ko jimra aia sekabisa ia tagata, ma aia komai ia Atua fakarogrogo tamari aia konofo ma pe aia ko tufwa ta ioria iacre tamari nokomori aia.

⁷Ia fakarogrogo Noa nifakairo ia Atua o anea secitiamana atou ra, ia nimtacu neimna tasi vaka keipare tshana tagata, ia ane ra aia neitucuasana amaganisa o iafanua wararonei, ma niamo ta magane totonu aia ko o fakarogrogo.

⁸Ia fakarogrogo Ebraham ia ta nopoge nitapa aia keifeke watafa ia ta none keitufwa aia nagemana tshana, ma aia nifeke sekeiromana wehe aia kofano.

⁹Ia fakarogrogo aia neinofo fakasisi ia nontafa ma ia nontafa tasi foci o ta fanua o ta fatshipoge, hepe ia fanua jimra tshana, nokonofo ia afare mega ia Isak ma Jacob, ia aia acrawa niamo ta afatshipogera.

¹⁰Ma aia nifatshigeia ta tumrai sore aia nakamo avefare neimna ma neinagi ia Atua.

¹¹Ia fakarogrogo foci Sera niamo tomatua keiamo afoinai, ma nifarere tasi nontariki ia nopoge aia konahune, ianei aia neimentua aia tamari nifatshipoge.

¹²Ianenei nimai o tasi, ma aia hepe itata mate, tagata nalupai hepe afatu o taragi nalupai su, ma hepe ta tawne ia taftaftai, setomatua tawa.

¹³Acreiotshi nimate ia ta fakarogrogo senakamo ta afatshipoge, kaia nakacitia acre papai su, ma nibisa iacre, ma fakarogrogo ia acre, ma neitucua acre senofo tagata o fanua papai, ma nofo fakasisi ana ia fanua wararonei.

¹⁴Ma acre neitucua hepera, nifakairo pe acre fatshigeia tasi fanua.

¹⁵Ma ta mari pe acre nikeremoa keitafuri ia ta fanua acre nifeke, tiaha acre sekuafe.

¹⁶Kaia melou acre keiremoa ta fanua erefisa kagi ia taragi, ianenei Atua sekoma keitapa aia niare Atua, ma aia nakapenpena iacre tasi tumrai sore.

¹⁷Ia fakarogrogo Ebraham, ia nopogera iarmisosa aia, nikavatu Isak, keini aia nibisa keiamo ta afatshipoge nikavatu tshana nontariki tasi ana aia niamo.

¹⁸Aia neitucua o aia, Ia Isak katapa tshou tagata.

¹⁹Nimentua pa Atua ko tomatua keitshicithiakace aia ia acre nimate; ia acre foci hepe aia niamo aia.

²⁰Ia fakarogrogo Isak nifasao erefia ia Jekob ma Iesu ia anea keimai,

²¹Ia fakarogrogo Jekob ia nopoge aia itata mate, nifasao erefia ia eruantariki o Josef; ma nimori nokofakarogrogo ia tshana toktoko.

²²Ia fakarogrogo Josef ia nopoge aia itata mate, nifasao o ta feke o tagata o Isreil, ma nifakairo acre tshana fenagaro keiremoa is tshana aneive.

²³Ia fakarogrogo Moses ia nopoge nifarere aia, nifuna aia tori tumrama ia tshana nana ma ta mana, ianenei acre neicitia tasi tama erefisa, ma acrawa sekumtacu ta fasao mukei o ta teriki.

²⁴Ia fakarogrogo Moses wamuri aia kosore, neitucuasana acre keitapa aia ta nontariki o ta nofine o Fero.

²⁵Nokasubina sore kagi tshana roto my ia tagata o Atua, ma natshicina ta amaganisa o ane isa faru ana atou;

²⁶Neimentua ta sewa o tagata o Kristo sore kage erefisa outa, iluga iotshi outa o Icypt, ma aia neicitia ta ioria wamuri.

²⁷Ia fakarogrogo aia nifeke Icypt, sekumtacu ta fakainina o ta teriki ma aia neinofo merino hepe nokoucitia aia tagata sectiamana.

²⁸Ia fakarogrogo aia nikeina ta paska ma ta socina ia ta toto, pe aia nitaia ta touramatua setakaroiai acre.

²⁹Ia fakarogrogo acre niroro ia aroto nofokagi tatai ouroura hepe ia fanua matu, ma tagata Icypt foci niroro wamuri acre ma acre nikero mate.

³⁰Ia fakarogrogo ta apai sore o Jericho nito iraro, wamuri acre niroro kofori acre fitu anopoge.

³¹Ia fakarogrogo ta fene isa Rehab semate ia acre sefakarogrogo, ia nopoge aia niamo fakou nifatshigeia ta fanua ia merino.

³²Ma taha foci wamurira avou katucua? Ma ta nopogi siri kurava mokagi avou keitucua o Cition, ma o Barak, ma O Samson, ma o Jiftha, ma o Tevit, ma o Samwil, ma o aprofeta;

³³Acre ia fakarogrogo nifiatuce avaka, neimna ane sore masaro iateia, niamo afatshipoge, nipofna arogoutu o alaion.

³⁴Nitamte tiafi koura, nifeke ta emtakai o tomatshira palo, ia taru aia neimna acre tomatua, tomatua sore ia tatoua, neimna tagata nalupa o tatoua o tagata o fanua pouri nifura.

³⁵Afine niamo niare tagata mate keimouri foci, ma faru nisewa seamo feke ta sewa, pe acre nakoamo ta masike ia acre nimate.

³⁶Ma faru foci arotorea nimy ia niare isa fakamana ma atshi ia toura, ma o nifousia ma nagi acre ia tafare mukei;

³⁷Acre nietshiria acre ia afatu, acre nisa faru ia irua, acre nikeireresia, nitaia mate ia tomatshira palo acre, nitakaro ia umega o nokiri o asip ma o anane, niare anea mane jimra, arotorea nimy ma acre nitaroiai.

³⁸O acre ta fanua wararonei seerefia acre nitakaro ia atugogou, ma ia roro, ma ia aterua mune ma atupunaga o fanua.

³⁹Ma acreiotshira nakamo tafasao erefia o acre ia fakarogrogo, seamo ta afatshipoge.

⁴⁰Atua nakanagi anea erefisa kagi iacitia, pe acre ma acitia jimra seneimna o erefia.