Read Futuna-Aniwa FAKATASI PITRUS, 3 Bible Online

FAKATASI PITRUS, 3 - Futuna-Aniwa bible

FAKATASI PITRUS, 3

¹HEPE ma acoua ananahune, fakarogona ta fasao ma maganerefia ia niaua anunwane, pe tasi samaganerefia ia ta fasao tapu, acre foci ma watafa ta fasao erefia makamo anea mouri ia afasao o ta ananahune.

²Pe acre kacitia niaua afasao erefia ia kumtacu.

³Erefia niare feifeirace kojimra watafa karakaia o karaga afoiuru, mo nokonagi o colt ia ta notshino, mo kataka ia umega sore.

⁴Kaia erefia aia ta mune tane o ta roto, ia ane semeru, o tasi sefiatu ma merino ia nokano, aia emoa Atua ko o fakamata sore.

⁵Ma hepe amagane nei ia atou ituai ta afine itapu foci, nifakarogrogo ia Atua, nitaka notshinorea nokonofo irara ma fakarogona afasao o niare anunwane;

⁶Hepe Sera ma neirogona afasao o Ebraham, nokotapa aia teriki; tshana anofine acoua, ia atou iotshi acoua maganerefia, ma sekumtacu sore su.

⁷Foci erefia acoua anunwane konofo ia acre hepe ia arapakou, nokositu ta nanahune, nokeiro aia jimra tomatua hepe acoua, ma hepe akorua amo ta karofa o mouri, pe niaua amori seneimna taru.

⁸Kurava, erefia acoua iotshi nofo ia tasi fenagaro, tasi asitu tasi foci, acitiafakarafia hepe anoso, aroto meru ma merino;

⁹Sefakamata ane isa ia ane isa, mo saciria ia saciria, kaia tafuri ma fasao erefia, nokeiro pe acoua nitapa ia tenhi magane, pe acoua amo ta fasao ma erefia.

¹⁰Ma aia acitiafakarafia mouri, ma koucitia erefia anopoge, erefia tshana norero sefasosa, ma tshana anokiri o rugoutu pe acre sefasao isa karasia;

¹¹Erefia aia feimacoua anea isa, ma maganerefia; erefia aia fatshigeia merino, ma fano wamuri aia.

¹²Ma afoimata o ta Teriki nofo iluga acre magane totonu, ma tshana atarega kotshiki ia niare amori nokotapa aia, kaia ta foimata o ta Teriki ko paraveia acre maganisa.

¹³Ma akia kaiauiai acoua, pe acoua roro wamuri anea erefia;

¹⁴Kaia pe takaroiai acoua ioria o magane totonu, kabisa acoua ma sumtacu niare magane, ma arotoua semy;

¹⁵Kaia nagi erefia ta Teriki Atua ia arotoua, ma meloua nopoge ma nopoge tufwa acre fasao pe fakouia acoua tiaha acoua nanacina ia merino ma kumtacu.

¹⁶Nokamo fenagaro erefia; pe acre kofasoa o acoua hepe acoua isa, acre makamo koma pe fasosa feiva ia neaua afasao erefia ia Kristo.

¹⁷Ma aia ko, erefia, pe Atua keinagi hepera ia tshana fenagaro, pe takaroiai acime ioria o maganerefia, ma jimra ioria o ane isa.

¹⁸Ma Kristo foci nakamy fakatasi ioria tshote amaganisa, ta erefia totonu ia acre semagane totonu, pe aia arafia acitia ia Atua, nitaia mate ia ta konouri, kaia neimna mouri ia ta nokano.

¹⁹Ia anera foci aia nifano ma nikova ta anokano ia ta fare mukei;

²⁰Acre ituai sefakarogona tshanafasao ma semaganerefia iateia i atou ta merino o Atua nitari i anopoge o Noa, ia nopoge ta vaka noko penpena, ia aia toru ana, varu tagata ana nipare ma semate ia avai.

²¹Ta fakatagasia ia babtiso melou kapare acitia (jimra ia ta touwaki ta konouri, kaia ta fasao o ta fenagaro erefia ia Atua) ia ta nimasike ma feke nimate o Iesu Kristo;

²²Aia nifano ia taragi, ma konofo ia ta norima matou o Atua, agelo, ma acre sore ma atomatua nokonofo iraro aia.