Read Futuna-Aniwa HIBRU, 9 Bible Online

HIBRU, 9 - Futuna-Aniwa bible

HIBRU, 9

¹MA ta rakumna mori neitufwa mokagi foci aia nakamo avere o amori, ma ta fare mori o fanua.

²Ma acre neimna tasi tafare mega ma tererakou, ta fakatasi, ia aia fakatasi neinofo taganea o akantel, ma tafata, ma ta bret o neicitia; nitapa aia ta rotopa tapu erefisa.

³Ma wamuri ta fakarua tumega touria pofna, ta rotopo nitapa aia ta itapu erefisa o iotshi.

⁴Ia aia neinofo ta taganea pan aia neimna o colt, ma ta bokis o ta rakumna mori niferekia iluga ma kofori ia colt erefisa, ia aia neinofo ta pot o colt nifonu ia mana, ma ta tokotoko o Eron pe nifateke, ma erua afata o ta fasao tapu.

⁵Ma iluga aia ta akerubim o ta sore noata ta ane nofo ia aia iai o karofa o acre melou sekeiro acime keifasao sore totonu.

⁶Ma wamuri aneiotshi ra neimna hepera, ta fakou tapu niroro nopoge ma nopoge ia ta fakatasi rotopa ia ta nokovere o Atua.

⁷Kaia ia ta fakarua nifano ta tane tapu sore aia ana fakatasi ana ia tou ma tou, ma aia sefano pe toto jimra aia nikavatu aia ia aia ma ia amaganisa o ta tagata;

⁸Ta nokano tapu ia ane nei nifakairo, pe ta retu ia ta rotopa tapu sore kage iotshi setshiki ia anopoge ta fakatasi tafare mega o ta mori neinofo.

⁹Aia ko ta fakatagasia ia acre anopogera, ia aia niavatu anea tufwa ma akavari nitaia mate, kaia acre seneimna aia niavare ra penpena erefia, ia tshana fenagaro;

¹⁰Acre nofo ana ia akai, ma ia avai numea, ma ia nalupai ataroa anea ma, ma ia avere nalupai o tenei fanua neitufwa iacre ia ta nopoge o anea mane fou.

¹¹Kaia Kristo nakamai ta tane tapu sore o anea erefisa keimai, ia ta sore kage ma erefisa tafare mori, jimra neimna ia anorima, nokano nei, jimra o tenei fanua.

¹²Ma jimra ia ta toto o anone, ma o akurimatou sisi, kaia ia tshana toto aia nifanao fakatasi ana ia ta tapu none, nakamo anea mouri atou ma tou iacitia.

¹³Ma pe ta toto o akurimatou atane ma o anane, ma ta atefu o tiafi ia aia acre tugeace kurimatou fine, nokotasocina acre isa, neipenpena acre isa ia niare notshino.

¹⁴Sore kagi erefisa ta toto o Kristo, aia ia atou ma tou Nokano niavatu aia erefisa ia Atua, penpena fenagaroua ia avere mate keiavere ia ta nokomouri Atua?

¹⁵Ma ianenei aia ko ta nokotafuagaro o ta fou arakumna moria, pe ia ta mate ia ta ioria o amaganisa, pe neinofo irara ta fakatasi rakumna mori, acre nitapa nakatufwa ta fatshipoge o anea mouri atou matou.

¹⁶Ma pe tasi rakumna mori konofo, aia konofo ia taha nopoge ta tane neimna aia komate.

¹⁷Ma ta rakumna mori ko tomatua wamuri ta tane neimna aia ko mate, ma aia ko setomatua iotshi anopoge aia neiserea aia ko mouri.

¹⁸Ianenei, ma jimra ta fakatasi rakumna mori neitufwa ia toto jimra.

¹⁹Ma wamuri Moses neitucua iotshi afasao neitufwa tapu ia iotshi tagata hepe ta fakairo o ta fasao tapu, aia niamo ta toto o akurimatou sisi ma o anane ia avai, ma afaru ouroura o sip ma hesop ma nitasocina ta tatapurea neiserea ma iotshi tagata.

²⁰Nokoutucua Tenei ko ta toto o ta rakumna moria Atua neinagi iacoua.

²¹Ma aia nitasocina ia toto ta fare mega mori, ma iotshi aganea o ta vere.

²²Ma hepe itata ane iotshi ia ta fasao tapu kopenpena ia toto, ma pe toto seregia setouwaki nori amaganisa.

²³Ianenei aia erefia pe ta afakatagasia o anea ia taragi neipenpena ia acre ra, kaia ta anea o taragi ia akavari sore kage erefisa.

²⁴Ma Kristo sefano ia ta rotopa tapu neimna ia arimore, acre konofo ta fakatagasia o ta mari; kaia ia taragi, melou keinofo iai mokagi Atua ia acitia;

²⁵Ma jimra pe aia kavatu aia nopoge nalupai, hepe ta sore tane tapu fano fakatasi ia ta tasi ma tasi tou iotshi ia ta toto o faruke.

²⁶Pe hepe tera aia nimai mate ia tou nalupai wamuri tave o iafanua wararonei, kaia melou itata ta kurava o fanua wararonei aia nakamata keiamke isa ia ta takavari o aia.

²⁷Ma hepe aia neinagi ia tagata fakatasi keimate, kai wamurira ta keiioria acre.

²⁸Ma hepe Kristo niavaga takavari mate ta ioria o amagnasia o tagata nalupai, ma ia acre fatshigeia aia, iacre aia kamai kacitia fakarua, ane isa jimra ia amouri.