Read Futuna-Aniwa HIBRU, 4 Bible Online

HIBRU, 4 - Futuna-Aniwa bible

HIBRU, 4

¹IANENEI erefia acitia kumtacu, pe ta fatshipoge neinagi iacitia o kororo ia tshana kogapu, tasi o acoua hepe sefano ia aia.

²Ma ia acitia ta fasao erefia nikova, hepe ia acre; kaia ta fasao nikova seasitu iacre, sefakafirofiro ia fakarogrogo ia acre neirogona aia.

³Kaia acitia nafakarogrogo roro ia tenei kogapu, hepe aia neitucua, Hepe avou neitucua mukei ia tshaku fakainina; pe acre seroro ia tshaku kogapu; kaia ta avere iateia neimna kurava ia ta nontafito o iafanua wararonei.

⁴Ma ia nifasao ia ta nontafito tasi o nopoge fitu hepe nei, ma Atua nigapu ia nopoge fitu ia iotshi tshana avere.

⁵Ma ia tinei nontafa foci, Pe acre kororo ia tshaku kogapu.

⁶Nokoucitia ianenei aia nofo pe faru roro ia tshana kogapu, ma acre aia nikova mokagi iacre seroro ia aia ianenei acre sefakarogrogo;

⁷Foci aia neitucua o tasi nopoge, nokofasao ia Tevit, Iranei, wamuri anopoge nalupai; hepe ia neitucua, Iranei pe acoua karogona tshana noreo, seemna mukei niaua aroto.

⁸Ma pe Joshua nakatufwa acre kogapu, aia jimra wamurira nifasao iacre o tasi foci nopoge.

⁹Ianenei tasi kogapu konofo ia tagata o Atua.

¹⁰Ma ia nifano ia tshana kogapu, aia foci nakogapu ia tshana avere hepe Atua nigapu ia tshana.

¹¹Erefia acitia vere keiroro ia tera kogapu, pe jimra tasi tane koto hepe acre ia sefakarogrogo.

¹²Ma ta fasao o Atua ko mouri, ma tomatua, ma emtakai sore kagi ta waramwara tomatshira palo, nokoserea ia fakarua ta nokano ma fenagaro, ma o ta afakukuga ma niare roto, ma aiai kacitia ta fenagaro ma ane mune ia ta roto.

¹³Jimra ane neimna aia secitiamana, kaia ane iotshi nofo mokagi ta foimata o aia nokofatshigeia ma ioria acitia,

¹⁴Nokoucitia acitia nakamo ta sore tene tapu, aia ko nifano ia ta ataragi, Iesu ta Nontariki o Atua, erefia acitia purutshia mukei tshote fakarogrogo.

¹⁵Ma acitia seamo tasi tane tapu sore, ma aia setofia ia fenagaro my ia tshote taru ma, kaia ia ane iotshi keireresia aia hepe acitia, kaia aia semaganisa.

¹⁶Ianenei erefisa acitia tomatua sumtacu komai ia aia ia amori, pe acitia nakamo arofa, ma amo tomatua asitu acitia ia nopoge iotshi.