Read Futuna-Aniwa HIBRU, 12 Bible Online

HIBRU, 12 - Futuna-Aniwa bible

HIBRU, 12

¹IANENEI nokoucitia acitia kofori ta sore apa o tagata o Iesu koucitia acitia, erefisa acitia nagi iotshi ane mafa, ma ta ane isa iauiai acitia, ma erefia acitia fura ia merino futshfutshi pe ko nagi mokagi acitia.

²Nokoucitia ia Iesu aia tufwa ma emna tomatua kurava tshote fakarogrogo; aia ia ta kabisa nagi mokagi aia ni tau ia ta fakaravasia, nifeimacoua ta koma, ma aia konofo ia ta norima matou o ta thron o Atua.

³Ma mentua aia tagata isa neisaciria sore ma fasosa aia, pe acoua setaru ma matese ia fenagaroua.

⁴Acoua sefiatu ia toto, nokofiatu amaganisa.

⁵Ma acoua nigaro ta fakairo aia nokofasao iacoua hepe erecriki, Tucutariki sefeimacoua ta fakamtakutshia o ta Teriki, ma sekamatese pe aia saciria akoi.

⁶Ma aia ta Teriki acitiafakarafia, aia fakamtakutshia aia, ma visia iotshi anontariki aia kamo.

⁷Pe acoua merino ia fakamtakutshia, Atua vere ia acoua hepe ia untariki, ma taha nontariki ta mana sevisia?

⁸Pe acoua nofo ma sefakamtakutshia acoua hepe iotshi tagata, acoua tagata o tagarakou ma jimra untariki.

⁹Ma acitia amo amanote ia ta konouri ma acre nifakamtakutshia acitia, ma acitia acitiafakarafia acre, ma sore kagi acitia fakarogona ma nofo erefia iraro ta Mana o anokano ma nofo mouri.

¹⁰Ma acre tamari ia anopoge toru ana nifakamtakutshia acitia hepe acre mentua erefia, kaia aia keisitu acitia, pe acitia amo o tshana tapu erefisa.

¹¹Iotshi fakamtakutshia setufwa nokobisa melou iateia, kaia iauiai aroto ia aia, kaia wamuri kurava aia tufwa anohua merino o maganerefia ia acre nokomori ia aia.

¹²Ianenei tshicitshiakace anorima pe nokotu, ma unturi taru.

¹³Ma emna aretu totonu ma niaua avai, pe acre sapsape setafuri feke ta retu, kaia pe erefia.

¹⁴Roro wamuri merino ia tagatotshi, ma amaganerefia tapu, pe aia jimra ia tasi tane aia sekacitiamana ta Teriki;

¹⁵Nokoucitia erefia pe jimra tasi tane feke ma seamo ta karofa o Atua, pe jimra tasi noaka o kona somo ma takaroiai arotoua, ma emna nalupai isa;

¹⁶Pe tasi tane tshigo fafine, mo tasi fasosa hepe Iesu, aia ia tasi akai nifakamata anea tshana tamana neitufwa aia.

¹⁷Ma acoua keiro ia ta nopoge wamuri tshana fenagaro keiremu amo ta fasao erefia, aia nitouwaki; ma aia setufwa aia ma aia nogia aia mukei ia noreimata.

¹⁸Ma acoua sekomai ia ta ora setofia aia, ma aia nikoko ia tiafi, mo ia apouri, ma kofu, ma tumtagi tefu.

¹⁹Ma ta noreo o ta tupu, ma ta noreo o afasao, acre neirogona ta noreo tera nifakouia mukei, pe jimra tasi fasao foci hepera koutucua foci iacre.

²⁰Ma acre setomatua keirogona taha nifasao mukei iacre, ma pe tasi ane mouri tofia ta ora katshiria aia mate ia afatu, mo warosia ia tatou.

²¹Ma ta sore ane ra acre neicitia, Moses neitucua avou kumtacu sore su ma virviri.

²²Kaia acoua komai ia ta ora Sion, ma ia ta tumrai sore o ta mouri Atua, ta Jerusalem o taragi, ma ia agelo nalupai su setawa acre,

²³Ia ta sore fetacina o tagata ma ta kalasia o ta touramatua, acre neiserea ia taragi, ma ia Atua aia ioria iotshi, ma ia ta anokano o tagata neimna erefia.

²⁴Ma ia Iesu ta tane kapare ia ta rakumna morea fou, ma ia ta tato o nokotasocina pe kafasao sore kagi erefia ta roto o Ebel;

²⁵Fatshigeia pe acoua senatshicina keirogona aia kafasao. Ma pe acre sefeke ta ioria o aia nifasao ia takere, sore kagi acitia sefura ia aia neitucuasana ia taragi;

²⁶Tshana noreo ia nopogera neimna iafanua keivirviri, kaia melou aia nakafatshipoge, nakatacua, Foci fakatasi avou ruruea jimra iafanua ana, kaia foci taragi,

²⁷Ma tenei fasao, Fakatasi foci, fakairo ta amke o anea aia neimna, pe anea seruruia nakonofo mukei.

²⁸Ianenei acitia nakamo tasi vaka mukei seamke aia, erefisa acitia nakamo arofo ia aia acitia nakavere ia Atua ia acitiafakarafia, ma kumtacu o aia.

²⁹Mo tshote Atua ko ta tiafi koura ma nokeina.