Read Futuna-Aniwa JACOBUS, 3 Bible Online

JACOBUS, 3 - Futuna-Aniwa bible

JACOBUS, 3

¹AKUSO, natshicina acowa nalupai konofo tagata fakairo, nokeiro, pe katufwa iacitia fakasore ioria iateia.

²Ma ia ane nalupai aitiotshi magane iotshi safi. Pe tatane tasi semagane safi i afasao, aia tatane erefisa, ma tomatua foci keitucua sana natshicina magane safi iotshi o iotshi notshino.

³Kowcitia, acitia nage abet ia rogoutu o ahose pe acre kororo hepe acitia acitiafakarafia; ma acitia ta furfuri iotshi notshino tshare.

⁴Kowcitia foci avaka, acre soresu, ma acre tere mokagi atumtagi sau sore, kaia acre takavini ia ta foimafoi sesi ana, hepe ta teriki acitiafakarafia.

⁵Hepe ana ma ta norero aia kosisi ana, ma aia koutucua afasao sora su. Kowcitia, ane sore tafii sisi koka!

⁶Ma ta norero aia ko tiafi, tasi fanua wararonei o aneamane isa; hepe ma ta norero konofo I anuntafa iotshi o tshote notshino, ma aia takaroiai iotsho notshino, ma aia nage tiafi koura ia iotshi roto ma notshino, ma tiafi sore imna aia koka.

⁷Ma ane iotshi kororo ia novai efa, ma amanu iotshi, ma o agata, ma o ane iotshi ia tatai, kotara, ma tagata nikotara acre iotshi.

⁸Kaia ta norero jimra tasi tatane tomatua keitara; aia ane isa serogona afasao, kofonu o ane kona isa ia takoroiai.

⁹Ia aia acitia kabisa mori Atua, aia ta Mana; ma ia aia acitia kofasosa tapu ia tagata, acre aia neimna hepe Atua.

¹⁰Tafasao erefia ma tafasosa tapu saciria komai watafa rogouta tasi, Akuso isa ane iotshi hepra konofo.

¹¹Konapecua tasi tavai nokonace ia none tasi kotafe watafa tavai mugaro ma tavai kona, mo?

¹²Konapecua akuso, terarakou tenamasi tomatua kohua anohua o olive? mo terarakou vaini kohua atenamasi? hepe ma jimra tasi tavai nokonace tomatua keitufwa watafa keitafe tatai ma tavai mugaro.

¹³Akai tatane tasi o acowa arapakou kotufwa aia keiro ane nalupai? erefia aia fakariakatu ia tshanafasao erefisa tshana avere ia fasao sisi mirino o arapakou.

¹⁴Kaia pe acowa koamo kona feimacowa ma fiatu i arotowa, sekabisa iateia, ma sekorefu ia tamari.

¹⁵Arapakou tenei sekofanifo ia iluga, kaia aia komai o fanua waraonei, aia tsha amagane isa, tsha tiapolo.

¹⁶Ma ia none fakainina ma fiatu konofo iai, ma ane safi konofo iai ma iotshi avere isa.

¹⁷Kaia ta arapakou pe kofanifo iluga, aia komakagi koma, merino, fasao fakasisi, ma aroto meru, kofonu o acitiafakarafia tagata ma anohua erefia, secitiafakarafia tasi tagata mokagi tasi foci, ma semagane o aroto erua.

¹⁸Ma ta nohua o amaganerefia koeipesia ia aroto merino o acre imna amagane merino.