Read Futuna-Aniwa HIBRU, 8 Bible Online

HIBRU, 8 - Futuna-Aniwa bible

HIBRU, 8

¹MA o ane iotshi acime nakofasao tenei ta nokano: Acitia nakamo ta sore tane tapu, aia konofo ia norima matou o Atua sore aia atarigi;

²Ta tane tapu o ta fare mori sore, mo o tamari fare mega mori, aia ta Teriki neinagi, ma jimra tagata.

³Ma iotshi tane tapu sore ko nagi keiavatu anea tufwa ma aneakeitaia mate ia takavari, ianenei erefia tenei tane foci nakamo tasi ane keitufwa.

⁴Ma pe aia nofo ia takere wararonei, aia jimra nofo tasi tane tapu, nokoucitia acre atane tapu nofo keivatu anea tufwa hepe ta fakairo o tafasao tapu;

⁵Acre vere hepe ta noata ma ata o anea ia taragi, hepe Moses nifakairo o Atua ia nopoge aia itata neimna ta fare mori o umega ma; fatshigeia akoi emna ane iotshi hepe ta fakatagasia nifakariaria akoi ia ta ora.

⁶Kaia melou aia nakamo avere erefisa sore kage, aia ma ta tane kapare o erefisa kagi rakumna mori, aia neinagi aia ia sore kagi erefisa afatshipoge.

⁷Ma pe ta fakatasi rakumna mori nofo erefisa, sefatshigeia ta none nofo ia ta fakarua.

⁸Ma neicitia acre taru, aia neitucua, koucitia, anapoge komai koutucua ta Teriki, pe avou kamna tasi fou rakumna mori ia tafare o Isreil ma ia tagata o Juta;

⁹Jimra hepe ta rakumna mori avou neimna ia tamanorea ia ta nopoge miamo acre ia ta norima keiarafia acre watafa o Icypt; ianenei acre senofo mukei ia tshaku rakumna mori, ma avou secitiafakarafia acre koutucua ta Teriki.

¹⁰Ma tenei ko ta rakumna mori avou kamna ia tagata ia tagata o Isreil wamuri anopoge ra koutucua ta Teriki, avou kanagi tshaku afasao tapu ia niare fenagaro, ma serea acre ia niera aroto, ma avou kanofo niare Atua, ma acre kanofo tshaku tagata;

¹¹Ma acre sefakairo iotshi tane tshana tagata nofo itata aia, ma tshana noso, nokoutucua, keiro ta Teriki; ma iotshi kakeiro avou ia ta sisi ma ta sore.

¹²Ma avou seioria niare amaganisa, ma niare isa ma amaganisa avou sementua foci.

¹³Ia anera aia neitucua, Tasi fou rakumna mori, aia nakamna ta fakatasi ituai ma ane komeru kopara ituai, ko itata touwaki.