Read Futuna-Aniwa JACOBUS, 2 Bible Online

JACOBUS, 2 - Futuna-Aniwa bible

JACOBUS, 2

¹AKUSO, acowa sekoamo ta fakarogrogo o tshote Teriki Iesu Kristo, ta Teriki o ta sore, ia acitiafakarafia tasi tagata mokagi tasi foci.

²Ma pe acowa nifetacina ia tafare mori, ma tasi tatane komai iacowa ia ta colt reg, ia umega erefisa, ma komai foci tasi tatane ia tumega isa niana anea mane jimra;

³Ma acowa sorekage acitiafakarafia aia nitaka ia umega erefisa, ma koutucua iateia, Konofo akoi icunei ia none erefisa; ma koutucua ia tatane niana ane jimra, Kotu akoi iai, mo konofo icunei iraro tafata tsha tshaku novai;

⁴Konapecua i anera acowa acitiafakarafia tasi sore kage tasi foci o acowa, ma acowa nokoamo ioria o fenagaro isa?

⁵Fakarogona, akuso nakacitiafakarafia. Atua kasubina mo acre niare anea mane kojimra ia fanua wararonei tomatua ia fakarogrogo, ma nokonofo ia ta vaka aia neitucua aia katufwa iacre acitiafakarafia aia?

⁶Kaia acowa nakafeimacowa tagata niare ane jimra. Takou niare anea mane nalupai takaroiai acowa mo, ma tarotshi acowa emoa takou sore ioria amaganisa, mo?

⁷Acre ma kafasosa tapu mo tera neigo erefisa ia aia nitapa neigo tshowa?

⁸Pe acowa maganerefia ia ta sore tafasao tapu hepe neisereace ia tatapuria tapu, Akoi kacitiafakarafia tagata konofo itata akoi, hepe akoi acitiafakarafia akoi, acowa maganerefia;

⁹Kaia pe acowa acitiafakarafia tasi sore kage tasi foci, acowa maganisa, ma tafasao tapu fakairo acowa tshowa maganisa.

¹⁰Ma pe tasi kamagenerefia ia iotshi tafasao tapu, ma magane safi ia tasi nopito, aia hepe iauiai iotshi.

¹¹Ma aia neitucua, Natshicina tshigofia fafine mo tatane tsha faruke, neitucua foci, Natshicina kotshi komate tagata. Ma pe akoi sekotshigo fafine mo tatane tsha faruke, kaia pe akoi kotshi komate tagata, akoi nitakaroiai tafasao tapu.

¹²Fasao acowa, ma vere, hepe acre ia taha nopoge ioria tshare katucua hepe fakairo ia tafasao tapu o eivetea.

¹³Ma kaioria aia I karofa jimra pe aia sekatufwa karofa ia tagata, ma karofa kabisa ia ioria magane.

¹⁴Konapecua taha asitu, akuso, pe tasi tatane koutucua aia nokoamo ta fakarogrogo, ma tshana vere iateia kojimra? konapecua tshana fakarogrogo kapare aia aneamouri mo?

¹⁵Pe ta noso tasi mo ta kave niare umega ma akai jimra anopoge,

¹⁶Ma tasi o acowa koutucu iacre, Feke ia aroto merino, erefia acowa evera ma makona ia akai; kaia pe acowa setufwa iacre anea mane erefia tsha ta notshino; tshou afasao seasitu iacre mo?

¹⁷Hepra ma fakarogrogo, pe tshan avere iateia kojimra, aia komate, nokonofo ana.

¹⁸Keine, pe tasi tatane koutucua, Akoi nokoamo fakarogrogo ma avou nokoamo avere; fakariake iatavou tshou fakarogrogo ma tshou avere iateia kojimra, ma avou kafakariakatu akoi tshaku fakarogrogo ia tshaku avere iateia.

¹⁹Akoi fakarogrogo pe Atua tasi ana konofo; ma erefia tshou magane ra; agelo isa foci fakarogrogo tera ma virviri.

²⁰Kaia pe erefia akoi keiro, Akoi tatane aroto mama, pe fakarogrogo konofo ma avere iateia kojimra aia komate?

²¹Ebraham tamanoteia neipenpena erefia emoa Atua ia avere erefia mo, wamuri aia nitakavari tshana vere tshana nontariki Aisak ia ta fata?

²²Kowcitia akoi tshana fakarogrogo niavere ia tshana avere, ma ia tshana vere tshana fakarogrogo neipenpena erefia?

²³Ma neimna hepe ta fasao tapu neisereace, Ebraham nifakarogrogo Atua, ma aia neitufwa aia ioria o maganerefia iateia, ma nitapa aia ta Nele o Atua.

²⁴Kowcitia acowa ia avere, tasi tatane imna erefia emoa Atua, ma jimra ia fakarogrogo ana.

²⁵Hepra ma, Rehab ta fine nimaganisa neipenpena erefia emoa Atua ia avere, wamuri aia niarafia fakou nikowna, ma nikownace acre watafa ia sece teretu?

²⁶Ma hepe ta noaga pe nokano jimra aia komate, hepe ma fakarogrogo ma avere iateia kojimra aia komate ma.